Mtunzini

Mtunzini
Mtunzini  Mtunzini se ligging in KwaZulu-Natal
Koördinate: 28°57′S 31°45′O
Land	Suid-Afrika
Provinsie	KwaZulu-Natal
Distrik	King Cetshwayo
Munisipaliteit	uMlalazi
Oppervlak
• Totaal	10,43 km2 (4,03 vk. myl)
Bevolking  (2011)
• Totaal	2 199
• Digtheid	211/km2 (550/vk. myl)
Rasverdeling (2011)
• Wit mense	72.0%
• Indiërs/Asiërs	1.3%
• Bruin mense	1.2%
• Swart mense	25.1%
• Ander	0.4%
Taal (2011)
• Engels	48.9%
• Afrikaans	33.5%
• Zoeloe	14.6%
• Ander	2.9%
Poskode (strate)	3867
Poskode (posbusse)	3867
Skakelkode	035

Mtunzini se strand

Umlalazi-lagune teen skemer

Mtunzini is 'n kusdorpie aan die N2-nasionale pad ongeveer 140 km noord van Durban in KwaZulu-Natal. Dit lê een uur per motor van Hluhluwe-Imfolozipark en iSimangaliso-vleilandpark. Dit is gewild by binnelanders oor die skoolvakansies, veral as gevolg van matige temperature tydens die wintermaande. Die naam is afgelei van ’n Zoeloe-woord wat “in die skadu” beteken.

Permanente inwoners: ongeveer 2 200 (ongeveer 34% is Afrikaanssprekend).

Ekonomie

Die dorp het geen groot nywerhede nie, maar wel enkele kleiner ondernemings. Die meeste inwoners werk in omliggende dorpe. In die verlede het akademici en afgetrede suikerboere hulle hier gevestig. Die toerisme- en vakansiebedryf lewer ’n aansienlike inkomste. Gereelde kragonderbrekings en sporadiese waterskaarste kom voor. Daar is ook 'n aanbod van werk uit die naasliggende stamgebiede.

Ligging

Die naaste dorpe is: Ezikhawini (22 km by Universiteit van Zoeloeland); Empangeni (37 km); Richardsbaai (47 km) en Eshowe (44 km). Die reis van Johannesburg na Mtunzini duur ongeveer 6 uur per motor via Standerton, Volksrust en Vryheid. Soos die kraai vlieg, is Mtunzini die naaste kusdorp aan Johannesburg. Dit is een van die redes waarom Telkom se SAFE optiese veselkabel van die Ooste (Singapoer) en SEACOM se optiese veselkabel vanaf Oos-Afrika hier aanland.

Mtunzini beslaan Wyk 9 van die uMlalazi Plaaslike Munisipaliteit, met hoofkantoor in Eshowe.

Besienswaardighede en vermaak

Die Raphiapalm opelug-monument is die tuiste van die bedreigde Witaasvoël (Gypohierax angolensis). Oor die 860 voëlsoorte is al in die inheemse kusbos opgemerk. Daar is ook die Umlalazi-natuurreservaat met 'n besienswaardige wortelboommoeras en -ekostelsel. Gewilde aktiwiteite is perdry, visvang, waterski, diepseehengel, die gebruik van die wandelpaaie in die kusbos en die benutting van die swemstrand (20 km skoon strande). Die dorp het ook 'n buiteklub met muurbal- en gholfbane.

Distrik

Die distrik is 1 100 km² groot. Die belangrikste ekonomiese aktiwiteit is suikerriet en denneplantasies. Exxaro, 'n Suid-Afrikaanse mynmaatskappy, het gedurende 2012 bekend gemaak dat hy 'n lisensie bekom het om die Fairbreeze-myn, suid van Mtunzini, tot stand te bring. Die plaaslike gemeenskap staan dit teen.

Leesstof

Sien boek The history of Mtunzini, volume 1 en 2, deur F.A. van Jaarsveld.

Sien ook

• Lys van dorpe in Suid-Afrika

Eksterne Skakels

• Foto's van Witaasvoël (Palm Nut Vulture) by Mtunzini
• www.waterbessie.co.za Geargiveer 6 November 2010 op Wayback Machine