文法體

文法上講嘅體（粵音：tai2；英文：aspect）係一種文法範疇，指緊一句句子講緊嗰件動作點樣喺時間當中延伸，可以想像成「喺講嘢所指嘅嗰一刻時間，件事件發生到去邊一點」——件事件係啱啱開始、仲進行緊抑或係已經搞掂咗？文法體通常係作用喺動詞身上嘅。

基本概念

睇埋：時態、文法範疇同構詞

用廿一世紀初嘅粵語做例，粵語起碼有進行式（件事件進行到半路）同埋完成式（件事件已經完結）呢兩種文法體：

進行式例句：「我洗緊衫。」「我游緊水。」「我飲緊茶。」

完成式例句：「我洗咗衫。」「我游咗水。」「我飲咗茶。」

—緊gan2係表示「進行中」噉嘅意思，而咗zo2就係表示「已經完成」噉嘅意思。

廿一世紀初嘅中文書面語（文法上基於普通話）都有類似嘅嘢，例如正在（進行中；通常擺喺動詞前面）同埋了（已完成；傾向擺句子尾）等。

釐清概念

時態呢個概念同文法體好相似，成日畀人攞嚟同文法體一齊講。一般認為，文法體講嘅係一件事件嘅「發生到去邊一點」，而時態講緊嘅就係「敘述緊嘅事件嘅時間」同「講嘢嗰刻嘅時間」之間嘅關係。文法體同時態都係涉及到一句說話指嗰件事件嘅時間特性，傾向施加喺動詞嗰度。

喺日常用語當中，啲人好多時都當咗文法體同時態都係時態概念嘅一部份 。不過喺嚴格嘅語言學上，文法體同時態係兩個唔同嘅概念。用粵語嚟想像嘅話：

	過去	現在	將來
進行式	琴日呢個時間，我做緊嘢。	我依家做緊嘢。	聽日三點，我應該做緊嘢。
完成式	琴日呢個時間，我到咗廣州。	我已經到咗廣州。	聽日三點，我應該到咗廣州。

分析方法

語言學家要分析一隻語言點樣表達時間資訊，不時會出現爭拗，可能會（例如）有一部份語言學家主張手上嗰隻語言嘅某啲文法變化雖然被稱為「時態」，但係佢哋睇勻一大堆嗰隻語言嘅語句，發覺嗰啲文法變化比較似係標示緊「一件事件係咪完結咗」，所以應該當係文法體至啱。

睇埋

• 句尾助詞：粵語同好多東亞、東南亞嘅語言都有豐富嘅句尾助詞，句尾助詞成日會標示文法體方面嘅資訊，例子可以睇吓粵語嘅喇（laa3）。
• 詞形變化：文法體方面嘅變化，成日會引致詞形變化。

外拎

• （英文） 時態與體，史丹福哲學百科全書

參考

註解：

篇文提咗嘅重要詞彙，英文版本如下：

篇文引用咗以下嘅學術文獻同埋網頁：