Oorspraak
In elektronika, verwys die begrip oorspraak na een van die volgende verskynsels:
- Die ongewenste kapasitiewe-, induktiewe- of konduktiewe koppeling van een stroombaan, deel van 'n stroombaan of kanaal tot 'n ander.
- Enige verskynsel waardeur 'n sein wat in een stroombaan of kanaal versend word 'n ongewenste effek in 'n ander stroombaan of kanaal veroorsaak.
- Met betrekking tot opnames, verwys die begrip oorspraak na die lekkasie van klank van een instrument na 'n ander mikrofoon wat voor 'n ander instrument of sanger geplaas is. 'n Algemene voorbeeld van hierdie lekkasie is die hoë-frekwensie, swaarversterkte klank van die hoofkitaar in die mikrofone van ander instrumente.
In telekommunikasie kan oorspraak gewoonlik herken word as spraak of seintone wat vanaf ander persone se verbindings uitlek. As die verbinding 'n analoë verbinding is kan gedraaide draadpaarkabels help om oorspraak te verminder. Alternatiewelik kan die omskakeling na 'n digitale vorm ook bydrae om die sein minder vatbaar te maak vir oorspraak.