Quirinaalpaleis
![](http://upload.wikimedia.org/wikipedia/commons/thumb/e/e4/Quirinale_palazzo_e_obelisco_con_dioscuri_Roma.jpg/220px-Quirinale_palazzo_e_obelisco_con_dioscuri_Roma.jpg)
![](http://upload.wikimedia.org/wikipedia/commons/thumb/3/35/Quirinale_cortile_interno_Roma.jpg/220px-Quirinale_cortile_interno_Roma.jpg)
![](http://upload.wikimedia.org/wikipedia/commons/thumb/6/64/Guard_quirinal_palace.jpg/220px-Guard_quirinal_palace.jpg)
![](http://upload.wikimedia.org/wikipedia/commons/thumb/d/de/Secretary_Pompeo_Shakes_Hands_with_President_Mattarella_%2848831443916%29.jpg/220px-Secretary_Pompeo_Shakes_Hands_with_President_Mattarella_%2848831443916%29.jpg)
Die Quirinaalpaleis (Italiaans: Palazzo del Quirinale) is die Italiaanse staatspresident se ampswoning in Rome. Die paleis, wat net soos die Piazza del Quirinale (die plein waarop dit geleë is) na die Romeinse heuwel Quirinaal vernoem is, het vanaf 1583 as somerwoning vir pous Gregorius XIII ontstaan. Om goeie redes - die 16de eeuse Vatikaan is volgens oorlewering deur malaria geteister.[1] Die Quirinaal was 'n meer gesonde omgewing en - as 'n heuwel waar gewoonlik 'n vars bries waai - 'n gewilde toevlug tydens groot somerhitte in Rome. Dit bied panoramiese uitsigte oor die Ewige Stad, insluitende die Sint Pieterskerk. Daarnaas is pouslike konklaves hier gehou en kantore van die Kerkstaat in die paleis gehuisves.
In 1871, toe Rome as hoofstad van die nuutgestigte Koninkryk Italië geproklameer is, is die Quirinaalpaleis deur die staat gekonfiskeer om as ampswoning van Italiaanse konings te dien. Die Rooms-Katolieke Kerk is eers met Verdrag van Laterane tussen die Heilige Stoel en die Italiaanse staat in 1929 skadeloos gestel. London Die paleis met sowat 1 200 vertrekke het oor die eeue as ampswoning van dertig pouse, vier Italiaanse konings en twaalf staatspresidente gedien. Die paleis se oppervlakte is drie keer kleiner as dié van Londen se Buckingham-paleis, maar twintig keer so groot soos die Withuis in Washington, D.C.[2]
Sedert die afskaffing van die monargie in Italië in 1946 dien die paleis as ampswoning van die Staatspresident van die Italiaanse Republiek. Die paleis se buitefasades en interieur het sedertdien grotendeels onveranderd gebly. Op vyf dae van die week mag die paleis deur die publiek besigtig word. Alle besigtigingstoere moet vooraf aanlyn bespreek word.
Verwysings
[wysig | wysig bron]- ↑ DK Eyewitness Rome 2020. London: Dorling Kindersley 2019, bl. 188
- ↑ Wanted in Rome: Visiting Italy's Quirinal Palace in Rome. Besoek op 16 September 2020
Eksterne skakels
[wysig | wysig bron]- Presidenza della Repubblica