Villeneuve-d'Ascq
 Villeneuve-d'Ascq | |
|---|---|
.svg)
| |
 't Kastêel van Flers in Villeneuve-d'Ascq | |
| Geografie | |
| Regio | Hauts-de-France |
| Departement | Noorderdepartement |
| Arroundissement | Rysel |
| Kanton | Villeneuve-d'Ascq |
| Coördinoatn | 50°37′NB 3°07′OL |
| Ippervlak | 27,46 km² |
| Inweuners | |
| Inweuners | 61.920 (2015) 2255 inw./km² |
| Andere | |
| Burgemêester | Gérard Caudron |
| Postcode | 59491, 59493, 59650 |
| Webadres | Site van Villeneuve-d'Ascq |
Villeneuve-d'Ascq es e gemêente in Vrankryk in 't Noorderdepartement. 't Ligt in Frans-Vloandern, mêer bepoald in Rysels-Vloandern. De gemêente es 'n nieuwe gemêente (ville nouvelle in't Frans) want z'es in 1970 ountstoan deur't tôopesmytn van de gemêentn Ascq, Annappes en Flers. O d'ôost- en nôordkant van Villeneuve-d'Ascq lôopt de riviere de Marke.
Villeneuve-d'Asq ligt in de stadsagglomeroasje an den ôostkant van Rysel en es ezo vrêe verstedelykt. Villeneuve-d'Ascq zelve telt apeupri 62.000 inweuners. 't Es verboundn me Rysel deur lynne 1 van de Ryselsche metro en deur d'yzerboane kommende van Dôornik oover Baisieux.
D'universiteytn Rysel I en Rysel III en ôok e pôote weetnschappelyke ounderzoekscentra zyn der gevestigd. In Villeneuve-d'Ascq ligt ôok 't Stade Pierre-Mauroy, sedert 2012 't nieve foebolstadium van Lille OSC. Dervôorn speeldigd'n ze ôok ol in Villeneuve-d'Ascq, van 2004 tout 2012, in't Stadium Lille Métropole.
Liggienge
bewerkn
Deur zyn reedelyke grôotte grenst Villeneuve-d'Ascq an nen ill'n ôop gemêentn:
Wykn
bewerkn
D'uudige stad es ipgedêeld in teffrente wykn:
- Annappes es eigntlyk 't vroegere dorp Annappes.
- Ascq es eigntlyk 't vroegere dorp Ascq en ligt nu in't ôostn van de nieuwe gemêente. In't zuudn dervan ligt ôok nog de wyk Croix de Wallers.
- Brigode ligt centroal en es mor ountstoun by de creoasje van de "ville nouvelle" in de joarn '70. Brigode es e groene, redelyk rykke residentieele wyk o de zuudkantn van't Parc du Héron.
- Château woar da 't Kastêel van Flers ligt.
- De Cité Scientifique, de wyk in't zuudn woar de campus Rysel I ligt.
- Cousinerie, en uutgestrekte wyk van de "ville nouvelle", o de nôordkantn van't Parc du Héron.
- Flers Bourg ligt in't westn en bevat 't center van't vroegere dorp Flers. Ierby ligt ôok de klêene nieuwe wyk Nieuw-Flers.
- Flers Breucq ligt hillegansn in't nôordn, richtienge Roboais toe, teegn de gemêentn Waskehal en Croix. 't Gehucht Le Breucq bestoat ol van in de neegntiende êeuwe en ôordigde vroeger by de gemêente Flers.
- Haute-Borne ligt hillegansn in't zuudn teegn de gemêente Singem en wierd ebouwd vanof end de joarn '80. Ier wierd e wetenschapspark ingericht.
- Hôtel de Ville, woa da't nief staduus stoat, es sedert de fuuzje eigntlyk 't center van de gemêente. De wyk ligt wel nie in't middn, mor in't zuudwestn van de gemêente en wierd ingeplant tusschn d'universitaire wyken Cité Scientifique en Pont de Bois.
- Pont de Bois ligt in't westn. Ier ligt de campus Rysel III
- Les Prés wierd angeleyd in 1977-1978 en wos de latste wyk van d'n ôorsprounkelykn uutbouw van de "ville nouvelle".
- Recueil ligt in't nôord'n en es êen van de minst versteedelykte en minst beweunde wykn.
- Résidence en La Poste zyn twêe wykn tusschn Ascq en Annappes die ol angeleyd wierd'n tusschn 1958 en 1970, dus vôorn de fuuzje.
- Sart-Babylone ligt in't noorden by Flers Breucq.
- Triolo ligt in't zuud'n en wos d'n êestn wyk van't projekt van de "ville nouvelle".
Beziensweirdigheedn
bewerkn
|
Ofbeeldiengn die ier by passn ku je vien in de categorie Villeneuve-d'Ascq van Wikimedia Commons. |