ქოძირით წყუ ხასჷლაშო მაიაშ ცივილიზაცია

{{გიშნაგორა}}
{{მაიათ}}
[[ფაილი:Uxmal, Nunnery Quadrangle.jpg |250px|thumbnail|[[უშმალი]]]]
[[ფაილი:Piedrasnegrastrono.jpg |250px|thumbnail|ომაფე ხვისტა პიედრას–ნეგრასიშე]]
'''მაიაშ ცივილიზაცია''' — მესოამერიკული ცივილიზაცია, ნამუთ ჩინებული რე თე ცივილიზაციეფ შქას არძოშე გოვითარაფილ დო ხალიწერ [[მაიაშ ჭარალუა|ჭარალუათ]], თაშინეშე [[მაიაშ ხელუანობა|ხელუანობათ]], [[მაიაშ არქიტექტურა|არქიტექტურათ]], მერეთი კაბეტი [[მათემატიკა|მათემატიკური]] დო [[ასტრონომია|ასტრონომიული]] რჩქინათ. თიშ უმუკუჯინუო, ნამჷ-და ცივილიზაცია სქიდუდჷ პრეკლასიკურ პერიოდისჷნ, გოვითარაფაშ კონკას მიოჭირინდუ კლასიკურ პერიოდის (დოხოლ. ჩქ. წ. 250-900 წწ.) დო აგჷნძორენდჷ სქილადას პოსტკლასიკურ პერიოდის, [[ესპანარეფი|ესპანარეფიშით]] [[იუკატანიშ ჩქონი]]შ ეჭოფუაშახ. გოვითარაფაშ აპოგეას მაია წჷმარინუანდჷ ართ-ართი არძოშე წირილი კულტურაშ მაღვენჯ, მეჭედას დოხორინელ ჯარალუას. 

მაიაშ ჯარალუა დო მესოამერიკაშ შხვა ცივილიზაციეფ შქას რდჷ გარკვიული კულტურული დო რელიგიური გვენა. ჭარალუაშ, ეპიგრაფიაშ, კალენდარიშ აკოდგინა ვა შილებე ედომუშამო მაიას მივოჭარათჷნ, თინეფქ მაღალ დონეშა დამუშუეს და საჩემაროთ დოხალიწეს თინეფი. მაიაშ რეგიონი ფართობით არძოშე უკაბეტაში რე [[მესოამერიკა]]ს, სიერა-მადრეშ გვალამ მუხურშე მოჸუნაფილი — ოორუე იუკატანიშ რზენეფშახ, მორო თე ცივილიზაციაშ გულაშ სფერო ოჭირინუანდჷ ცენტრალურ [[მექსიკა]]შახ, გოხოლუას დვალირ არანეფს იგინაფუაფუ მაიაშ ხელუანობაშ დო არქიტექტურაშ გულა მუთ გჷშაჭანაფილი ოკო ორდას მუჭოთ ვაჭრუათ, თეშინეშეს გალენ ტერიტორიეფიშ ეჭოფუეფით. მაიაშ კათა დღას ვა „გონქირაფე“ - ვართ კლასიკურ პერიოდიშ ბოლოს, ვართ ესპანარეფიშით იუკატანიშ ეჭოფუაშ დო კოლონიზაციაშ პერიოდის. [[მექსიკა|მექსიკაშ]] დო [[ბელიზი]]შ ტერიტორიას მორჩილ ხორუეფით ამუდღა ხოლო ოხორანს კათა, ნამუეფიშ ნინა, რწუმა-წჷმორინაფეფი, ადათეფი ოდო ანგარია ხოლო 2000 წანაშ მეძენას  ვა თირელე. [[მაიაშ ნინეფი|ნინა]] ორხველჷ მაია-კიჩეშ ნინეფიშ ფანიას. ნორთის უჩქჷ [[ესპანური ნინა|ესპანურით]]. რელიგიათ ფორმალურო [[კათოლიციზმი|კათოლიკეეფი]] რენა, ფაქტობურო ეთმისქილიდუანა წოხოლენქირსიანულ რწუმეფიშ მუკნასქილედეფს. ალმახანურ მაიაშ ჯინჯიერ საქვარუა რე დიხასაქვარუა.

== გეოგრაფიული ორენი ==

[[ფაილი:Mayamap.png|250px|thumbnail|მაიაშ არანი]]

მაიაშ ცივილიზაციაშ გეოგრაფიული არანი, ჩინებული „მაიაშ რეგიონიშ“ (არანიშ) ჯოხოდვალათ, ფორჷნს [[მექსიკა|მექსიკაშ]] ობჟათე შტატეფს: [[ჩიაპასი (შტატი)|ჩიაპასი]], [[ტაბასკო (შტატი)|ტაბასკო]] დო [[იუკატანიშ ჩქონი]]შ შტატეფს: [[კინტანა-როო (შტატი)|კინტანა-როო]], [[კამპეჩე (შტატი)|კამპეჩე]] დო [[იუკატანი (შტატი)|იუკატანი]]. მაიაშ არანი ოჭირინდუანს [[ცენტრალური ამერიკა|ცენტრალურ ამერიკაშ]] ოორუე რეგიონშახ, [[გვატემალა]], [[ბელიზი]], [[სალვადორი]] დო ბჟადალ [[ჰონდურასი]].

მუჭოთ ფართობით არძოშე კაბეტის მესოამერიკასჷნ, მაიაშ რეგიონს უკებჷ ფართო არანი მოჸუნაფილ [[სიერა-მადრე]]შ გვალონაშე ოორუე იუკატანიშ გვერდოსქჷრე [[რზენი|რზენეფშახ]]. [[კლიმატი]] მაიაშ რეგიონს საჩემაროთ მარყე რე. ობჟათე არანეფს შხირი რე [[წალიკონი]], [[ტროპიკული შტორმი]], მუთ [[კარიბიშ ზუღა|კარიბიშ ზუღაპიჯიშო]] რე დჷმახასიათაფალი.

მაიაშ რეგიონი პიჯალურო 3 ზონათ ირთუ - ობჟათე [[ზუკი|ზუკეფი]], ობჟათე (ვარ-და ცენტრალური) რზენეფი დო ოორუე რზენეფი. ობჟათე ზუკეფი ფორჷნს გვატემალაშ დო [[ჩიაპასი]]შ კურზულე ტერიტორიეფს,  ოდო ობჟათე რზენეფი თე კურზულეფიშ ოორუეშე იდვალუაფუ დო ფორჷნს: კამპეჩეს, კინტანა-როოს, ოორუე [[გვატემალა|გვატემალაშ]] ტერიტორიეფს, თაშინეშე ბელიზის, სალვადორს. მაიაშ არანიშ ოორუე რზენეფი ფორჷნს იუკატანიშ ჩქონიშ დოსქილადირ ტერიტორიას [[პუკი]]შ სუკიეფიშ მეკოროცხილო.

== ისტორია ==
[[ფაილი:Caana Caracol.jpg|მინი|250პქ|140 ფუტიანი „კაანა“]]
მენცარეფქ ისტორიული გოვითარაფაშ თენერი ჯაჭვი „გაკანწყის“: დოხოლაფირო 10 000 წანაშ წოხოლე, მუჟამც მითუ ეკონია [[გოჸინუალა|გოჸინუალაშ]] პერიოდიქჷნ, ადამიერეფქ [[ამერიკა|ამერიკაშ კონტინენტშა]] ოორუეშე ობჟათეჸურე ეყარეს. გეჸვენჯი 6 000 წანაშ განწხანს თინეფქ ქჷდიგურეს [[დიხასაქვარუა]], მარენჯულ რინა. 

მაიაშ ცივილიზაციაშ თუდონი ქრონოლოგიურ სანძღოთ მირჩქინანა ჩქინ ერაშახ II ვითოშწანურას, ნამუთინეშა III ვითოშწანურასჷთ, ოდო ჟინი თანჯათ ახ. წ. X ოშწანურას. თე ცივილიზაციაშ გოპეულუაშ ხანა მოურს ახ. წ. VII-VIII ოშწანურეფშა. ახ. წ. დოხოლაფირო 900 წანას დიჭყჷ მაიაშ ცივილიზაციაშ ბჟაშ დინოსვანჯაფაქ: ორთაშობურ რესურსეფქ გჷმიფიტჷ დო ვარი, ურცხო ტომეფქ მუშეჭკირესჷნ, მითინს ვა უჩქჷ, მარა ნოღეფქ დიჩოლჷ დო მაიაშ ცივილიზაციაქ [[იუკატანიშ ჩქონი|იუკატანიშ ჩქონშა]] გჷნილჷ. მარა სახენწჷფო ნწყილობაქ, მუთ მაიაშ ცივილიზაციაშო რდჷ დჷმახასიათაფალინ, ბოლო-ბოლო თაქჷთ ქჷდიხუ.

=== პრეკლასიკური პერიოდი ===
ჩქ. წანეფიშეკოროცხუაშახ 1500 წანას, პრეკლასიკური პერიოდიშ დოჭყაფუს გჷთმორჩქინდუ მაიაშ ცივილიზაცია. გეფალეს შხუ ცენტრეფქ – [[ნაკბე]], [[ელ-მირადორი]], [[ტიკალი]]. გჷმირინუაფუ რიტუალური, ბჟაშ დო თუთაშ კალენდარეფი, ივითარებუ იეროგლიფური ჭარალუა, ეთმიგაფუაფუ ოხიდეფი. ჯარალუა ირთუ მადუდე ელიტათ დო მასათ (დიხამოქიმინჯეეფი, მოხელეეფი, ვაჭარეფი)

=== კლასიკური პერიოდი ===
[[ფაილი:Altar 13 Mesoamerican Gallery.JPG|მინი|250პქ|ოწანაფე, ახ. წ. 830 წ.]]
ორდოშიან კლასიკური პერიოდიშე (ახ. წ. 250-600 წ.წ.) კაბეტი მუდანობათ წჷმოსქიდჷ პირამიდა ოხიდეფქ მუკნაჭარეფით დო მადუდეეფიშ სურათეფით. არძოშე ორდოშიანი (292 წ) ნაძირეფუ რე [[ტიკალი|ტიკალს]] დო თის გჷშახანტილი რე დინასტიაშ დჷმარსხუაფალიშ, მადუდე [[იაშ-მოშ-შოკა]]შ მონძეშ პორტრეტი. გვიანიშ კალსიკური პერიოდი (ახ. წ. 600-900 წ.წ.) რე კაბეტი ფალუაშ ეპოქა, მუჟამსჷთ გჷმორჩქინდჷ კულტურაშ ახალი ჯაკონეფქ [[პალენკე]]ქ დო [[კოპანი|კოპანქჷნ]], ოდო ხელუანობაქ უკაბეტაშ ეკიულას მიოჭირინუ. მარა, მუჭოთ რჩქჷნ, ორთაშობური რესურსეფქ გეგმირცუ, მუქჷთ გჷშეჭანუ [[ოფუტეშ მეურნობა|ოფუტეშ მეურნობაშ]] დონთხაფა, დო უკვე პოსტკლასიკურ პერიოდის უმუჭყვიდუ შქირენეფქ, ეპიდემიეფქ, ურცხოარ ემაჭოფალეფქ, უმუჭყვიდუ ლჷმეფქ, - ირფელქ ათექ ეკონია მუკათუ მაიაშ ცივილიზაციას. მორო ცივილიზაცია იშენი აგჷნძორენდჷ სქჷლადას [[იუკატანიშ ჩქონი|იუკატანიშ]] ოორუე ნორთის. თაქ უსქვამაში ნოღეფი – [[უშმალი]], [[კაბახი]], [[საიილი]], [[ლაბნა]] – აგჷნძორენდეს შურდგჷმას 1000 წანაშახ, ოდო ნოღა [[ჩიჩენ-იცა]]შო გოპეულუაშ პერიოდიქჷთ ქჷდოდირთჷ. მარა ჩიჩენ-იცაშ უნელო მიკოდინაფაშ უკული, იუკატანიშ თარ ნოღათ გჷნირთჷ [[მაიაპანი|მაიაპანქ]]. კოკომეფიშ დინასტიაშ 250 წანაშ პატჷნალაშ უკული, მაიაპანი გაკარღვეს არყებულ მეძობელ ნოღეფიშ ნჯღვერეფქ, მუშ უკულით, ჸოფილი სახეთ მაიაშ ცივილიზაციას ვა მუწადგინჷ კუჩხიშა, ოდო საბოლათ თინა ესპანარ კონკისტადორეფქ მოჯილიკუეს.

=== კოლონიზაციაშ პერიოდი ===
[[ფაილი:Maya Presentation of Captives detail 2 Kimbell.jpg|მინი|250პქ|ჭკორეფიშ წჷმორინაფა მაიაშ მადუდეშ წოხოლე, ახ. წ. 785 წ.]]
ჟირი ცივილიზაციაშ, ევროპული დო ამერიკული (''თე შვანს მაიაშ ცივილიზაცია'') მაართა აკოხვალამაქ აკოდირთჷ [[ქრისტეფორე კოლუმბი]]შ კათაფათ, მუჟამცჷთ მუში მაანთხა ნჩურუაშ ბორჯის ინდოეთის (''კოლუმბის წანდჷ, ნამჷ-და მუში კილაძირაფილ დიხა [[ინდოეთი]] რდჷნ''), მუში ხვამარდეფქ ალულუეს ალმახანური [[ჰონდურასი]]შ ოორეუ ნორთის დო კოკი [[გუანაია|გუანაიაწკჷმა]] აუხვადეს ცალფა ჯას ეშაჭკირილ [[კანოე]]ქჷნ, სიგანათ 1,5 მ. თენა რდჷ ოვაჭარე [[ნიში]], ნამუდგაშ მერზეეფქჷთ ევროპალეფს გჷწარზის [[ლინჯი]]შ ფურცელეფი, ხეშ კვაღეფი, კერამიკული ნახელუეფი, [[კაკაო]]შ კაკალეფი დო ბამბაიეფი. 

მუჟამცჷთ [[ერნან კორტესი|ერნან კორტესიქ]] [[აცტეკეფიშ ცივილიზაცია|აცტეკეფიშ]] კაბეტი [[იმპერია]] ეჭოფუნ, თიქ ართ-ართი მუში რაზმიშ მადუდე მიდაჯღონჷ ობჟათეშა, ახალი ტერიტორიეფიშ ეიოჭოფუშა. [[1547]] წანაშო, ესპანარეფქ მათუეს მაიაშ კათეფიშ ეჭოფუა, მორო ნამუთინე ტომქ დუდი ქჷმკაფორუ [[იუკატანიშ ჩქონი]]შ ცენტრალურ ნორთიშ [[ტყა]]ლეფს დო ხოლო 150 წანაშ მალობას აგჷნძორენდჷ ლჷმას. ესპანარეფიშით მუშაღალირი [[პატონეფი (ეპიდემია)|პატონეფიშ]], [[წითელე]]შ დო [[გრიპი]]შ ეპიდემიეფი, ნამუეფსჷთ თექიანი მახორობა ვა ჩინებულენდჷნ, მილიონობათ ინდიარს მუთმოცალუნდჷ [[ღურა]]შ ცელით. ესპანარეფი თე ბორჯისჷნე კონწარას თხოზუდეს თინეფიშ [[რელიგია]]ს: აკმარღვანდეს ოხიდეფს, წიმინდე არდგილეფს რჩუნდეს, ოდო თინეფს, მით მეკაპუობაშა რდჷ გეჭოფილინ, [[კათოლიკე]] [[მისიონერი]] ბერეფი მუკმაშქვანდეს ჯალს, დუღუნდეს ჩხე წყარით, ლახუნდეს მართახით. 

თე მისიონერეფს ხემანჯღვერენდჷ [[ფრანცისკანარეფიშ ორდენი|ფრანცისკანარ]] ბერი [[დიეგო დე ლანდა]], ვაორდინარული დო რთული კოჩი. თინა გურაფულენდჷ აბანობური მახორობაშ ჸოფას, ოცადუდჷ ქჷმეუგორაფუდუკო მაიაშ ჭარალუაშ სალამუსობაშ ეშანწყუმალშა დო გაკლაძირჷ ონოფულე ოტყობენჯი, სოდეთ 30 იეროგლიფური [[წინგი]] იჩუალუაფუდჷნ. თე წინგეფი ხელუანობაშ გოსოფურ მინუშეფს წჷმარინუანდჷ: უჩა დო ჭითა შანეფი კალიგრაფიშ ხეთ რდჷ გჷშაჸონაფილი ღია ფერიშ ქაღარდიშა, ნამუსჷთ ახაზირენდეს [[ლუღი]]შ ვარ-და [[ჯამპი|ბჟოლიშ]] თუდონი ნორთიშე. თვითან წინგეფი კიჩილი რდჷ „გარმონცალო“, ოდო გალენკაბრა [[იაგუარი]]შ ტყებიშე რდჷ ხაზირელი. 

თე ბერქ გჷნოჭყვადჷ, ნამჷ-და მაიაშ წინგეფს ეზოთერული რჩქინაშ მაღვენჯი, მაზაკვალიშ მაჩილითაფარი მოღე იჸუაფუდჷნ დო ზოჯჷ თინეფიშ ჭუალა, მუქჷთ „მაიაშ კათას ზარი დო ჯაბი მუკათუ“. 1562 წანას, დიეგო დე ლანდაშ სუმთუთაშ [[ინკვიზიცია|ინკვიზაციაშ]] ბორჯის, თიშ  ხემანჯღვერალათ აწამეს 5 000 ინდიარი, ნამუეფშეთ 158-ქ დოღურჷ. თე კონწარალაშ გეშა, დე ლანდა უკოხოლე, [[ესპანეთი|ესპანეთშა]] გაგშეჭანეს, მარა თექ გამართეს დო გვალო მალას უკვე [[ეპისკოპოსი]]შ რანგშა დართინეს. 

კონკისტადორეფი არძო შელებუანი მოხუჯეფით დო მერინეფით მუთმოჯილიკანდეს ინდიარეფიშ კულტურას. ესპანარეფიშ მოულაშე უკვე ოში წანაშ უკული, მაიაშ დიდებუანი ულირიშ გეშა გოშინეფქჷთ ვა დოსქიდჷ. მითინს ვაწარინნედჷ თოლშა, ნამჷ-და ადამიერშო დახე ეუჭოფუ, თე ტროპიკულ კლიმატის უმაღალაშ [[ცივილიზაცია]] სქიდუდჷნ.

== ჯარალუა ==
მაიაშ [[ცივილიზაცია|ცივილიზაციაშ]] გოვითარაფა მითმიშჷ კონწარას რეგლამენტირაფილი, კლასობური [[რჩქინა (ჯარალუა)|ჯარალუაშ]] ევოლუციაშ მეთხოზინალათ. მადუდეეფი, ნამუეფიშ გამნარყი, მუჭოთ მაიაშ კათას მიორჩქჷდჷნ, ღორონთეფშე მუთმოურდჷნ, ხემანჯღვერენდეს ადამიერეფს, დოჭყაფილი ოფუტეშ მეურნობაშ საქვარუათ დო მოთებული ოურდუმე ლოშქუეფით. ჯარალუობური პირამიდაშ უმაღალაშ კონქას გერდჷ უჟინაში მადუდე, შხვა ოქიანუეფწკჷმა მერსხილი, მუსჷთ ღოზი მუკოქვენჯეფით ხოლო ათმასუმალუდჷ კიდირს გემარგებული უციო სარკეთ. უჟინაშ მადუდეს მაიაშ კათეფი „კათაშ სარკეს“ უძახუდეს.

== ხელუანობა ==
[[ფაილი:Palenque Relief.jpg|მინი|250პქ|რელიეფი [[პალენკე]]შე]]
მაიაშ კათეფიშ რინაშ გურგაჩამალ ნორთის აკმადგინანდჷ [[მუსიკა]] დო სხაპუეფი, ნამუეფიშ მეშქაშალათ თინეფი ღორონთეფს მარდის უჯღუნანდეს. მუსიკაშ ჰანგეფი დო ქორეოგრაფიული სურთეფი ოხოლუდჷ მაიაშ არძო მასობურ გიშულეფს: რჩქალობაშ ბორჯის დო ვარ ოურდუმე ლოშქუეფს, [[ჯინუა]]ს დო ვარ მინდორიშ სამუშეფს, ოკულტე ცერემონიეფს. მასხაპალეფი დო მუსიკოსეფი გჷშახანტილი რენა დოხორეეფიშ კიდალეფს, მოხანტილ ბინეხეფს, სკულპტურეფს. სანარღოთ, ჩქი ამუდღა ვა შემილებუნა ქჷმიფრჩქილუათ მუსიკა, ნამუთ თიკწჷმა ისჷმედჷნ ვარ-და ქაწიბრინუათ თოლშა მასხაპალეფიშ რიტმული ჸარებეფინ. 

გიოშქუმალარ მუსიკალურ ინსტრუმენტეფს ახაზჷრენდეს ჯაშე, ჭუბერიშ ვარ-და ოკიანეშ [[კუ]]შ ფორიშე. ინანბარალ ინსტრუმენტეფს ახაზირენდეს გჷრძე, გჷშასქჷრაფილ [[კოპეშია|კოპეშიეფშე]], ნამუეფით ჯაშ სვირეფშა რდჷ წჷმოციკაფილინ. სალამურეფს დო ოჸეეფს აკეთენდეს [[ირემი|ერემიშ]] ყვილეფშე ვარ-და ჯაშე.

<gallery widths="140px" heights="140px" perrow="4">
File:Ahkal Mo' Naab III.jpg|პალენკეშ მაფა აჰკალ მო' ნააბ III, VIII ოშწანურა 
File:Jaina Island type figure, Art Institute.jpg|ფიგურა კოკი ჰაინაშე, ახ. წ. 650-800 
File:PalenqueAc.jpg|მობათქაშებული ილუსტრაცია [[პალენკე]]შე, ახ.წ. 670
</gallery>

== არქიტექტურა ==
[[ფაილი:Palenque Ruins.jpg|მინი|250პქ|[[პალენკე]]შ აკნაცჷმეფი]]
[[ფაილი:Tikal Ballcourt.jpg|მინი|250პქ|ბურთიშ ოლაჸაფე მოედანი [[ტიკალი|ტიკალს]], [[გვატემალა]]]]
არქეოლოგეფქ, მუკოჸუნაფილ გონთხორუეფიშ ოსხირშა გიშეღეს დუნასქვი, ნამჷ-და მაიაშ პირამიდეფი, თეშინეშეს მუჭოთ ეგვიპტურინ, წჷმარინუანდეს ჟინოსქუალეფიშ აკარდამეფს. ხანტუეფიშ, ქუაშ მათოლარეფიშ, მუშეფიშ ქვერსემი არმია ხეს მუთმოთხუნდჷ სარიკოთ რთულ საქვარს, თიშო ნამჷ-და ეკონია პატი გინუგაფუდესკო აკა ადამიერშან. სამანგათ, [[პაკამა]]ს (დუდენდჷ 615-683 წ.წ.) – [[პალენკე]]შ უჟინაში მადუდეშ [[აკარდამა]]ქ აორცება გჷშეჭანუ მუში ღმალიერი ონთხორუეთ. პაკამაქ ეიოგჷ დოხორეეფი, ოხიდეფი, ეიორხინჷ მუკნაჭარეფამი სტელეფი, ნამუეფით ძალამ ოხვილურ ინფორმაციას ირზენა მაიაშ გეშა. 

<gallery>

File:Lamanai Mask.jpgდეტალი ნოღა [[ლამანაი]]შე
File:Xunantunich El Castillo 2011.jpg|„ელ–კასტილიო“ ნოღა შუნანტუნიჩწკჷმა, სიმაღალა 132 ფუტი 
File:Belize-elcastillo.jpg|„ელ–კასტილიო“
File:Grosser Tempel in Palenque.jpg|პალენკეშ თარი დოხორე, ახ. წ. VII ოშწანურა
File:Governor's Palace rear view and details, Uxmal.jpg|მადუდეშ დოხორე, [[უშმალი]], X ოშწანურა.
</gallery>

== მეურნალა ==
მაიაშ ცივილიზაციაშ სქჷლადაშო ოხვილური რდჷ მუდგარენი ეკონომიკური ოსხირი, მარა მაიაშ კათეფს ვა უჩქუდჷ [[ლითონი]], ოხონური, ბარბალამი ოჭიეეფი, შინური ჩხოლარეფი, სამეთუნეო [[ბარბალი]]. ფაქტობურო, თინეფიშ სამუშა ხესახვარეფიშ მეჯინათ ქიბჩიით-და, თინეფი რდეს [[ქუაშ ხანა|ქუაშ ხანაშ]] ადამიერეფი. XX ოშწანურაშ 60-იან წანეფშახ მიორჩქუდეს, ნამჷ-და მაიაშ ტომეფი, თეშინეშეს მუჭოთ თინეფიშ ალმახანური გუმნარყეფინ, [[ოჭვარუე დიხაქიმინჯალა]]ს მეთხოზუდეს: მოჩამილ ნოკვეთის [[ტყა]]ს გოჩეხუნდეს, უკულ მოჭკირილ ჯალეფს დო ბართვონს ჭუნდეს, ტუტათ გუპატიებდესკონ დიხა. ტროპიკული ტყალეფიშ დიხა ღარიბი რე, ფინა ვა რე ტომბა, ათეშენ თინა მალას, ჟირ-სუმ წარმოწანას გჷმიფიტუ. თეშ უკული ნოკვეთის იტენდეს თეიშახ, ვინდარო თინა კჷნე ვა დიფორუდჷ ჯალეფით დო უკული ირფელი დუდშე იჭყაფუდჷ. 

ბორჯიშ განწხანს მაიაშ [[მახორობა]] იძინანდჷ. გეთოლწონჷ ნამჷ-და დიხაშ [[ეროზია]], ნამუთ ოჭვარუე დიხაქიმინჯალაშ ბორჯის აკმიქიმუნდჷნ, მაიაქ ქჷდიჭყჷ გვალაშ ფერდიეფს აკიბურ დიხაქიმინჯალაშ გჷმორინაფა. ჯვეში მაიაშ კათეფი ეკონელ მინდორიშ პრინციპისჷთ ირინუანდეს, მუჟამც ჭყონჭო არდგილეფშა მიშმუღუდეს დიხან დო აკმოქიმინუნდეს გუძუბეფს. მაიაშ ტომეფს ობაღინაფალო რთული ოირიგაციე სისტემეფით უღუდეს. სამანგათ, კილაძირაფილქ იჸუ 90 მეტრა სიგანაშ დო 11 კმ სიგჷრძაშ არხიქ, ნამუთ ნოღას წყარმალუწკჷმა მითმიორსხუანდჷნ. ნოღა [[ეცნა]]შ ცენტრიშე, ოორუეთ, გონთხორილი რდჷ უმოს მორჩილ ზჷმაშ შქვით არხი, ნამუდგეფით წყარი შხვადოშხვა ზჷმაშ რეზერვუარეფს ეთმიოფშანდჷნ. არძოშე უკაბეტაში თე რეზერვუარეფშე 120 მლნ კუბურ მეტრა წყარს ინტირინუანდჷ. არქეოლოგეფიშ გჷშაკოროცხუათ, თე სისტემაშ კიდანჯუას ნოღაშ მახორუეფქ 1,68 მლნ კოჩ-დღა ახარჯეს. ირფელქ ათექ ეგაფილქ იჸუ ხეთ, პრიმიტიული ხესახვარეფით. 

[[წყარმალუ]]ეფს დო არხეფს გჷნოაბანუაშ აკა მეშქაშალას წჷმარინუანდჷ [[კანოე]], ნამუთ ცალფა ჯაშე რდჷ გჷშათოლირინ, სიგჷრძას რდჷ 12 მ. დო 50 კოჩის ინტირინუანდჷ.

== ვაჭრუა ==
ქიანაშ სიტომბაშა წყარპიჯეფშე მუშმუღუდეს შხვადოშხვა პროდუქტი: [[ჩხომი]], [[ზუღაშ ბჟაშუმუეფი]], ალიშკიბირეფი, [[ზვიგენი]]შ კიბირეფი, [[ჯიმუ]] – ნამუთ ართნერ [[ფარა]]შ როლს ლაჸაფენდჷ. [[იუკატანიშ ჩქონი|იუკატანიშ]] ბჟაეიოლ ოძგალეს, ნოღა სოროსის დირსხჷ ოვაჭრე ცენტრიქ. არძოშე ანდაღებული პროდუქტი, ნამუთ სოროსიშ გულათ ედომუშამ ქიანას გუთმიფაჩუდჷნ, რდჷ [[ნეფრიტი]] დო [[ობსიდიანი]], ნამუეფით [[მექსიკა|მექსიკაშ]] შქა ნორთიშე დო [[გვატემალა|გვატემალაშ]]ე მოუღუდეს. ობსიდიანი, უჩა ვულკანური გოჭყაფაშ შუშა, იმუშებაფუაფუდჷ თეში, ნამჷ-და თიში პიჯი ხამუცალო კვათირო გჷნმირთუდჷ. თიშე ახაზირენდეს ანჯარს დო ოჭკირალ ინსტრუმენტეფს. ნეფრიტი, მოღე რდჷ მუჭოთ რიტუალური ქუა დო თიშე კაბეტი მოთხუალა რდჷ ქიანაშ ედომუშამ ტერიტორიას. ათე დო შხვა ღირუან პროდუქტიშ მანგიორო, რზენ აბანეფს მახორუ ადამიერეფი ირზენდეს ოჭკომალ პროდუქტეფს, [[ბამბე]]ს, თაშნეშე [[იაგუარი]]შ ტყების დო [[კეტცალი]]შ ბურდღას.

== ჭარალუა ==
{{თარი|მაიაშ ჭარალუა}}
[[ფაილი:Cancuenpanel3.jpg|250px|მინიატიურა|მაიაშ მუკნაჭარეფი მაფა ტაჰ აკ ჩაანიშ გჷმოსახილობათ]]
მუჟამცჷთ [[ესპანარეფი|ესპანარეფქ]] [[იუაკატანიშ ჩქონი|იუკატანშა]] მორთესჷნ, მაიაშ კათეფს ვითოშობათ ხეშნაჭარა წინგი აპალუდეს, ნამუეფიშ უკაბეტაშ ნორთიქჷთ დიიჭჷ. [[XIX ოშწანურა]]ს მენცარეფი იჩინენდეს ხვალე სუმი წინგის – კოდექსეფიშ გეშა, ნამუეფსჷთ თი ნოღეფიშ ჯოხოეფქ მიაჩეს, სოდეთ თინეფი კილაძირესჷნ. 14 წანაშ განწხანს გურაფულენდჷ დრეზდენს, ომაფე ბიბლიოთეკაშ ბიბლიოთეკარი [[ერნესტ ფორსტემანი]] კოდექსის დო მაიაშ კალენდარიშ ქიმინჯალაშ პრინციპის, ოდო [[იური კნოროზოვი]]შ დო [[ჰენრიხ ბერლინი]]შ გჷმორკვიეფქ ახალი ფურცელი გეგნოფაჩეს ალმახანური [[მაიანისტიკა]]ს. მიორჩქუნა, ნამჷ-და ამუდღარშო ეშაჩინებული რე მაიაშ იეროგლიფეფიშ 80%-შე უმოსი, ოდო არქეოლოგეფქ მაიაშ მატერიალური კულტურაშ ანდა, გოსოფური ძეგლი კილაძირეს.

== ასტრონომია ==
[[ფაილი:Maya.svg |250px|მინიატიურა|მაიაშ ციფრეფი]]
მაიაშ [[ქურუმი|ქურუმეფი]] უჯვეშაში ბორჯიშე უჸუნუანდეს თოლს ცაშურ რსხულეფს. ონოფულე რჩქინას მურიცხეფიშ დო პლანეტეფიშ გეშა ქურუმეფი ენმიჭარანდეს კოდექსეფშა, ნამუეფქჷთ წჷმომიტეს მაიაშ კალენდარეფიშ რთული სისტემა, ნამუთ მერსხილი რდჷ ბჟაშ, თუთაშ დო პლანეტა [[მორღა]]შ ჸარებაწკჷმა. მაიაქ ხვალე ბჟაშ [[კალენდარი]] 365 დღათ ვა აკოქიმინჷნ, ვარინ უკაბეტაში აიწორალათ გოხურგუ [[თუთა (ალმაშარე)|თუთაშ]] [[თუთა]] ხოლო (''ალმახანური გჷშაკოროცხუეფით გვალო 23 მერქაშ ჩილათაფათ''). მარა რინაშულო არძოშე გურგაჩამალი კალენდარი, ნამუთ ირი კუჩხიშ ბიჯგის გჷთმოხურგანდჷ ადამიერიშ ჭარას დო თი წიაკალი ნობიჯგუსჷნ, მაიაშ კათაშო რდჷ ასტროლოგიური, ვარ-და რიტუალური კალენდარი, ნამუთ 260 დღალამ ციკლეფშე აკმოდირთუუდჷ. 

ალმახანური მუნაჩემეფით ძნელი რე თე კალენდარიშ გორჩქინაშ აიწორი გოხურგუა. ნამთინეეფს მიორჩქუნა, ნამჷ-და თის ოსხირო ათუძჷ [[სასქუო]]შ ნაჸოფიშ გოვითარაფაშ პერიოდი – ენოსახუაშე დაბადებაშახ. ჯვეში მაიაშ წჷმმარინაფალეფი, თეშინეშეს მუჭოთ ალმახანური ადამიერეფი, რგებაფულენდეს [[ჰოროსკოპო|ჰოროსკოპეფით]], რიტუალური კალენდარით გჷთმოხურგანდეს ედორია დღალეფს მუდგარენი გარკვიული საქვარეფიშ წჷმაჭყაფალო. 

თეშ გალე, მაიაშ ქურუმი ასტრონომეფქ აკარსხუეს რთული კალენდარი, სოდეთ ართბორჯულო გჷმირინუაფუდჷ ბჟაშ, რიტუალური დო [[პლანეტა]] მორღაშ ციკლეფი. თიშ მეჯინათ, ქურუმეფი გჷთმოხურგანდეს ლჷმეფიშ დო გეჸვილაფეფიშ ბორჯის. თე კაბეტი კალენდარი აკმოდირთუუდჷ 104 წანაშე, მორღაშ ყარაფიშ 65 პერიოდიშ დო ადამიერიშ ნაჸოფიშ მონჭაფაშ 146 პერიოდიშე. თიშ მეჯინათ, ირი 173,3 დღაშ უკული, შილებედჷ ოლებერი ბჟაშ დო ვარ თუთაშ გეუკუმელაფაშ აწოჩამა, მუთ უბრალე კათაშა [[მაგია|მაგიურ]] ინოჩამას ოხვამილუანდჷ.

ჯვეში მაიაშ ქურუმეფს წანდეს, ნამჷ-და თინეფს უჩქუდეს ქიანაშ გორჩქინაშ აიწორი თარიღი (''იულიანური კალენდარიშ მეჯინათ ჯვ.წ. 3114 წანაშ 11 მარაშინათუთა''), ოდო თინეფიშ კოსმოსური ციკლეფიშ თეორიაშ მეჯინათ, [[2012]] წანაშ [[21 ქირსეთუთა]]ს, თე ქიანა ოკო მოსპელედჷკო. მორო მაიაშ კათეფშო რეალური სპუალაქ უმოსი ორდო – XVI ოშწანურას მოხვადჷ, მუჟამცჷთ თინეფიშ ოძგალეს ესპანარი [[კონკისტადორეფი|კონკისტადორეფქ]], პაპეფქ დო კოლონისტეფქ მადირთესჷნ.

== ოურდუმე საქვარუა ==
ოგალენე ოურდუმე კონფლიქტეფიშ ნოქური დო დუდიშთხილუააშ ნოდგჷმეფიშ ვარინელობაქ, არქეოლოგეფს ოფირქებაფუ, ნამჷ-და მაიაშ კათა, აცტეკეფშე გინორთათ, მეთხოზუდეს რჩქალი, დახე იდილიურ რინას, მარა მაიაშ ხელუანობაწკჷმა უმოსი ხოლოს ნაჩინებუობაქ გვალო შხვანერო წჷმარჩქინჷ თე ცივილიზაციას მახორუ ჯარალუა.

მაიაშ ოურდუმე ლოშქუეფს უღუდჷ რიტუალური ხასიათი. თენა რდჷ ვარჩქვანელობური ლჷმეფი: ხაზირუა მერეთი პომპეზური რდჷ, ოჩხუპერ რაგვინეფი ძალამ ხანკუნტა დო კაბეტი მუდანობაშ ჭკორი, ნამუეფსჷთ ღორონც გიოჸვილანდესჷნ.

== რელიგია ==
[[ფაილი:Maya Priester.jpg|მინი|250პქ|მაიაშ ქურუმიშ ფიგურა]]
[[ფაილი:Crazy stuff.jpg|მინი|250პქ|ახალი წანაშ რიტუალი]]
ადამიერეფშო ოხიდეფი წჷმარინუანდეს თი აბანს, სოდეთ მითმეურდჷ მაიაშ ართ-ართი არძოშე გურგაჩამალი რიტუალი — ღორონთწკჷმა დო კინოხონეფწკჷმა აკოწყორუა, მუსჷთ „დიხაშთუდო შარალუა“ ჯოხოდჷ. თენერი შარალუაშ ორსულებერო მადუდეს ოკო მიშურთუმუდჷკო ეგზალტაციაშ უმაღალაშ სტადიაშა, მუდგაშ ბორჯისჷთ ჰალუცინაციეფი იჭყაფუ. თეშ მეჭირინდაფა შქირენათ დო [[ზისხირი]]შ კჷლაშქუმალათ შილებედჷ. მადუდე მუში ზისხირამ ადათის ორთუდჷ ხვალახეთ, ჭიჭე ოთახის, ოდო უკული ზისხირით მოწიკვილი, ჩე  მუკოქვენჯით გჷმორჩქინდუდჷ ოხიდაშ ეშალუეფიშ ჟილენ მოედანს დო თეჸურეშე იჭყანდჷ „ღორონთშა ეშულას“.

ალმახანური ადამიერშო ზისხირიშ კჷლაშქუმალაშ პრაქტიკა ოშქურანჯი დო ტყარობა რე, მარა მაიაშ კათაშო თენა უციობას წჷმარინუანდჷ. თინეფს წანდეს, ნამჷ-და [[ოქიანუ]]ს მოდვალირი რე ოშქურანჯი დო უბადო ძალეფი, ნამუეფიშ აკოკჷნებათ ხვალე გარკვიული რიტუალეფიშ რსულებათ შილებე. მურიცხეფიშ დო პლანეტეფიშ ყარაფის თინეფი ღორონთეფიშ ნებას მიოჭარანდეს. [[ბჟაშ გეუკუმელაფა]], სამანგათ, თინეფიშთ მირჩქინუაფუდჷ მუჭოთ ოხვამერიშ ღურაშ მუდგარენი ფორმათ, მუდგაშ გეშათ [[ბჟა]] ირიათონო შილებედჷ გოდინაფედჷკონ. ოჭუმარეშ [[მურიცხი]]შ (თენერო თინეფს მორღა მიორჩქუდეს) მაართა მუკორჩქინა ცას ხანგინძე ბორჯიშ უკული, თინეფშო მოხოლაფირ [[ლჷმა]]შ შანი რდჷ. მეუჸუნუანდეს მუ ზისხირიშ კჷლაშქუმალაშ ცერემონიას ნამუდგაინ ცაშურ ჸოფირებას, მაიაშ მადუდეეფი ოცადუდეს მუდგაიჸინნერო გულა მოუხვამილუაფუდესკონ ოლებერ ჸოფირებეფშა დო წანდეს, ნამჷ-და თეშა რდჷ მუკობუნაფილი ქიანაშ [[ჭარა]]ნ. 

მაიაშ კათეფიშ არზით, ონოფულე რსხუ შურდგჷმილ ადამიერეფ დო ღორონთეფ შქას ირსხუაფუდჷ რიტუალურ აქტეფიშ ბორჯის, ნამუეფსჷთ ადამიერეფშა ოკო მეუჩამუდესკონ შურდგჷმილი ოქიანუშე შურეფიშ ოქიანუშა გჷშულაშ მეშქაშალა. თე კათეფიშ წჷმმარინაფალეფს სპეციალურო მეჸუნდეს მუნეფიშ დუდი თი დგომარობაშა, მუჟამც აბორჯებულ ჰონიას რჩქინდუდჷ მუდგარენი აწოძირაფეფი, მუთ შანენდჷ შხვა ოქიანუშა გჷნულას. თენერი რიტუალეფიშ მუკოჸონაფაშ ბაძაძეფი მირყას რდჷ: დაბადება დო ვარი [[ღურა]], [[ლაიტი]]შ თასუა დო ვარი მადუდეშ ხვისტაშა ეშულა – ირფელი ითხიინდჷ ზისხირიშ კჷლაშქუმალას, ანუ ღორონთეფშო თი არძოშე ანდაღებულ გიოკიბირალს, ნამუთ თინეფს აპალუდესჷნ. 

კჷლაძირაფილი რე ქუაშე გჷშათოლირ ადამიერიშ ჭიჭე ფიგურა, ნამუთ ზისხირიშ კჷლაშქუმალაშ წესის არსულენსჷნ. დუდიშ გიოფორაფალი, სამკაულეფი, ჩხეშეფშა გოკარკატელი ნოჭკერი, ირფელი თენა მიოწურუანდჷ, ნამჷ-და თინა დჷნოშურეფშო ცოდეფს ნარღენდჷნ. ირხუნდჷ მუ  გენიტალიეფს (ნამუთინეშა ირხუნდეს ნინას ვარ-და ჸუჯეფს), თინა უჯინედჷ, ვინდარო ზისხირით ვა მიღაფუდჷ ჯაშე ხაზირელი ქაღარდინ. მუჟამსჷთ ქაღარდი ზისხირით მიღაფუდჷნ, თის ჭუნდეს დო თეჸურეშე გჷმულირი კუმა, ნამუთ ეშე, ცაშა მიშჷნ, წჷმარინუანდჷ ღორონთეფიშ ოსქჷლადირეს. 

მაიაშ კათეფი ოქიანუს უჯინედეს ართბორჯულო ეფურინათ დო შქურინით ხოლო. თინეფიშ წჷმორინაფეფით, [[კოსმოსი]] სუმი დონეშე აკმოდირთუდჷ: ჟილენი, ცაშ დონეშ, ოშქაშე, დიხაშ ოქიანუშე დო ქვერსემიაშე, სოდეთ ღურელეფი ოხორანდესჷნ. ოქიანუშ წესრიგი ასქილიდაფირი რდჷ თი ჩეჟიერ ურთიართალეფით, ნამუეფით ღორონთეფ დო ადამიერეფ შქას ორდჷნ. ღორონთეფი მაიაშ კათეფს არზენდეს ოჭკომალს,  გამუნარყის, ბჟაშ სინთეს, [[ჭვემა]] დო შხვა რინაშულ ჩეჟიერალეფს აღიარაფაშ, პატიშ დო თაყვანიშ გჷნოგაფაშ მანგიორო.

== ართუაფა ==
ჩქინშახ მაჭირინდუ მაიაშ ართ-ართი ართუაფალქ – ბურთით ლაჸაფიქ. სპეციალურ ქუაშ მოედანეფს ნირზის მოკათაფუეფი წჷმარინუანდეს მითოლოგიურ სიუჟეტის გერგეზი ნაჟირუა ჯიმალეფიშ გეშა, ნამუეფით დიხაშთუდო, ღორონთეფს ბურთის ოლაჸაფუდესჷნ.  დო აიწორო თეშინეშეს, მუჭოთ მითოლოგიურ ნარაგადუს, სოდეთ ჩიება რდჷ ღურა დო თელარა შქას სხუნაშ გეშა, რეალურ ნირზის დომარცხაფილს გიოჸვილანდეს  ვარ-და ოღურალო ლახუნდეს მონკა ბურთით, ვარ-და დუც კვათუნდეს. ნამუთინეშა დომარცხაფილს უბრალეთ აკოკირუნდეს დო აკეთენდეს მუ თიშე ართნერ შურდგჷმილ ბურთის, ქჷგიოკერკელუანდეს ოხიდაშ ეშალუეფს ვარ-და ღურაშა ორულაფუანდეს მოედანს.

== მაიაშ ნოღაშ კილაძირაფა ==
[[XVIII ოშწანურა|XVIII ოშწანურაშ]] ლიაშე კჷნე იჭყაფუ მაიაშ ცივილიზაციათ დოინტერესაფა დო ბრელ მუდგარენეფი კილმურს დღაშ სინთეშა. მაიაშ ულირიშ მაართა მარკვიე რდჷ ესპანეთიშ არმიაშ კაპიტანი [[ანტონიე დელ რიო]], მიქჷთ კილაძირჷ მაიაშ ნოღა [[პალენკე]] დიდებუანი პირამიდეფით დო დოხორეეფით. 20 წანაშ უკული, თის ქეკაჸუნჷ ესპანარეფიშ ოინალუს რინელი ჰოლანდიარი [[გილერმო დიუპე]]ქ, მიქჷთ ესპანეთიშ მაფა [[კარლოს IV]]-შე ეჭოფჷ დავალება ქჷდოუგურუაფუდჷკო [[მექსიკა|მექსიკაშ]] სიჯვეშეეფინ. უკულნეშის დიუპეშ საქვარი აგჷნძორჷ [[გვატემალა|გვატემალაშ]] გუბერნატორქ [[ხუან გალინდო]]ქ  დო ბოლოს სტეფენსიქ დო კაზერვუდიქ. თინეფიშ ექსპედიციფიშ უკული, მაიაშ ცივილიზაციაშ გეშა არძოქ ქჷდიჭყჷ ჩიება. 1885 წანას, ამერიკაშ ანტიკვარულ ჯარალუაქ დო ჰარვარდის პიბოდიშ მუზეუმქ იუკატანშა მიდაჯღონეს სპეციალური ექსპედიცია ახალნორდი მენცარიშ – ედვარდ გ. ტომსონიშ ხემანჯღვერალათ, მით 40 წანაშ მეძენას არკვიენდჷ მაიაშ ცივილიზაციას. მარა მაიაშ ისტორიაშ კილაქ ძირაფილქ იჸუ თიშ უკული, მუთ [[კიჩეშ ტომი]]შ ინდიარქ, მისჷთ უჩქუდჷ ჯვეში ჭარალუან, ლათინური შრიფტით ინიჭარჷ კიჩეშ კათაშ წიმინდე წიგნი “პოპოლ-ვუხი” (“კათაშ წიგნი” – მითეფიშ დო ლეგენდეფიშ კათელი). სანარღოთ, ორიგინალქ მედინჷ დო წჷმოსქიდჷ ხვალე თე წიგნიშ ლათინურ [[ტრანსკრიპცია]]ქ.

=== მაიაშ ნოღეფიშ ერკებული ===
რე ოშობათ მაიაშ ნოღა დო ვითოშობათ მორჩილ დოხორინი, თინეფ შქას არძოშე გურგაჩამალი რე:
[[ფაილი:Nakbe str.JPG|250px|მინიატიურა|შქა პრეკლასიკურ პერიოდიშ დოხორეშ სტრუქტურა ნოღა ნაკბეს]]
*[[კალაკმული]]
*[[ჩიჩენ-იცა]]
*[[კობა (ნოღა)]]
*[[კომალკალკო]]
*[[კოპანი]]
*[[პალენკე]]
*[[კირიგუა]]
*[[ტიკალი]]
*[[ტულუმი (მაია)]]
*[[უშმალი]]

== ლიტერატურა ==

*{{cite book 	|last=Braswell |first=Geoffrey E.
	|title=The Maya and Teotihuacan: Reinterpreting Early Classic Interaction
	|year=2003 |edition=  
	|publisher=University of Texas Press
	|location=Austin, Texas
	|isbn=0-292-70914-5
	|oclc=49936017}}
*{{cite book
	|last=Christie |first=Jessica Joyce
	|title=Maya Palaces and Elite Residences: An Interdisciplinary Approach
	|year=2003
	|publisher=University of Texas Press
	|location=Austin, Texas
	|isbn=0-292-71244-8
	|oclc=50630511}}
*{{cite book
	|last=Demarest |first=Arthur Andrew
	|title=Ancient Maya: The Rise and Fall of a Rainforest Civilization
	|year=2004
	|publisher=Cambridge University Press
	|location=Cambridge, England; New York
	|isbn=0-521-59224-0
	|oclc=51438896}}
*{{cite book
	|last=Demarest |first=Arthur Andrew, Prudence M. Rice, and  Don Stephen Rice
	|title=The Terminal Classic in the Maya Lowlands: Collapse, Transition, and Transformation
	|year=2004
	|publisher=University Press of Colorado
	|location=Boulder, Colorado
	|isbn=0-87081-739-6
	|oclc=52311867}}
*{{cite book
	|last=Garber |first=James
	|title=The Ancient Maya of the Belize Valley: Half a Century of Archaeological Research
	|year=2004
	|publisher=University Press of Florida
	|location=Gainesville, Florida
	|isbn=0-8130-2685-7
	|oclc=52334723}}
* William F. Hanks, ''Converting Words: Maya in the Age of the Cross'' (Berkeley, University of California Press, 2010) (The Anthropology of Christianity).
*{{cite book
	|last=Herring |first=Adam
	|title=Art and Writing in the Maya cities, AD 600-800: A Poetics of Line
	|year=2005
	|publisher=Cambridge University Press
	|location=Cambridge, England; New York
	|isbn=0-521-84246-8
	|oclc=56834579}}
*{{cite book
	|last=Lohse |first=Jon C. and Fred Valdez
	|title=Ancient Maya Commoners
	|year=2004
	|publisher=University of Texas Press
	|location=Austin, Texas
	|isbn=0-292-70571-9
	|oclc=54529926}}
*{{cite book
	|last=Lucero |first=Lisa Joyce
	|title=Water and Ritual: The Rise and Fall of Classic Maya Rulers
	|year=2006
	|publisher=University of Texas Press
	|location=Austin, Texas
	|isbn=0-292-70999-4
	|oclc=61731425}}
*{{cite book
	|last=McKillop |first=Heather Irene
	|title=In Search of Maya Sea Traders
	|year=2005
	|publisher=Texas A & M University Press
	|location=College Station, Texas
	|isbn=1-58544-389-1
	|oclc=55145823}}
*{{cite book
	|last=McKillop |first=Heather Irene
	|title=Salt: White Gold of the Ancient Maya
	|year=2002
	|publisher=University Press of Florida
	|location=Gainesville, Florida
	|isbn=0-8130-2511-7
	|oclc=48893025}}
*{{cite book
	|last=McNeil |first=Cameron L.
	|title=Chocolate in Mesoamerica: A Cultural History of Cacao
	|year=2006
	|publisher=University Press of Florida
	|location=Gainesville, Florida
	|isbn=0-8130-2953-8
	|oclc=63245604}}
*{{cite book
	|last=Rice |first=Prudence M.
	|title=Maya Political Science: Time, Astronomy, and the Cosmos
	|year=2004 |edition=1st
	|publisher=University of Texas Press
	|location=Austin, Texas
	|isbn=0-292-70261-2
	|oclc=54753496}}
*{{cite book
	|last=Sharer |first=Robert J. and Loa P. Traxler
	|title= The ancient Maya
	|year=2006 |edition=6th
	|publisher=Stanford University Press
	|location=Stanford, California
	|isbn=0-8047-4816-0
	|oclc=57577446}}
*{{cite book
	|last=Tiesler |first=Vera and Andrea Cucina
	|title= Janaab' Pakal of Palenque: Reconstructing the Life and Death of a Maya Ruler
	|year=2006
	|publisher=University of Arizona Press
	|location=Tucson, Arizona
	|isbn=0-8165-2510-2
	|oclc=62593473}}
*{{cite web
	|title=Painted Metaphors: Pottery and Politics of the Ancient Maya
	|url=http://www.upenn.edu/almanac/volumes/v55/n28/maya.html
	|date=4/7/2009
	|work=University of Pennsylvania Almanac
	|publisher=University of Pennsylvania
	|accessdate=2009-06-17}}

== რესურსეფი ინტერნეტის ==
{{Commons category|Maya}}
*[http://www.famsi.org/ Foundation for the Advancement of Mesoamerican Studies, Inc (FAMSI)]
*[http://www.mayaweb.nl/ Mayaweb (Dutch and English)] {{Webarchive|url=https://web.archive.org/web/20100110011355/http://www.mayaweb.nl/ |date=2010-01-10 }}
*[http://www.authenticmaya.com/ Guatemala, Cradle of The Maya Civilization]
*[http://worldmuseumofman.org/mayan1.htm The Maya at the World Museum of Man] {{Webarchive|url=https://web.archive.org/web/20100219222757/http://worldmuseumofman.org/mayan1.htm |date=2010-02-19 }}
*[http://www.nga.gov/exhibitions/2004/maya/lifeatcourt.shtm Courtly Art of the Ancient Maya at the National Gallery of Art] {{Webarchive|url=https://web.archive.org/web/20080725052215/http://www.nga.gov/exhibitions/2004/maya/lifeatcourt.shtm |date=2008-07-25 }}
*[http://www.mexconnect.com/articles/539-primary-sources-of-maya-history-part-one Primary sources of Maya history - part one  by Ronald A. Barnett]
*[http://www.mesoweb.com/ Mesoweb] 
*[http://www.gomaya.com/glyph The Daily Glyph] {{Webarchive|url=https://web.archive.org/web/20121126015635/http://www.gomaya.com/glyph/ |date=2012-11-26 }}
*[http://radio.echoditto.com/junglecast Junglecasts] {{Webarchive|url=https://web.archive.org/web/20090517065940/http://radio.echoditto.com/junglecast |date=2009-05-17 }} 
*[http://www.mayamap.org/ Maya Map] 

[[კატეგორია:მაია]]
[[კატეგორია:ცივილიზაციეფი]]
[[კატეგორია:ამერიკაშ კათეფი]]