大元
![](http://upload.wikimedia.org/wikipedia/commons/thumb/c/c1/Yuan_Dynasty_1294.png/220px-Yuan_Dynasty_1294.png)
大元,漢族史學家會叫佢做元朝,歸類為中國史上一朝。該國由蒙古族阿頭忽必烈響1271年立國,並響1279年滅咗南宋。元朝領土西到新疆,南到緬甸同越南北部,東到鄂霍次克海,北到貝加爾湖。1368年,元朝俾朱元璋嘅明朝趕出中原,1402年冇埋個國號。
國號
[編輯]「大元」國號出自《易經·乾卦》「大哉乾元,萬物資始,乃統天」。大元係中國史上頭一個將「大」字放落正式國號入面嘅大一統王朝,除咗之前只統治華北地區嘅大遼同大金之外,其他各朝嘅「大」字(譬如「大唐」)都係尊稱,唔算正式國號。
喺蒙古話裏面,呢個國家嘅國號係「大元大蒙古國(蒙古文:Дай Өнь Их Монгол Улс)「大元國」(蒙古文:Дай Өнь Улс)或者被叫做「大元嘅大蒙古國」(蒙古文:Дай Өнь хэмэх Их Монгол Улс)。
歷史
[編輯]元朝嘅歷史係可以追溯到成吉思汗嗰時。嗰個時候蒙古人勢力越嚟越大,之後消滅咗金國,重三次西征,一度走到東歐。於是乎就出咗一個橫跨歐亞嘅大帝國,係人類史上最大。
之不過由於範圍太大,後尾元朝能夠控制到嘅就剩低東亞一帶。元朝喺1279年消滅咗南宋,重三度出兵日本同攻打真臘(柬埔寨)、爪哇,之不過都失敗咗。
由於元朝要管嘅民族好多,所以種族之間嘅問題一直困擾住元朝。忽必烈最初起用劉秉忠、許衡、姚樞等等漢族人,之但係好多外族人唔服,所以又用咗阿合馬同桑哥呢啲外族人。呢兩個人專門整頓財政,但佢哋都因為得罪咗漢人,而俾漢人陷害而死[1]。
元朝喺忽必烈過身之後越嚟越亂,差唔多個個皇帝都短命,而每一次新皇帝登基都有權力鬥爭。1368年江南一帶民變多多,中央同地方都有內鬥,最後元朝俾朱元璋嘅明朝趕出中原。
經濟
[編輯]元朝嘅農業產量已經有好大進展。好似棉花就係喺元朝嗰陣傳入嚟中國,重開始廣泛種植。由於蒙古人傳統上以畜牧為主,經濟單一,成日需要商品交換,所以元朝都好重視商業。嗰陣時元朝延續南宋嘅紙幣流通制度,係中國歷史上第二個完全以紙幣作為流通貨幣嘅朝代,比歐洲早400幾年。
文化
[編輯]元朝興元曲,主要代表人物有關漢卿、白樸、馬致遠同鄭光祖,佢哋四人合稱「元曲四大家」。
元朝以藏傳佛教為國教,其餘宗教有木速蠻教,也里可溫教,喇嘛教。秘密宗教有明教同白蓮教。
科學方面,元朝最出名嘅科學家係郭守敬。
參考
[編輯]- ↑ 《中國大歷史》第十三章,黃仁宇著