Krokodilrivier (Mpumalanga)

Vir die "Krokodilrivier", 'n sytak van die Limpopo, sien Krokodilrivier (Limpopo).

Krokodilrivier (en) Crocodile River
Krokodilrivier stroomop van die Kwenadam Krokodilrivier stroomop van die Kwenadam
Stroomgebied	Suid-Afrika
Hoofrivier	Komatirivier
Oorsprong	Steenkampsberg, noord van Dullstroom
Sytak -links	Mbiyamitirivier, Witrivier
Sytak -regs	Elandsrivier, Kaaprivier
Monding	Komatirivier
Krokodilrivier Krokodilrivier se samevloei met die Komatirivier op die Mosambiekgrens.
Koördinate: 25°26′18″S 31°58′35″O

Die Krokodilrivier is 'n groot rivier wat deur Mpumalanga, Suid-Afrika vloei.

Oorsprong en roete

Die Krokodilrivier ontspring in die Steenkampsberge noord van Dullstroom, Mpumalanga, en is 'n takrivier van die Komatirivier. Dit staan ook bekend as die Krokodilrivier (Oos) om verwarring te voorkom met die Krokodilrivier in die weste van die ou Transvaal.

Krokodilrivier vanuit Marlothpark gesien.

Die Krokodilrivier in Mpumalanga het 'n opvanggebied van 10 446 km². Stroomop is die gewilde forelhengelplekke rondom Dullstroom. Na die Kwenadam vloei die rivier deur Schoemanskloof, oor die Montrose-waterval na die Laeveldse landbougebied. Die stelselmatige afname in die rivier se volume is waarskynlik a.g.v. wateronttrekking vir landboubesproeiing en natlei van vrugteboorde. Daarna vloei dit deur Nelspruit se nywerheidsgebied, dan langs die suidelike Krugerwildtuingrens en groot suikerrietplantasies, en naby Komatipoort vloei die rivier in die Komatirivier in.

Toerisme-aantreklikhede langs die Krokodil

Krokodilrivier vanuit Ngwenya Lodge gesien

Krokodilrivier vanaf Malalane gesien

'n Nylkrokodil lê en bak in die son op die oewer van die Krokodilrivier naby Malalane

Die rivier vloei deur die Laeveld- Botaniese Tuin by Nelspruit, waar dit 'n diep kloof binnegaan, en die Nelsrivier uit die noorde daarby aansluit. Dit vorm ook die volle suidelike grens van die Krugerwildtuin. Hier verskaf die oewer uitstekende wildkykgeleenthede, aangesien diere vrylik tussen die Krugerwildtuin en privaat reservate ten suide rondbeweeg.

Gewilde oorde sluit ondermeer in:

1. Leopard Creek Gholfbaan, deur Gary Player ontwerp
2. Malelaneruskamp in die Krugerwildtuin
3. Marlothpark (landgoed en wildbewaringsgebied)
4. Ngwenya Lodge ('n tyddeeloord)
5. Krokodilbrugruskamp in die Krugerwildtuin

Sytakke

• Bankspruit
• Bumespruit (Krugerwildtuin)
• Elandsrivier, 'n sytak van die Krokodilrivier bekend vir sy baie watervalle, ontspring in die grasvlaktes op die plato van die Drakensberg naby Machadodorp.
• Hartebeesspruit
• Houtbosloop en Devil's Creek, mondings digby Montrosepas op N4.
• Kaaprivier, monding digby N4 langs die Krugerwildtuin met sytakke:
  • Suidkaaprivier en Noordkaaprivier met sy sytak, die Queensrivier.
• Mbiyamitirivier (Krugerwildtuin)
  • sytak: Napispruit (Krugerwildtuin)
• Nelsrivier, ontspring in Long Tompas op die Drakensberge.
• Statsrivier
• Vurhamispruit (Krugerwildtuin)
• Witrivier
  • sytakke: Blinkwaterspruit en Boonsteloop

Eksterne skakels

• Riviere van Suid-Afrika Geargiveer 4 Maart 2016 op Wayback Machine (en)