碼頭

碼頭，船靠岸，上落人貨之處，會有一啲建設，方便人貨。

釋名

舊日碼頭寫做馬頭，只係眾名之一，異字異名繁多，各鄉各例，難以盡錄。單字如步、埗、埔、埠、渡、津，按形亦有橋、棧、堤，亦附有「頭」字，如馬頭、碼頭、步頭、埗頭、埠頭、渡頭。亦有其他如灣泊之所、泊船之地。

廣東地方，起石堤，伸入水中，香港地名有埗，就屬依種，如九龍深水埗，大澳石仔埗。所以唐人多用埗，埗頭，到埗，抵埗。查實個埗字本身，就係埠。埠有唔少俗寫，埗、步、埔都係，有船上落嘅城，都可泛稱埠，如舊金山大埠，有時甚至與城同義，如華埠。

英文碼頭並無總名，碼頭之義附帶特性。quay，岸邊碼頭；pier，伸入水中，多數用椿；wharf，可以綁纜泊船，有平地上落人貨；jetty，伸入海中細碼頭，有時係堤。英文由於各地各例，義有擴大縮細轉移，有時定義會互相矛盾，互相重疊。