市場流通度

「你想要呢件貨，就畀 799 文港幣我啦」－現錢嘅市場流通度高，可以攞嚟即時換取各種嘅貨同服務。

市場流通度（英文：market liquidity），又叫市場流動度，係經濟學上成日講到、一樣資產可以有嘅特性。一件資產嘅流通度係指件資產有幾容易－

1. 可以攞去換做現錢（或者第啲資產），而且
2. 同時唔影響佢嘅市場價值，

Liquidity（可以借做粵拼：lik6 kwik1 dit4 ti4）係廣受投資者關注嘅一樣嘢，例如現錢等流通度高嘅資產畀人指係容易受到通脹影響而實際價值跌，所以响做買賣嗰陣，投資者梗要考慮啲資產嘅 liquidity 先做決定。

投資考量

2012 年英倫一地有棟建築物貼咗個 for sale 牌想搵人買－建築物呢種資產 liquidity 唔高，成日要搞一大輪先賣得出。

睇埋：投資、通脹同波動性

想像現錢同屋呢兩種資產：

• 現錢可以話係流通度最高嘅嘢。一個人揸住啲現錢，只要佢夠錢，就基本上實可以攞啲錢換取任何貨同服務（點 1），同時佢買嘢嘅過程唔會搞到佢啲現錢嘅價值無端端變咗（點 2）。
• 相比之下，屋就唔同。一間屋要搵人買，往往要搞好多嘢，例如要同啲買家約時間睇屋，買家睇完屋通常仲會諗一大輪先至做決定－即係話屋難以快速轉做現錢（點 1）；另一方面，如果擁有間屋嘅人真係好急想將間屋轉換做現錢嘅話，佢有得選擇監平監賤賣咗間屋佢，最後用（例如）相當於間屋價值嘅 20% 嘅價賣出－想急住賣咗件資產嘅話，就會搞到佢嘅市場價值出現急劇變化（點 2）。

所以一般認為，同現錢比起嚟，屋係一種流通度低嘅資產。

喺會計同金融等嘅工作當中，流通度係一個廣受關注嘅概念：

• 原則上，一位投資者或者一間企業有必要喺任何時候都或多或少噉揸住啲流通度高嘅資產（例如現錢）－除咗心理上畀人覺得安心啲之外，事實表明咗如果一個人手上揸嘅資產流通度低得滯，佢會容易喺等錢使嗰陣一時之間搵唔到錢週轉；
• 但同時好似現錢等流通度高嘅資產，又成日容易因為通脹而價值跌；

因為噉，從事會計同金融工作嘅人成日都要幫個人或者公司度橋諗（例如）「手上揸幾多現錢最穩陣」同埋「要將幾多手上嘅現錢轉做第啲資產，先至最著數」噉嘅問題。順帶一提，有唔少金融工作者主張，一個人手上嘅高流通度資產，起碼應該要夠佢 3 至 6 個月嘅生活。睇埋應急資金嘅概念。

相關嘅數

内文：流動比率同速動比率

睇埋：會計流通度

無論由實用定學術角度睇，要剖析一樣嘢，就有必要量度樣嘢－即係要搵方法計啲數出嚟，用數值反映研究緊嗰樣事物。响廿一世紀初，流通度相關嘅變數有好多種方法計。

流動比率（current ratio）係最常見嘅流通度相關數字之一，指流動資產同流動負債之間嘅比例，當中

• 一件流動資產係指預期可以喺未來一年內攞到嚟使嘅資產，例如手上嘅現錢或者可以短期內轉到做現錢嘅資產；
• 一件流動負債係指預期要喺未來一年內支付嘅負債；

流動比率條式就係

${\text{Lau dung bei leot}}={\frac {c_{1}}{c_{2}}}$，當中

$c_{1}$ 係流動資產，而 $c_{2}$ 係流動負債。流動比率仲可以進階啲變做速動比率（quick ratio）－速動比率計法同流動比率一樣，唯一分別係 $c_{1}$ 保守啲，淨係包好似現錢呢啲可以近乎即時轉做現錢嘅資產。對於「流動比率同速動比率要幾多先算係好」呢條問題，會計同金融學界可以話係眾說紛紜：一般認為，流動比率最起碼要大過 1 先得，但有啲會計師主張流動比率要高過 2 先至算係穩陣。

亦都要留意，上述嘅式就噉望落好似好簡單噉，但一位會計師要實際噉同間企業計流動比率同速動比率嗰陣，佢要走去查好多有關間企業嘅營運嘅紀錄，而且佢仲要對「邊啲資產係可以快速轉做現錢嘅」有所認識，先至可以得知 $c_{1}$ 同 $c_{2}$ 嘅數值－佢要做嘅工作同用到嘅專業知識，遠遠唔淨只「代啲數入條式度」咁簡單。

睇埋

• 經濟泡沫：有經濟學家主張，一個經濟體「利率低得滯，同時有大量高流通度嘅資產流通」係經濟泡沫形成嘅主因。
• 外匯市場：一種出嗮名流通度高嘅投資。
• 市場結構
• 實際價值

拎

• （英文） Understanding Liquidity and How to Measure It，投資百科講市場流通度嘅概念。