Kastor en Polluks
![](http://upload.wikimedia.org/wikipedia/commons/thumb/c/c9/Dioscuri%2C_Rome%2C_Capitol.jpg/200px-Dioscuri%2C_Rome%2C_Capitol.jpg)
![](http://upload.wikimedia.org/wikipedia/commons/thumb/8/83/Pollux_Palazzo_Reale.jpg/200px-Pollux_Palazzo_Reale.jpg)
![](http://upload.wikimedia.org/wikipedia/commons/thumb/2/20/Kastor_Niobid_krater_Louvre_G341.jpg/200px-Kastor_Niobid_krater_Louvre_G341.jpg)
Kastor en Polluks (Grieks: Κάστωρ καὶ Πολυδευκής) is tweelingbroers in antieke Griekse en Romeinse verhale wat talle avonture beleef het. Die sterregroep die Tweeling is na hulle genoem.[1] Saam staan hulle as die Dioskuri ("seuns van Zeus") bekend. Hulle was die kinders van Leda. Hulle tweelingsusters was Helena van Troje en Klitemnestra.
Daar is verskillende stories oor die tweeling se herkoms. Die bekendste een is dié van Leda en Zeus. Leda, die vrou van koning Tindareos van Sparta, het 'n verhouding met Zeus, wat haar gereeld in die gedaante van 'n swaan kom opsoek. Danksy hierdie verhouding lê Leda twee eiers, waaruit Kastor en Polluks gebore word. Kastor was die seun van Tindareos en Polluks die seun van Zeus.
Kastor en Polluks was in talle mites en sages van die Griekse wêreld betrokke. Hulle was onder andere metgeselle van Jason in sy soeke na die Goue Vlies. Polluks was 'n uitmuntende bokser en het koning Amukos in 'n boksgeveg verslaan. Amukos wou die Argonoute verhinder om hul reis voort te sit.
Toe Kastor sterf omdat hy ’n sterflike was, het Polluks by sy pa, Zeus, gesmeek dat hy Kastor onsterflik maak. Zeus het dit gedoen deur hulle in die lug te verenig. Die helderste sterre van hierdie sterrebeeld is dan ook Kastor en Polluks. Volgens Romeinse tradisie het hulle van die hemel gekom om die Romeine te help om die stryd teen die Latyne by die Regillus-meer te wen. Daarom is hulle in Rome vereer.
Kastor en Polluks is ook twee berge in die bergmassief van die Monte Rosa op die grens van Italië en Switserland.
Verwysings
[wysig | wysig bron]- ↑ HAT Taal-en-feitegids, Pearson, Desember 2013, ISBN 978-1-77578-243-8
Skakels
[wysig | wysig bron]Wikimedia Commons het meer media in die kategorie Kastor en Polluks.
Hierdie artikel is in sy geheel of gedeeltelik uit die Engelse Wikipedia vertaal.