Die Hoëpriesteres (tarotkaart)
Die Hoëpriesteres is die tweede troefkaart in pakke Tarotkaarte en die tweede Groot Arcana-kaart in pakke vir waarsêery. In die eerste Tarotpak met inskripsies, die 18de-eeuse Tarot de Marseilles, het dié figuur die pouslike tiara op en word sy Die Pousin genoem, wat 'n moontlike verwysing na pousin Johanna is.
In die skepping van die Rider-Waite-tarotpak is Die Pousin van die speelkaarte verander in die Die Hoëpriesteres van die waarsêerykaarte. Sy dra 'n kroon soortgelyk aan die antieke Egiptiese godin Hathor, en word verder uitgebeeld om soos Maria te lyk. A.E. Waite, die medestigter van die Rider-Waite-pak, het gespekuleer dat die kaart verbind word met die antieke kultus van Astarte of Maria as 'n verteenwooriger van die moedergodin.[1]
Geskiedenis
[wysig | wysig bron]La Papesse
[wysig | wysig bron]Dié tarotkaart is aanvanklike La Papesse, of "Die Pousin", genoem. Sommige van die kaarte het die vrou op die kaart regstreeks met die pousdom verbind deur haar uit te beeld met 'n pouslike kroon. Daar was ook 'n paar moderne weergawes van die Tarot van Marseille wat die sleutels tot die koninkryk ingesluit het, wat 'n tradisionele simbool van die pousdom was.[2] In Protestantste lande van ná die Hervorming is kaarte veral gebruik met beelde van pousin Johanna, wat dit verbind het met die mitologie van hoe Johanna, vermom as 'n man, tot pous verkies is; sy is glo eers uitgevang nadat sy die lewe geskenk het.[3] Dit lyk egter of Italiaanse Katolieke Die Pousin beskou het as verteenwoordigend van die Heilige Moeder Kerk.[4]
Ander variante
[wysig | wysig bron]In die Rider-Waite-tarot, wat deur Pamela Colman Smith geïllustreer is, is Die Pousin verander in Die Hoëpriesteres, met 'n kroon soortgelyk aan dié van Hathor. A.E. Waite het die feit verwerp dat die beeld aanvanklik pousin Johanna uitgebeeld het en het gespekuleer dat dit eintlik met die antieke kultus van Astarte verbind word.[1]
In ander weergawes ná Rider-Waite is sy die Maagd Maria, Isis, ensovoorts. In Switserse Troccaskaarte word sy "Junon" ("Juno"), die Romeinse koningin van die gode, genoem.
Simbolisme
[wysig | wysig bron]Rider-Waite-simbolisme
[wysig | wysig bron]In die Rider-Waite-pak, waarop baie moderne pakke geskoei is, word Die Hoëpriesteres geïdentifiseer as die Sjechina, die vroulike inwonende teenwoordigheid van die goddelike.[5] Sy dra 'n eenvoudige blou rok en sit met haar hande op haar skoot. Sy het 'n sekelmaan aan haar voete en 'n groot kruis op haar bors, die balans tussen die vier elemente: vuur, water, aarde en lug.
Die rol in haar hande, wat deels deur haar mantel verberg word, bevat die letters TORA (wat beteken "goddelike wet"); dit simboliseer die herinnering wat ons in ons dra van die verlede, teenswoordige en toekoms. Sy sit tussen die wit en swart pilaar "J" en "B", vir Jakin en Boas, uit Salomo se Tempel.[6] Die sluier van die tempel is agter haar: dit is geborduur met palmblare (manlik) en granate (vroulik),[7] wat groei aan 'n boom in die vorm van die boom van die lewe.
Verwysings
[wysig | wysig bron]- ↑ 1,0 1,1 Waite, Arthur Edward (Februarie 1926). "The Great Symbols of the Tarot". The Occult Review. 43 (2): 85–86.
- ↑ "The Ultimate Guide to Tarot". The Internet Archive. 7 Januarie 2018. Besoek op 29 September 2019.
- ↑ Andrews, Evan (September 2018). "Who was Pope Joan?". A&E Television Networks. Besoek op 22 April 2021.
- ↑ "The Catholic Church in Rome". pre-Gébelin Tarot History. 27 Februarie 2004. Besoek op 22 Julie 2019.
- ↑ Waite, Arthur Edward (1910). The Pictorial Key to the Tarot. Londen: William Rider & Son. pp. 13, 76–79.
- ↑ 1 Konings 7:21
- ↑ Burke, Juliet (1985). The complete book of tarot. Londen: Pan. p. 35–36. ISBN 9780330289740. OCLC 1029289960.
Skakels
[wysig | wysig bron]
Wikimedia Commons het meer media in die kategorie Die Hoëpriesteres (tarotkaart).
Hierdie artikel is in sy geheel of gedeeltelik uit die Engelse Wikipedia vertaal.
