先知

先知係一個喺好多領域，尤其係多種宗教入面成日用嘅概念，指能夠同神交流並且可以預見未來嘅人，佢哋亦會將呢尐事話畀人聽^[1]^[2]，呢尐信息叫做預言。喺唔同宗教嘅信仰入便，對先知嘅認同並非全然一致。

不同宗教嘅表述

巫覡宗敎、基督教等宗教都有呢個概念。先知對未來嘅描述來自神，呢點同占卜唔同。伊斯蘭教入面嘅先知指安拉派遣到世界嘅多位使者，有列舉佢個名嘅先知有廿五個^[3]，但相信歷代各個民族都有安拉所派遣嘅先知或者使者。其中最後一位派遣畀全人類嘅使者係穆罕默德——（求真主賜佢哋全體平安）。

基督教同埋猶太教嘅文獻入面，亦都出現咗好多有關先知嘅闡述。雖然其中好多係對同未來嘅預見，但係更多嘅係借助於先知個口，闡述上帝所制定嘅社會原則同教義原則。基督教入面，先知又叫先見，呢個名更顯出基督教入面嘅先知係更早睇到底某尐未發生嘅事，而並非每一件事都可以預知。

猶太教徒以及後來嘅基督徒同穆斯林都承認亞伯拉罕（易卜拉欣）、摩西（穆薩）呢兩位舊約人物係先知；呢三種宗教被稱為亞伯拉罕諸教。

支持三位一體嘅基督教主流教派認為耶穌係上帝嘅獨生仔，不單只係先知，而且亦都係神。伊斯蘭教承認耶穌（爾撒）同埋摩西、穆罕默德一樣，都係先知，而猶太教就認為耶穌唔單只唔係神，亦都唔係先知。