Ina Garten

Ina Garten, 2006.

Ina Rosenberg Garten, gebore 2 Februarie 1948, is 'n Amerikaanse skrywer en die aanbieder van die Food Network-program Barefoot Contessa en 'n voormalige personeellid van die Withuis se Kantoor vir Bestuur en Begroting.

Garten het haarself kulinêre tegnieke geleer met behulp van kookboeke van Frankryk en Nieu-Engeland. Later het sy staatgemaak op haar eie intuïsie en die terugvoer van vriende en kliënte wat haar gehelp het om haar resepte te verfyn. Haar mentors was hoofsaaklik Eli Zabar, eienaar van Eli's Manhattan en Eli's Bread, asook die TV-aanbieder en skrywer Martha Stewart. Haar kulinêre loopbaan het begin met haar gourmetkoswinkel, Barefoot Contessa; daarna het Garten haar aktiwiteite uitgebrei om verskeie topverkoper kookboeke, tydskrifrubrieke, produkte met haar eie handelsmerk en 'n gewilde Food Network TV-program in te sluit.

Vroeë lewe

Gebore as Ina Rosenberg in 'n Joodse familie in Brooklyn, New York en getoë in Stamford, Connecticut, was Garten een van twee kinders van Charles H. Rosenberg, 'n chirurg wat gespesialiseer het in oor-, neus- en keelkunde, en sy vrou, Florence. Sy was aangemoedig om te presteer op skool en het 'n aanleg vir wetenskap getoon; sy vertel dat sy hierdie wetenskaplike ingesteldheid toepas terwyl sy met resepte eksperimenteer. Garten se ma was 'n intellektueel met 'n belangstelling in opera wat haar dogter se versoeke om haar in die kombuis te help geweier het en haar aangeraai het om op haar skoolwerk te konsentreer. Garten beskryf haar vader as 'n opgewekte individu met baie vriende, en opgemerk dat sy meer eienskappe met hom in gemeen het as met haar ma.

Op 15-jarige ouderdom het sy haar toekomstige man, Jeffrey Garten, ontmoet tydens 'n reis om haar broer by Dartmouth College te besoek. Na hoërskool het sy aan Syracuse Universiteit studeer maar sy het haar studies gestaak en gaan trou.

Loopbaan

Rosenberg en Garten is op 22 Desember 1968 in Stamford getroud en het verhuis na Fort Bragg, Noord-Carolina. Sy het begin kook en onthaal in 'n poging om besig te bly terwyl haar man sy vier jaar militêre diens verrig het tydens die Viëtnam-Oorlog; sy het ook haar vlieënierslisensie verwerf. Na afloop van haar man se militêre diens het die egpaar na Parys, Frankryk gereis vir 'n kampeervakansie – wat Garten beskryf as die geboorte van haar liefde vir Franse kookkuns. Tydens hierdie reis het sy opelugmarkte besoek en vir die eerste keer het sy ervaar hoe om met vars bestanddele te kook. By haar terugkeer na die VSA het sy haar kulinêre vermoëns verbeter deur die volumes van Julia Child se invloedryke kookboek, Mastering the Art of French Cooking, te bestudeer. Haar weeklikse dineetradisie het begin vorm aanneem gedurende hierdie tyd en sy kon haar vaardighede om tuis te onthaal verfyn toe sy en haar man na Washington, D.C. verhuis het in 1972.

In Washington het Garten in die Wit Huis gewerk en sakekursusse geneem by die George Washington Universiteit; sy het 'n MBA verwerf. Garten was oorspronklik in diens geneem as 'n intreevlakassistent, tog het sy die politieke leer geklim na die Kantoor van Bestuur en Begroting. Sy is uiteindelik aangestel as begrotingsontleder, wat behels het dat sy die kernenergie begroting geskryf het, asook beleidsdokumente vir kernkragsentrales tydens Presidente Gerald Ford en Jimmy Carter se ampstermyn.

Ooreis deur die druk van haar werk en die spanningsvolle aard van Washington, het Garten haar weer tot die kookkuns en onthaal gewend, terwyl sy ook huise gekoop, opgeknap en winsgewend verkoop het in die Dupont Circle en Kalorama buurt. Die winste uit hierdie verkope het Garten verder in kookkuns bemagtig.

Barefoot Contessa winkel

Garten het haar regeringspos in 1978 bedank nadat sy 'n advertensie gesien het vir 'n 400-vierkante voet (37 m²) spesialiteitskoswinkel met die naam Barefoot Contessa in Westhampton Strand, New York. "My werk in Washington was intellektueel opwindend en stimulerend, maar dit was glad nie wie ek is nie", het sy vier jaar later verduidelik .

Sy het na New York verhuis om eienaarskap en bestuur oor te neem. Die winkel is benoem deur sy oorspronklike eienaar as 'n huldeblyk aan die 1954 film waarin die hoofrol deur Ava Gardner vertolk is; Garten het die naam behou toe sy oorgeneem het omdat dit goed inskakel by haar idee van 'n "elegante, maar aardse" lewenstyl.

In 1985 het Garten die winkel verskuif na die perseel van gourmetwinkel Dean & DeLuca in die welvarende Long Island dorpie van East Hampton. In teenstelling met Westhampton se strandseisoen atmosfeer, is East Hampton 'n heeljaarse gemeenskap wat 'n groter, ryker demografie as kliëntebasis bied. In East Hampton het Garten die winkel uitgebrei tot meer as sewe keer sy oorspronklike grootte.

Garten het Eli Zabar krediet gegee as die inspirasie vir haar vernaamste manier van kosmaak, soos sy dit stel: "al wat jy hoef te doen, is kook om die bestanddele te beklemtoon."

In 1996, na twee dekades waarin sy die Barefoot Contessa bedryf en bestuur het, was Garten op soek na 'n verandering en sy verkoop die winkel aan twee van haar werknemers, Amy Forst en Parker Hodges. Haar Barefoot Contessa webwerf het 'n hoë-profiel gehandhaaf in hierdie stadium en sy begin ook om koffie en 'n paar ander items aanlyn te bemark.

Barefoot Contessa kookboeke

Garten het in 1999 haar aandag gefokus op publikasies. Sy het voortgebou op die Barefoot Contessa-naam in 1999 met The Barefoot Contessa Cookbook wat 'n onverwagse topverkoper was. Dit het resepte bevat wat haar winkel se sukses verseker het en die boek het beide Garten en haar uitgewer, Clarkson Potter, se verwagtinge ver oortref. Na 'n aanvanklike uitgifte van 35,000 afskrifte, 'n tipiese syfer vir 'n debuutkookboek, is 'n tweede en derde druk onderneem en uiteindelik is meer as 100,000 kopieë verkoop in die eerste jaar. In 2001 het sy gekapitaliseer op haar nuutgevonde roem en Barefoot Contessa Parties! vrygestel, wat ook goeie verkope en resensies ontvang het; sy volg dit op met Barefoot Contessa Family Style in 2002.

Haar kookboeke vermy 'n ensiklopediese formaat, en is geskoei op koffietafelboeke. Dit bevat baie kleurfoto's en 'n volbladfoto by elke resep. Haar kookboeke ontvang steeds goeie resensies en sedert 2008 is meer as ses miljoen kopieë van haar kookboeke verkoop.

Haar nuutste kookboek getiteld "Cooking for Jeffrey" word vrygestel op 25 Oktober 2016.

Barefoot Contessa op Food Network

Garten het haarself gevestig deur middel van haar kookboeke en verskynings op Martha Stewart se TV program; sy het op die voorgrond getree in 2002 met die debuut van haar Food Network program. Na die sukses van The Barefoot Contessa Cookbook is Garten deur "Food Network" genader om haar eie televisieprogram aan te bied. Sy het hierdie voorstel 'n aantal kere verwerp, totdat die Londense produksiemaatskappy wat verantwoordelik is vir Nigella Bites vir die produksie aangestel is. Sy het ingestem om 13 programme vir die seisoen te produseer en die première van Barefoot Contessa in 2002 het 'n positiewe ontvangs gekry.

Barefoot Contessa het ongeveer een miljoen kykers ingeskakel per episode, en het van die Food Network se hoogste graderings aangeteken.

In 2005 was die program genomineer vir 'n Daytime Emmy Award in die kategorie van die Beste Diens Program. In 2009 word die program en Garten weer genomineer vir Daytime Emmy Awards in die kategorieë van die Beste Kulinêre Program en die Beste Kulinêre Gasheer; Garten het haar eerste Emmy in die laasgenoemde kategorie ontvang.

Garten is na bewering die mees winsgewende kontrak aangebied vir 'n kulinêre skrywer tot op datum, met die ondertekening van 'n multimiljoen dollar-ooreenkoms vir verskeie boeke. Sy is verskeie kere genader om haar eie tydskrif, meubels, kookware en boetiekkettingwinkels te ontwikkel, maar sy het al die aanbiedings van die hand gewys. Garten het verklaar dat sy nie belangstel om haar lewe verder te kompliseer nie. Tussen 2004 en 2005 was Barefoot in Paris nommer elf op die New York Times se topverkoperlys.

Barefoot Contessa ander publikasies

Na die goeie verkope van en lof vir haar eerste drie kookboeke het Garten ook Barefoot in Paris geskryf en verskeie rubrieke vir O, The Oprah Magazine. Sy tree ook as onthaalkonsultant vir die tydskrif op. Die tydskrif House Beautiful het tot 2011 'n maandelikse Gartenkolom publiseer getiteld: "Ask the Barefoot Contessa". In hierdie kolom het sy gereageer op briewe van haar lesers en hulle advies aangebied rakende kookkuns, lewenstyl en onthaalkuns.

Persoonlike lewe

Haar man Jeffrey Garten is die Juan Trippe Professor in die Practice of International Trade, Finance and Business by Yale. Hy word ook gereeld op Garten se kosprogram gesien waar hy sy vrou help met eenvoudige take of waar hy die geregte wat sy geskep het beproef. Hulle spandeer hul tyd onderskeidelik in Manhattan, East Hampton, en Parys.

Werke

Boeke

• The Barefoot Contessa Cookbook (1999), Clarkson Potter, ISBN 0-609-60219-5
• Barefoot Contessa Parties! Ideas and Recipes For Easy Parties That Are Really Fun (2001)
• Barefoot Contessa Family Style: Easy Ideas and Recipes That Make Everyone Feel Like Family (2002)
• Barefoot in Paris: Easy French Food You Can Make at Home (2004)
• Barefoot Contessa at Home: Everyday Recipes You'll Make Over and Over Again (2006)
• Barefoot Contessa Back to Basics: Fabulous Flavor from Simple Ingredients Clarkson Potter. 2008. ISBN 978-1-4000-5435-0.
• Barefoot Contessa: How Easy Is That? Clarkson Potter. 2010. ISBN 978-0-307-23876-4.
• Barefoot Contessa: Foolproof: Recipes You Can Trust. Clarkson Potter. 2012. ISBN 0-307-46487-3. OCLC 776519282
• Make It Ahead: A Barefoot Contessa Cookbook. Clarkson Potter. 2014. ISBN 978-0-307-46488-0. OCLC 875771003

Tydskrifrubrieke

• "Entertaining is Fun!" (Martha Stewart Living 1999–hede)
• "Entertaining." (O, The Oprah Magazine 2003–hede)
• "Ask the Barefoot Contessa." (House Beautiful 2006–hede)

Televisie

• From Martha's Kitchen: Ina Garten's Kitchen Clambake (2000)
• Barefoot Contessa (2002–hede)
• Chefography (2006–2010)
• 30 Rock (2010–2011)