Model (persoon)

'n Model is 'n persoon wat of

as visuele hulpmiddel vir 'n kunstenaar of kunstenares (gewoonlik 'n fotograaf, skilder of beeldhouer) poseer terwyl hy of sy 'n kunswerk skep, of
'n persoon wat vir 'n fotograaf poseer om kommersiële produkte (soos mode by 'n modeskou, in 'n tydskrif of vir 'n advertensieveldtog) of dienste te adverteer, bemark of bekend te maak. Die visuele en seksuele aantreklikheid van die model self staan sentraal in erotiese modelwerk wat sedert die laat 19de eeu tot 'n kunsvorm binne die fotografie ontwikkel het - die model word hier as esteties bevredigend en/of seksueel prikkelend ervaar. Modelwerk word gewoonlik onderskei van ander soorte openbare optredes en opvoerings (soos teater- en filmkuns), alhoewel grense hier nie altyd maklik getrek kan word nie.

Modelwerk behels geen klassieke opleidingsberoep nie, alhoewel suksesvolle kandidate, wat vir modelwerk gekeur word, bepaalde voorvereistes moet vervul. Besonderhede soos die perfekte loopplank-optrede tydens modevertonings moet deur harde oefenwerk aangeleer word. 'n Professionele model met langjarige ervaring, wat vir 'n fotograaf enige liggaamshouding en -uitdrukking sonder verdere aanwysings kan handhaaf, bespaar tyd en mag gewoonlik 'n hoër vergoeding vra.

'n Professionele modelloopbaan begin op die ouderdom van agtien jaar of jonger; meestal is modelle op die ouderdom tussen 20 en 30 jaar in die beroep werksaam. Natuurlik word steeds ook modelle in hoër ouderdomsgroepe benodig. Met toenemende ouderdom word die persentasie potensiële kandidate, wat vitaal en opties aantreklik genoeg is, nogtans steeds kleiner.