施政報告前瞻｜施永青籲推印花稅假期穩樓市 「唔係為咗幫地產佬 港人一半持物業 財富喺晒樓嗰度」
發佈時間：06:00 2024-10-06
特首李家超本月發表任內第三份《施政報告》，中原集團創辦人施永青向《星島頭條》提議，政府應容許市民動用自己強積金作供樓首期，以及推出「印花稅假期」等措施。近日港股表現向好，施認為金融市場做得好，會帶動樓市情緒氣氛向好，又指樓價需要企穩，「地產唔係淨係為咗地產佬，香港普羅大眾有一半都持有物業，佢哋嘅財富喺晒樓嗰度」。
可參考英「印花稅假期」
事實上，樓價已從2021年高位回落近三成，差估署數字顯示，今年全港私人住宅樓價指數按年則跌13.32%。施永青表示，樓價需要企穩避免社會進入通縮。他分析，一旦社會進入通縮，資產價格下降，信用緊縮，以致市民消費意欲及商家投資能力都會大大受到影響，「所以地產唔係淨係為咗地產佬，香港普羅大眾有一半都持有物業，佢哋嘅財富喺晒樓嗰度」，並相信樓價企穩，人們自然落力消費及投資，「呢個係政府必須花氣力去做嘅。」
房屋政策方面，他建議政府容許市民動用自己強積金作供樓首期，買樓自住。另外，政府今年2月宣布撤辣，只是免除以往置業時的額外限制，施永青建議應該「加糖」，例如參考英國曾推出的「印花稅假期」措施，「政府想多啲資金流入去房地產市場，可以做啲鼓勵，例如免收印花稅，或者某段時間免除公司客利得稅，等民間資金都可以幫手去穩定樓價。」
翻查資料，英國政府曾於疫情期間推出的「印花稅假期」（Stamp Duty Holiday）措施，人們在當地購入自住物業首50萬英鎊不需付印花稅，其後的樓價亦可得到印花稅減免，為其一年。 有關方案取得顯著效果，當地樓市在疫情期間穩住了，經濟亦不至於大幅下滑。
港經濟不差 GDP增長有3%
被問到本港近年經濟復甦緩慢，施永青表示不認同，認為本港第二季本地生產總值（GDP）增長有3%，「啲人覺得香港經濟唔好，佢哋只睇飲食業、零售業，其實呢啲只佔GDP好少，所以冇我哋想像中咁嚴重，啲人誇大咗㗎咋。」至於舖位結業潮，他直言只是局部地區情況，「唔係淨係睇某啲舖位空置，要睇整體情況，如果全部都衰嘅話GDP唔會有3%增長。」
中原資料顯示，7月份尖沙咀區空置率錄得7.9%，按月調低約0.09個百分點，走出疫情頹勢，較2021年2月的高點降低9.36個百分點，更是連續兩個月回落；銅鑼灣空置率表現亦改善，按月調低0.26個百分點至5.54%，續為各核心區之中空置率最低；中環空置率亦由升轉跌，按月調低0.02個百分點至7.24%；旺角空置率則微升0.08個百分點至7.97%，而對比按年同期則下調約0.63個百分點。
地產界須金融襯托
近日中央一系列救市「組合拳」，刺激港股連日大升，恒指創超過2年半新高。施永青認為最近港股好轉，投資氣氛熱鬧，相信金融做得好，帶動樓市情緒氣氛向好。「地產業界做得好，都要有金融方面一齊襯托」。他希望香港未來能夠增加更多大規模的新股IPO項目，認為新股對投資者來說，大家一起起步，會更積極，因此若能多些新股上市，市場氣氛都會變得熱鬧。
