Ostrov
Lidnanznam.png)
| |
| Valdkund | Venäma |
| Eläjiden lugu (2021) | 20,923 ristitud |
| Pind | 19 km² |
| |
| Pämez' | Nikolai Grigor'jev (reduku 2017—) |
| Telefonkod | +7−81 152-xx-xxx |
| Avtokod | 60 |
| Aigvö | UTC+3 (MSK+0) |
Ostrov (ven.: О́стров «sar'») om Venäman lidn da lidnankund, transporttesol'm Pskovan agjan keskuzpalan päivlaskmas. Se om Ostrovan rajonan administrativine keskuz, mugažo sen kahten ümbärdajan volostin keskuseks (Ostrovan i Berežanskai).
Istorii
[vajehta | vajehtada lähtetekst]Eländpunkt mainitase ezmäižen kerdan vl 1341 röunanverižeks lidnuseks, kudamb sijazihe Sur'-jogen sarel, sen tagut lidnan nimi om. Saudihe vanhan sijas kivišt lidnust 14. voz'sadan keskespäi, kaiči Pskovad suvespäi. Vspäi 1719 kätihe Pskovan provincijan makundan lidnaks. Jäl'gmäine soda pani lidnusen seiniden jändusid mantazole.
Ostrov-lidn šingotase abrazivtegimel, lihakombinatal, turizmal (kuz' adivpertid, kaks' motelid, 13 kafe i klubad), Venäman hihtandsportan vaumičendan kezakeskusel. Nügüd'aigan koume openduzsodagarnizonad oma lidnan paloikš Veret'je-punolendimportanke.
Geografijan andmused
[vajehta | vajehtada lähtetekst]Lidn sijadase Sur'-jogen randoil (Peipusjärven bassein), 60 m ü.m.t. keskmäižel korktusel.
Matkad Pskovhasai om 43 km pohjoižhe raudtedme vai avtotedme. Lähembaižed lidnad oma Pskov i Pitalovo vižkümnes kilometras suvipäivlaskmha raudtedme vai orhal.
Tobmuz
[vajehta | vajehtada lähtetekst]Ostrov om lidnankundan üks'jäižeks eländpunktaks. Lidn jagase videks mikrorajonaks: Ostrov-1..5, niiden kesken ezmäine om keskuzpala, nellänz' om Stroitel' («sauvoi»), videnz' sijadase severziš-se kilometriš suvhe lidnan päpalaspäi.
Lidnankundan tobmuden pämez' om sen Deputatoiden suiman ezimez'. Edeližed suiman ezimehed oma Aleksandr Obrizan (keväz'ku 2016 — reduku 2017), Vladimir Abbasov (radoi edel vn 2016 keväz'kud). Lidnan Administracijan pämez' om Tat'jana Filippova vn 2018 sulakuspäi. Edeline Administracijan pämez' om Sergei Leonenko (keväz'ku 2016 — sulaku 2018).
Eläjad
[vajehta | vajehtada lähtetekst]Vn 2010 Venäman rahvahanlugemižen mödhe lidnan eläjiden lugu oli 21 668 ristitud, rajonan ristitišton kaks' koumandest, vn 2021 — 20 923 ristitud. Kaik 20 568 eläjad oli lidnas vl 2017. Kaikiš suremb lidnan ristitišt oli 30 tuhad eläjid vl 1998.
Rahvahad (enamba 0,4 % vl 2021): venälaižed — 93,5 %, ukrainalaižed — 0,8 %, vaugedvenälaižed — 0,7 %, toižed rahvahad — 2,4 %, rahvahuden ozutandata — 2,6 %.
Ortodoksižen hristanuskondan kümne pühäpertid[1] oma avaitud lidnas: Eläban Eziauguižen Stroican päjumalanpert' (letihe vll 1786−1790), nell' jumalanpertid, kaks' časounäd, Simanskijan Pühän Kazanin Jumalanmaman naižjumalankodi (om alusenpandud vl 1907, kaks' jumalanpertid i časoun'). Enččen lüteranižen kirhan sauvuz kävutase toižin.
Lapsiden opendusen aluzkundad oma viž nimitadud päivkodid, nell' keskškolad (nomer 1, 3, 4, 7), gimnazii, lapsiden sädamižen pert', čomamahtoiden škol, lapsiden da norišton sportškol. Ostrovan äiprofil'ne kolledž[2] om lidnan professionaližen opendusen aluzkundaks.
Galerei
[vajehta | vajehtada lähtetekst]-
Ostrovan rajonan käskuzkundan sauvuz (2014) -
Simanskijan Pühän Kazanin Jumalanmaman naižjumalankodi, vn 2018 nägu -
Torguindan raudrived (2014), sodamemorialanke ezimal -
Otel' Ostrov park (2016), nägu Sur'-jogespäi -
Avtobusstancii vl 2014
Homaičendad
[vajehta | vajehtada lähtetekst]- ↑ Ostrovan pühäpertid sobory.ru-saital. (ven.)
- ↑ Ostrovan äiprofil'žen kolledžan sait (org1037.pskovedu.ru). (ven.) i sen vanh sait (ostrov-pu11.narod.ru).
Irdkosketused
[vajehta | vajehtada lähtetekst]- Lidnankundan tobmuden aluzkundoiden oficialine sait (ostrovadm.ru). (ven.)
- Lidnankundan lehtpol' Ostrovan rajonan oficialižel saital (ostrov.reg60.ru). (ven.)
 |
Ostrov Vikiaitas |
| Pskovan agjan lidnad | ||
| Dno | Gdov | Nevel' | Novoržev | Novosokol'niki | Opočk | Ostrov | Petseri | Pitalovo | Porhov | Pskov | Pustošk | Sebež | Velikije Luki | ||