詩經
《詩經》，原名《詩》，係中國最早嘅詩集。《詩經》現存詩305首（另外重有6篇係得個名而內容冇料到，所謂有目無辭，稱為笙詩），又叫《詩三百》。從漢起，儒家將佢奉為經典，嗰陣時開始就叫《詩經》。漢朝毛亨、毛萇曾註釋《詩經》，因此呢個版本嘅詩又叫《毛詩》。《詩經》入面嘅作者絕大部分已經唔知係咩頭咩路。
史
成書
《詩經》中最早嘅詩，大概喺西周初期寫好，根據《尚書》所講，《豳風‧鴟鴞》係周公姬旦所作。最遲嘅作品喺春秋時期中寫，據鄭玄《詩譜序》，係《陳風‧株林》，跨越大概600年。
有關收集同埋編選《詩經》嘅記載，有『王官采詩』同埋『孔子刪詩』嘅講法︰
- 孔子刪詩
- 呢種講法見於《史記》，據講原本有3000篇古詩，孔子根據禮義嘅標準編選其中300篇，整理出《詩經》。之不過，呢種講法靠唔住。《左傳》中記載孔子未到10歲就有定型嘅《詩經》。家下通常認為《詩經》為各諸侯國協助周朝朝廷採集，之後由史官同埋樂師編纂整理而成。孔子亦有參與呢個整理嘅過程。
焚書
秦王政下令焚書，《詩》曾經消失於中土，討只存響記憶之中。秦亡漢起時，《詩》𩂇𩂇碎碎又畀人拎返出來。有啲係記憶抄寫，有啲係響舊宅度牆裏便搵到。最後經學者集合成書。漢尊崇儒家，將《詩》升到經嘅層次，所以叫《詩經》，是為《五經》之一。
四書五經
大宋理學家朱熹，重新審訂《詩經》，係《四書五經》一部份。
體例分類
關於《詩經》中詩嘅分類，有『四始六義』之說。『四始』指《風》、《大雅》、《小雅》、《頌》嘅四篇列首位嘅詩。『六義』就指『風、雅、頌，賦、比、興』。『風、雅、頌』係按唔同音樂同《詩經》分類，『賦、比、興』係《詩經》嘅表現手法。
風、雅、頌
《風》又稱《國風》，一共有15組，《風》本來係樂曲嘅統稱。15組國風並唔係15個國家嘅樂曲，而係十幾個地區嘅樂曲。國風包括周南、召南、邶、鄘、衛、王、鄭、檜、齊、魏、唐、秦、豳、陳、曹嘅樂歌，共160篇。國風係當時當地流行嘅歌曲，帶有地方色彩。從內容上講，大多數係民歌。作者大多係民間歌手，但亦有個別貴族。
對於《雅》嘅認識有各種唔同嘅觀點。一種觀點認為係指周朝直接統治地區嘅音樂，【雅】有【正】嘅意思，將這種音樂睇作【正聲】，意在表明同其他地方音樂嘅區別。亦有人話【雅】同【夏】相通，夏係周朝直接統治地區嘅稱呼。重有觀點認為，《雅》係指人人都明嘅典雅音樂。《雅》共105篇，分為《大雅》31篇同埋《小雅》74篇。《雅》多數係朝廷官吏同埋公卿大夫嘅作品，有一小部分係民歌。內容幾乎都係關於政治方面嘅，有讚頌好人好政嘅，有諷刺弊政嘅。只有幾首表達個人感情嘅詩。但係冇情詩。
《頌》係貴族喺家廟中祭祀鬼神、讚美治者功德嘅樂曲，演奏時要配以舞蹈。又分為《周頌》、《魯頌》同埋《商頌》，共40篇。其中《周頌》31篇，認為可能係西周時嘅作品、多數喺周昭王、周穆王時代之前寫；《魯頌》4篇，認為可能係魯僖公時嘅作品；《商頌》就被認為係春秋以前宋國嘅作品。
賦、比、興
『賦、比、興』係詩嘅表現手法。【賦】係直陳其事，描述一件事嘅經過。【比】係比喻，用一個嘢，比喻另一樣嘢。【興】係從一樣嘢，聯想去另外一樣嘢。
序
序分為《大序》同《小序》。大序相信係詩經一部份，而小序係後加嘅解詩，又叫毛詩序。
大序相傳係子夏所作，但亦有人唔同意咁講。
毛詩序
西漢初年，傳授詩經嘅主要有四家。一係魯國人申公，一係齊國人轅固，一係燕國人韓嬰。但係呢三家著作除咗《韓詩外傳》，都已經唔喺度。另外一家係毛詩，即大毛公毛亨、小毛公毛萇所傳。現存嘅毛詩每篇都有一個題解，叫做「小序」。佢嘅作者大部分已不可考。而家一般都認為解說文字除少數幾篇可信以外，大部分都唔可信。但係毛詩序對後人嘅影響非常大。古人做詩、寫文章用典都鍾意用入面嘅解釋。
詩目
風
《周南》講嘅係東周時洛邑以南，由周天子直接管嘅地方。計有《關雎》、《葛覃》、《卷耳》、《樛木》、《螽斯》、《桃夭》、《兔罝》、《芣苢》、《漢廣》、《汝墳》、《麟之趾》。
《召南》講嘅係洛邑以西召國以南，由召公管嘅地方。計有《鵲巢》、《采蘩》、《草蟲》、《采蘋》、《甘棠》、《行露》、《羔羊》、《殷其靁》、《摽有梅》、《小星》、《江有汜》、《野有死麕》、《何彼襛矣》、《騶虞》。
《邶風》（邶讀背）講嘅係邶國，係衞國所管嘅地方。查實三監之亂再分封，邶地一早拼入衞。而《邶風》內容都係講衞，所以歷代都唔明點解要分出來，重排響《衞風》之前。《邶風》計有詩十九首，分別係《柏舟》、《綠衣》、《燕燕》、《日月》、《終風》、《擊鼓》、《凱風》、《雄雉》、《匏有苦葉》、《谷風》、《式微》、《旄丘》、《簡兮》、《泉水》、《北門》、《北風》、《靜女》、《新臺》、《二子乘舟》。
《鄘風》（鄘讀庸）講嘅係鄘國，係衞國所管嘅地方。查實三監之亂再分封，鄘地一早拼入衞。而《鄘風》內容都係講衞，所以歷代都唔明點解要分出來，重排響《衞風》之前。《鄘風》計有詩十首，分別係《柏舟》、《牆有茨》、《君子偕老》、《桑中》、《鶉之奔奔》、《定之方中》、《蝃蝀》、《相鼠》、《干旄》、《載馳》。
《衞風》有《淇奧》、《考槃》、《碩人》、《氓》、《竹竿》、《芄蘭》、《河廣》、《伯兮》、《有狐》、《木瓜》。
《王風》有《黍離》、《君子于役》、《君子陽陽》、《揚之水》、《中谷有蓷》、《兔爰》、《葛藟》、《采葛》、《大車》、《丘中有麻》。
《鄭風》有《緇衣》、《將仲子》、《叔于田》、《大叔于田》、《清人》、《羔裘》、《遵大路》、《女曰鷄鳴》、《有女同車》、《山有扶蘇》、《蘀兮》、《狡童》、《褰裳》、《丰》、《東門之墠》、《風雨》、《子衿》、《揚之水》、《出其東門》、《野有蔓草》、《溱洧》。
《齊風》有《雞鳴》、《還》、《著》、《東方之日》、《東方未明》、《南山》、《甫田》、《盧令》、《敝笱》、《載驅》、《猗嗟》。
《魏風》有《葛屨》、《汾沮洳》、《園有桃》、《陟岵》、《十畝之間》、《伐檀》、《碩鼠》。
《唐風》有《蟋蟀》、《山有樞》、《揚之水》、《椒聊》、《綢繆》、《杕杜》、《羔裘》、《鴇羽》、《無衣》、《有杕之杜》、《葛生》、《采苓》。
《秦風》有《車鄰》、《駟驖》、《小戎》、《蒹葭》、《終南》、《黃鳥》、《晨風》、《無衣》、《渭陽》、《權輿》。
《陳風》有《宛丘》、《東門之枌》、《衡門》、《東門之池》、《東門之楊》、《墓門》、《防有鵲巢》、《月出》、《株林》、《澤陂》。
《檜風》（檜讀潰）有《羔裘》、《素冠》、《隰有萇楚》、《匪風》。
《豳風》（豳讀濱）有《七月》、《鴟鴞》、《東山》、《破斧》、《伐柯》、《九罭》、《狼跋》。
小雅
《小雅》約莫十首一組，以第一首為目，目叫某某之什。當中《南陔》、《白華》、《華黍》三篇未搵得返。
《鹿鳴之什》有《鹿鳴》、《四牡》、《皇皇者華》、《常棣》、《伐木》、《天保》、《采薇》、《出車》、《杕杜》、《南陔》。十首之中，《南陔》己佚。
《白華之什》有《白華》、《華黍》、《魚麗》、《由庚》、《南有嘉魚》、《崇丘》、《南山有臺》、《由儀》、《蓼蕭》、《湛露》。十首之中，《白華》、《華黍》兩首己佚。
《彤弓之什》有《彤弓》、《菁菁者莪》、《六月》、《采芑》、《車攻》、《吉日》、《鴻鴈》、《庭燎》、《沔水》、《鶴鳴》。
《祈父之什》有《祈父》、《白駒》、《黃鳥》、《我行其野》、《斯干》、《無羊》、《節南山》、《正月》、《十月之交》、《雨無正》。
《小旻之什》有《小旻》、《小宛》、《小弁》、《巧言》、《何人斯》、《巷伯》、《谷風》、《蓼莪》、《大東》、《四月》。
《北山之什》有《北山》、《無將大車》、《小明》、《鼓鍾》、《楚茨》、《信南山》、《甫田》、《大田》、《瞻彼洛矣》、《裳裳者華》。
《桑扈之什》有《桑扈》、《鴛鴦》、《頍弁》、《車舝》、《青蠅》、《賓之初筵》、《魚藻》、《采菽》、《角弓》、《菀柳》。
《都人士之什》有《都人士》、《采綠》、《黍苗》、《隰桑》、《白華》、《緜蠻》、《瓠葉》、《漸漸之石》、《苕之華》、《何草不黃》。
大雅
大雅約莫十首一組，以第一首為目，目叫某某之什。
《文王之什》有《文王》、《大明》、《緜》、《棫樸》、《旱麓》、《思齊》、《皇矣》、《靈臺》、《下武》、《文王有聲》。
《生民之什》有《生民》、《行葦》、《既醉》、《鳬鷖》、《假樂》、《公劉》、《泂酌》、《卷阿》、《民勞》、《板》。
《蕩之什》有《蕩》、《抑》、《桑柔》、《雲漢》、《崧高》、《烝民》、《韓奕》、《江漢》、《常武》、《瞻卬》、《召旻》。
周頌
清廟之什 《清廟》、《維天之命》、《維清》、《烈文》、《天作》、《昊天有成命》、《我將》、《時邁》、《執競》、《思文》。
臣工之什 《臣工》、《噫嘻》、《振鷺》、《豐年》、《有瞽》、《潛》、《雝》、《載見》、《有客》、《武》。
閔予小子之什 《閔予小子》、《訪落》、《敬之》、《小毖》、《載芟》、《良耜》、《絲衣》、《酌》、《桓》、《賚》、《般》。
魯頌
商頌
評價同影響
《詩經》深深影響中國嘅文學、語言、思想、政治。
孔子好鍾意《詩經》，話：「詩三百，一言以蔽之，思無邪」、「溫柔敦厚，詩教也」（即以為讀詩可澄清心靈，係最佳教化工具）、甚至「不學詩，無以言」。孔子認為，研讀詩可以培養聯想力，提高觀察力，學習諷刺；詩中嘅道理可以用嚟侍奉父母，服侍君主，從而做到齊家，治國，平天下。
喺古代，《詩經》重有政治用途。春秋各國外交嗰陣，經常借唱詩或奏詩嚟表達一啲唔想講或者係想講又講唔出口嘅話，或者講咗出嚟會傷害到人嘅嘢，類似現今嘅外交辭令。
詩經係中國現實文學嘅先河。
現今有人研究詩經嚟比較古今音韻，發掘上古歷史。古今研究《詩經》嘅著述多到數都數唔晒。
參考
- 楊伯峻，淺談《詩經》，中國古代文化史講座，廣西師範大學出版社，2003年，ISBN 7-5633-3938-8
出面網頁