內隱知識

內隱知識（粵拼：noi6 jan2 zi3 sik1 | 英文：tacit knowledge）係指難以用文字或者語言講出嚟嘅知識—「我一路都能夠成功做出呢種行為，但係不嬲都係做咗出嚟都唔覺」。呢種知識相對於外顯知識。

幾樣一般俾人覺得係展現咗內隱知識嘅行為：

• 左上：講嘢；右上：踩單車；
• 左下：玩樂器；右下：跳舞。

概論

睇埋：知識、外顯知識同母語

舉幾個例說明，以下呢啲日常生活成日見到嘅活動，都俾人指係展現咗內隱知識：

• 講嘢：是但攞個正常嘅大人，佢都明顯識得講嘢，但一般嚟講（假設嗰個人唔係語言學家等嘅專業人士），嗰個人唔會答到佢喺講嘢嗰陣「個口同條聲帶要點樣郁」；
• 踩單車：是但攞個踩單車踩到咁上下熟腳嘅人，佢明顯能夠做到踩單車嗰時保持平衡，但一旦佢熟到咁上下，就會開始自動唔諗噉樣做嗰啲動作，唔會有意識噉諗或者能夠答「每次踩腳踏嗰陣要用幾多力」等嘅問題；
• 玩樂器：是但搵個玩樂器玩到有返咁上下熟手嘅人，佢能夠用件樂器做演奏，但一旦熟到咁上下，佢就會開始自動唔諗噉樣做嗰啲動作，唔會有意識噉諗「跟住落嚟隻手指要移去邊個位」等嘅問題；

喺知識管理等嘅工作上，內隱知識呢個課題相當受重視。對於管理者嚟講，佢哋好多時都會想啲員工有效噉交流彼此嘅知識，但內隱知識嘅現象表示，有好多重要嘅知識都難以用口講出嚟。於是唔少管理同認知心理學方面嘅工作者都對「點樣教人講返啲內隱知識出嚟」等嘅問題有所著墨。

睇埋

• 語言習得，要學識用一隻語言要學大量嘅內隱知識。
• 過程知識，大致上係內隱知識喺哲學知識論入面嘅對應。
• 專家知識
• 習慣
• 決策

文獻

• Smith, E. A. (2001). The role of tacit and explicit knowledge in the workplace. Journal of Knowledge Management. Vol. 5(4), pp. 311-321.