Tambov

Tambov
Тамбов

Lidnanznam	Flag
Valdkund	Venäma
Eläjiden lugu (2024)	256,268 ristitud
Pind	107,31 km²
Pämez'	Jelena Leonova (reduku 2020—)
Telefonkod	+7−4752-xxx-xxx
Avtokod	68
Aigvö	UTC+3 (MSK+0)

Lidnan kart (2022)

Tambov (ven.: Тамбо́в) om lidn da lidnümbrik Venäman päivlaskmas. Se om Tambovan agjan administrativine keskuz da kaikiš suremb lidn, mugažo Tambovan rajonan tobmuden aluzkundoiden sijaduseks.

Istorii

Eländpunktan aluz om pandud vl 1636 kuti Tambov-kaičendlidnuz Venäman suviröunal. Se sai lidnan statusad vl 1719. Vspäi 1796 kändihe Tambovan gubernijan keskuzlidnaks, sur' jarmank oleskeli keskuzližel torgul.

Tambov šingotase mašinansauvomižen edheotandoil («Terrion»-traktorad i kombainad, elektroladimed, himižen sarakon täht), himižel tegimištol (ližadused i mujutimed sädamha tekstilid, bumagad, šinoid, benzinad, betonad; räzintehnižed tegesed, gazmaskad, respiratorad, kosmoslaivoiden elonvarmitusen sistemad), sauvondmaterialiden pästandal (raudbetontegesed, plastiktorved, mujud), erazvuiččel sömtegimištol, tekstilin tehmižel (kanghad specialižen soban täht) i omblendedheotandoil.

Geografijan andmused

Lidn sijadase Cnanjogen hural randal, 130 m ü.m.t. keskmäižel korktusel.

Matkad Moskvhasai om 420 km lodeheze orhal. Lähembaine järed lidn om Lipeck 130 km päivlaskmha avtotedme. Kotovsk om suvipäivnouzmaižeks kaimdailidnaks.

Klimat om ven kontinentaline. Kaik kümne puištod om lidnan territorijal. Voden keskmäine lämuz om +6,5 C°, kezakun-elokun +18,5..+20,7 C°, tal'vkun-uhokun −5,6..−7,5 C°. Ekstremumad oma −38,0 C° (viluku) i +41,1 C° (heinku, eloku). Kezaaigan minimum om +0,5 C° (kezaku), tal'vaigan maksimum om +11,9 C° (tal'vku). Ei voi panda halad kezakus-elokus. Paneb sadegid 502 mm vodes keskmäras, enamba kezakus-heinkus (54..66 mm kus), vähemba uhokus-sulakus (29..32 mm kus). Viden keskmäine relätivine nepsuz om 75 %.

Tobmuz

Tambovan administrativižed rajonad: (vn 2017 kart)
     Leninan rajon      Oktäbrin rajon      Nevondkundaline rajon

Tambov jagase koumeks administrativižeks ümbrikoks. Kaik 18 territoriališt nevondkundad om lidnas. Se oli lidnümbrikon üks'jäižeks eländpunktaks sihesai, kuni vspäi 2023 mülütihe lidnümbrikho viž žilod i kaks' küläd, niišpäi järedamb om Stroitel'-žilo (19 647 rist. vl 2021).

Municipaližen ühtnikan pämez' om Tambovan Duman ezimez' vn 2022 uhokuspäi. Jelena Leonova radab sen ezimehen vn 2020 redukuspäi.

Nügüdläine lidnan pämez' om Maksim Kosenkov vn 2020 kül'mkuspäi (oti sidä-žo radnikust vll 2005−2008). Edeližed lidnan pämehed oliba Sergei Čebotaröv (keväz'ku 2017 — keväz'ku 2019), Dmitrii Samorodin (velgusentäutai, keväz'ku 2019 — sügüz'ku 2019), Natalija Makarevič (sügüz'ku 2019 — reduku 2020). Lidnan pämez' valičese Tambovan Dumal i tegeb lidnümbrikon Administracijan pämehen velgusidme.

Eläjad

Vn 2010 Venäman rahvahanlugemižen mödhe lidnan eläjiden lugu oli 280 161 ristitud, vn 2021 — 261 803 ristitud. Kaik 290 365 eläjad oli lidnas vl 2017. Kaikiš suremb lidnan ristitišt oli 318 tuhad eläjid vl 1997. Läz 32 tuhad eläjid om lidnümbrikon toižiš eländpunktoiš.

Rahvahad (lidnalaižed, enamba 0,4 % vl 2021): venälaižed — 75,0 %, toižed rahvahad — 3,5 %, rahvahuden ozutandata — 21,5 %.

Ortodoksižed hristanuskojad oma enambuses lidnas.

Openduz

Kaik viž tehnikumad i kümne kolledžad oma lidnan professionaližen keskopendusen aluzkundoikš. Nell' tedoinstitutad ratas.

Üläopendusen aluzkundad:

• Tambovan valdkundaline universitet G. Deržavinan nimed;
• Tambovan valdkundaline tehnine universitet (alusenpanend 1958, läz kahesad tuhad üläopenikoid);
• Tambovan muzikaliž-pedagogine institut S. Rahmaninovan nimed;
• valdkundaližiden aluzkundoiden koume filialad.

Transport

Avtobusad, trolleibusad, maršruttaksid da taksid oma kundaližeks transportaks lidnas. Kaks' avtostancijad om olmas: «Tambov» i «Pohjoine». Tambov I-päraudtestancii om saudud vl 1868. Avtote ümbärdab lidnad.

Tatanmaine civiline Tambov (Donskoje)-lendimport (TBW / ТМБ / UUOT, 31,8 tuh. passažiroid vl 2021) sijadase kümnes kilometras pohjoižpäivnouzmha lidnan keskusespäi Donskoje-žilos. Tehtas reisid Moskvha i Piterihe, om sezonreisid Sočihe. Mugažo Tambov-sodaaviabaz om olmas viž kilometrad päivlaskmha lidnan keskusespäi.

Galerei

• 
  Lidnan tobmuden sauvuz (2016)
• 
  Spasan Toižetamižen kafedraline päjumalanpert', vn 2015 nägu
• 
  Kazanin Jumalanmaman mez'jumalankodi, vn 2021 nägu
• 
  Pühän Ristan Zdviženjan katoline jumalanpert', vn 2021 nägu
• 
  Tambovan LEK vl 2018
• 
  Tambovan valdkundaližen universitetan päine korpus (2011)
• 
  Tambovan dramteatr (2020)
• 
  «V Radužnom»-jäaren (2012, Radužnijas)
• 
  Tambov (Donskoje)-lendimportan terminal vl 2014
• 
  Tambov I-päraudtestancijan sauvuz Privokzal'nai-torgul vl 2011

Irdkosketused

• Lidnan tobmuden portal (mo-tambov.ru). (ven.)