Mikun'

Mikun'
Микунь
Valdkund	Venäma
Eläjiden lugu (2024)	8,288 ristitud
Pind	13,91 km²
Pämez'	Dmitrii Gabov; (reduku 2021—)
Telefonkod	+7−82 134-xx-xxx
Avtokod	11, 111
Aigvö	UTC+3

Mikun' (komi: Микунь, ven.: Ми́кунь) om Venäman lidn Komin Tazovaldkundan suvipäivlaskmas. Mülüb Ust'-Vimin rajonha lidnankundaks, üks'jäine lidn rajonas.

Istorii

Eländpunkt augotihe vl 1937 Pohjoižen raudten panendan aigan, sen istorijan muzei om lidnas. Vl 1940 saudihe elektrostancijad sihe. Žilo raudtestancijanno sündui vodel 1945, radnikžilo vn 1947 redukuspäi.

Žilo kändihe lidnaks vl 1959. Saudihe raudted Siktivkarha suvipäivnouzmha da Udoran maha lodeheze, i 1960-nzil vozil lidn kändihe järedaks raudtesol'meks.

Kaik kaks' raudtestancijad om lidnas: Mikun' päraudtel i Mikun'-kahtenz' Udoran sarakol. Om kompressorstancijoid läz lidnad pompamha kivivoid i londuselišt gazad magistraližil veimil.

Geografijan andmused

Lidn sijadase Vičegd-jogen da sen Vim'-ližajogen oiktal randpolel (Pohjoižen Dvinan oigedpol'ne bassein).

Rajonan Aikino-keskuz sijadase 15 km suvhe avtotedme, Vičegdan randal. Matkad Siktivkaraspäi om 108 km avtotedme vai 96 km raudtedme lodeheze. Lähembaine lidn om Jemv 50 km pohjoižpäivnouzmha raudtedme vai 100 km avtotedme.

Tobmuz

Šežam-žilo (1 rist. vl 2014) mülüb lidnankundha Mikunin ližaks.

Lidnankundan tobmuden pämez' om sen Nevondkundan ezimez'. Edeline nevondkundan ezimez' om Nikolai Kudräšov (keväz'ku 2017 — reduku 2021). Lidnan Administracijan pämez' om Vladimir Rozmislo (Владимир Розмысло), hän om sil radnikusel vspäi 2014.

Eläjad

Vn 2010 rahvahanlugemižen mödhe lidnan eläjiden lugu oli 10 088 ristitud, vn 2021 — 8 527 ristitud. Kaik 9 837 eläjad oli lidnas vl 2017. Kaikiš suremb lidnan ristitišt oli läz 12 tuhad eläjid vozil 1989−2001.

Ortodoksižen hristanuskondan kaks' pujumalanpertid^[1] oma saudud da avaitud lidnas: Jumalanmaman Počajevan jumalaižen (om pühästadud vl 1996) i Pühän Jumalanmaman Emäganpäivän (letihe vll 1994−1996).

Lapsiden opendusen aluzkundad oma päivkodi nomer 2 (nell' adresad), kaks' keskškolad (nomer 1, 2), lapsiden da norišton turizman i ekskursijoiden keskuz (koume adresad videspäi oma lidnas), čomamahtoiden škol, Start-sportškol. Siktivkaran avtomehanižen tehnikuman Mikunin filial^[2] om lidnan professionaližen opendusen aluzkundaks, edel 2023. vot se oli Mikunin raudtetehnikumaks.