輪椅
輪椅係一種有轆嘅椅,用嚟代替行路嘅輔助器材[1],主要係畀啲因為雙腳有問題而行動唔方便嘅人、殘疾人士、病人、受傷嘅人或者身體差嘅老人家而設,輪椅亦方便照顧佢哋嘅人,幫助佢哋可以進行身體鍛煉同參與社會活動。
![](http://upload.wikimedia.org/wikipedia/commons/thumb/7/79/WheelchairSeatingNTSB.jpg/220px-WheelchairSeatingNTSB.jpg)
![](http://upload.wikimedia.org/wikipedia/commons/thumb/9/9f/Blue_and_black_wheelchair_from_Chinese_restaurant_in_Yuen_Long.jpg/220px-Blue_and_black_wheelchair_from_Chinese_restaurant_in_Yuen_Long.jpg)
輪椅可以分為手動輪椅同電動輪椅兩大類。手動輪椅當中又分為自力型同輔助型兩種,自力型後轆比較大同埋外側設有手輪圈,輪椅可以由坐嘅人自己推動或者由其他人推動;輔助型後轆比較細,輪椅只能夠由其他人推動。
電動輪椅係喺手推輪椅嘅基礎上,加上電池、摩打同控制器。電動輪椅一般會比較重,係因為除咗電池、摩打同控制器外,支架、輪胎及軚軨都要加強,以承受更重嘅力量。
過去嘅電動輪椅用鉛酸電池,到最近會用鋰電池;由非常重嘅有刷摩打,到最近嘅無刷摩打。隨住時代嘅轉變,電動輪椅亦都會變得越嚟越輕[2]。
手動輪椅基本技巧
編輯打開輪椅
編輯- 雙手放喺輪椅座位左右兩邊支架
- 手指向內同向下壓,打開輪椅座位
摺埋輪椅
編輯- 收起腳踏
- 拎住輪椅座位中間,向上拉
- 摺埋輪椅
- 如果要搬運輪椅,要揸住穩固嘅支架
輪椅上嘅坐姿
編輯- 身體挺直,背脊貼近輪椅背面
- 雙腳放喺腳踏上面
- 雙手放喺大脾上面
- 手踭放喺兩邊扶手之內
- 扣好安全帶
- 留意坐輪椅嘅人係咪坐得平穩同舒適(安全帶唔好太緊或者太鬆)
- 檢查衣物或其他物件有冇阻住後轆
推輪椅嘅注意事項
編輯- 推動輪椅要保持平穩嘅速度,減少對坐輪椅者嘅震盪,唔好太快或者急速轉彎
- 留意路上嘅障礙物同路面不平
- 停低嗰陣要鎖上輪椅嘅鎖掣
- 成斜線推過坑渠蓋,可以避免車轆跌入坑渠隙
- 上落斜同上落石級之前最好先通知坐輪椅者作好準備
上斜坡
編輯- 企喺輪椅使用者後面,手揸住推柄,雙腳前後企穩,前膝微屈,重心喺前腳
- 保持腰部挺直,利用下肢發力將輪椅推前(提醒輪椅使用者重心向前,以免輪椅向後跌)
落斜坡
編輯要注意輪椅要倒後行,因為落斜坡向前會有危險
- 背向斜坡,企喺輪椅使用者後面,手揸住推柄,雙腳前後企穩,前膝微屈,重心喺前腳
- 保持腰部挺直,慢慢噉將輪椅向後行(間唔中要向後望,留意路面情況)
上石級
編輯- 將輪椅推向石級邊
- 手揸住輪椅推柄向下壓
- 一隻腳踏傾後桿,將輪椅後傾,前轆先上石級
- 將腳放返落地,捉實輪椅推柄
- 保持腰部挺直,下肢發力將輪椅拉起,同時將輪椅向前推
落石級
編輯要注意輪椅一定要倒後落,向前落對坐輪椅者係非常危險
- 推輪椅者保持腰部挺直
- 將輪椅背向石級
- 後轆貼近石級邊
- 保持腰部挺直,下身可以緊貼輪椅背借力,將後轆拉後落級
- 前轆貼近石級邊
- 同樣腰部挺直,將前輪拉後落級