Jean-Pierre Dumont

Pol discramiaedje des årtikes avou l' mot « Dumont », loukîz cial.

Jean-Pierre Dumont a skepyî a Avene li 29 di decimbe 1944. C' est on sicrijheu di ptits romans et d' coûtès prôzes e walon.

(e 2003)

Il esteut po-z esse riprins, come sicrijheu, dins l' pordjet (nén adiercî) d' antolodjeye des scrijheus e walon do Payis d' Hu (k' il aveut lu-minme ataké).

Ouve e walon

come sicrijheu

Noveles et coûtès prôzes

Ses noveles ont stî aprume eplaideyes sol Daegntoele, sol waibe l' Aberteke.

Adonpwis, e 2005, i fwait rexhe ene ramexhnêye di ses noveles, «Contes di m' payis et d' co pus lon». Cist ovraedje la a rascodou l' Pris del Federåcion Walonreye-Brussele di 2006.

Ene novele ramexhnêye, Tot tournant les pådjes a rexhou e 2017.

E 2022, i scrît ene ôte schôtlêye di tecses, avou Thomas Gaspard, «Ir, ouy et dmwin…».

Djan-Pire Dumont al Djournêye des belès letes e walon a Hu k' il adjinçna e 2004

Jean-Pierre Dumont (a hintche) ki tént l' drapea walon a l' Elizete

Prôze nén racontrece

Djan-Pire Dumont a eto scrît del prôze nén racontrece, metans sol Hongreye.

Come bouteu pol walon

Come bouteu pol walon, il a rmetou do walon dins l' soce culturele di Hu “Li Coirneu”: adjinçner ene cåkêye di shijhes walones, k' ont stî tertoes ecasetlêyes e videyo; renonder li Pris Joseph Durbuy, et mete so pås so fotches les prumirès djournêyes des belès letes e walon (2004).

E 2014, il emantcha ene djåspinreye éndjolike so Fesse-bok, lomêye "Payis condruze et walon".

Come eplaideu

Il a bouté on tins so ene antolodjeye des scrijheus e walon do Payis d' Hu. Pol prumî côp dins les antolodjeye, les notules biyografikes sont eto ratournêyes e walon.

Il a eto scrît so Augustin Vermer dins l' rivuwe "Ardennes wallonnes".

Les pus belès noveles da Djan-Pire Dumont

Dins «Contes di m' payis et d' co pus lon»

• Mignolet.
• Zoly est moirt.
• Li dierin de Carayibes.
• Nanete.

Dins «Tot tournant les pådjes»

• Moncheu l’ Prôcureur dè Rwè
• Li grande sogne da Niniye

Dins «Ir, ouy et dmwin…»

• L' après-davance (ene novele ki djåze d' ene nouzone rascråwe nawearinne).

Corwaitaedje

al fôre ås lives di Rdû (2022)

Il a basti ses romans avou des tecnikes di ralaedje en erî, maxhaedje des spoûles di deus diferinnès djins, evnd (davance, les romans e walon estént sovint cronolidjikes, avou on seu mwaisse persounaedje).

Ses spoûles si passèt kécfeye el Walonreye, mins eto foû payis (dins les Carayibes, el Hongreye, evnd).

C' est ossu onk des prumîs k' a djåzé d' seke sins rastena dins les belès letes e walon.

Sapinse Laurent Hendschel, c' est on « novea modele di scrijheu walon ».

Hårdêyes difoûtrinnes

• Li Wiccionaire si rsieve di sacwantès fråzes da Jean-Pierre Dumont po-z enimådjî des mots k' i gn a.
• Vos trouvroz des racsegnes so les ouves da Jean-Pierre Dumont, u les ouves zeles-minmes, so Wikisourd e walon.
• (so l' Aberteke)
  • Li pådje moennrece des scrijhaedjes da Djan-Pire Dumont
  • "Li tribunå des biesses", ene di ses dierinnès noveles
• (sol waibe "Li walon d' emon nozôtes")
  • Ene ôte pådje avou ses scrijhaedjes
  • Si studia sol Dr Vermer
• Si pådje so Facebook
• Voci, vos ploz schoûter èn eredjistrumint del fåve do vî vî tins «Li bijhe et l' solea» ratournêye et dijhowe par lu, pol Djåzant atlasse éndjolike des lingaedjes di France et d' avår la.