Holm (lidn, Venäma)

Holm
Холм

Lidnanznam
Valdkund	Venäma
Eläjiden lugu (2021)	3,214 ristitud
Pind	8,59 km²
Pämez'	Tat'jana Aleksandrova
Telefonkod	+7−81 654-xx-xxx
Avtokod	53
Aigvö	UTC+3 (MSK+0)

Holm (ven.: Холм) om Venäman lidn da lidnankund Uz'lidnan agjan suvipäivlaskmas. Se om Holman rajonan administrativine keskuz.

Istorii

Eländpunkt seižui torguindteil Mustmerennoks, mainitase ezmäižen kerdan vl 1471 kuti Hol'mov'skii pagast (ven.: Холмовьский погост) Pol'šanman Kazimir IV-kunigahan kožundkirjeižes Uz'lidnanke. Nimitihe korktan kukhan mödhe jogen randal. Posad sai makundan lidnan statusad Pskovan gubernijas vn 1777 3. päiväl elokud. 19. voz'sadal oli tetab sijaližil pramozloil, venehiden da toižiden jogiastjoiden tegmižel.

Äjad pertid oliba muretud täuzin Suren sodan aigan vl 1942, vedihe torategendoid lidnas da sen ümbrištos.

Holm šingotase mecan varhapanendan da ümbriradmižen edheotandoil. Om saven, letken, gravijan i turbhan löudmižsijid lidnan ümbrištos.

Geografijan andmused

Lidn sijadase Lovat'-jogen randoil (Il'mjärven bassein), 65 m ü.m.t. keskmäižel korktusel, keskuzpala om oiktal randal.

Matkad Surhe Uz'lidnhasai om 150 km pohjoižhe orhal vai 200 km avtotedme. Lähembaine lidn om Toropec (Tverin agj) 78 km suvipäivnouzmha orhal vai 95 km avtol.

Tobmuz

Holm om lidnankundan üks'jäižeks eländpunktaks.

Lidnankundan tobmuden pämez' om sen Deputatoiden nevondkundan ezimez'. Edeline nevondkundan ezimez' om Valentina Vitäzeva, radoi vn 2016 sügüz'kuspäi. Lidnankundan Administracijan jäl'gmäine pämez' oli Anatolii Kovalenko (kül'mku 2010 — reduku 2015). Lidnan Administracii om likvidiruidud vn 2015 redukus, nügüd'aigan rajonan Administracii tegeb sen velgusidme.

Eläjad

Vn 2010 Venäman rahvahanlugemižen mödhe lidnan eläjiden lugu oli 3 830 ristitud, rajonan kaks' koumandest, vn 2021 — 3 214 ristitud. Kaik 3 445 eläjad oli lidnas vl 2017. Kaikiš suremb lidnan ristitišt oli 6 800 eläjad vl 1913, Suren sodan jäl'ghe — 4 849 ristitud vl 1989.

Rahvahad (enamba 0,4 % vl 2021): venälaižed — 96,0 %, čiganalaižed — 0,9 %, toižed rahvahad — 2,2 %, rahvahuden ozutandata — 0,9 %.

Ortodoksižen hristanuskondan Jumalanmaman Tihvinan jumalaižen pühäpert' om udessündutadud vll 1991−2003 kivižes olendas. Jumalannägundan päjumalanpert' i nell' jumalanpertid oma pandud mantazole.

Lapsiden opendusen aluzkundad oma kaks' nimitadud päivkodid, keskškol, čomamahtoiden škol. Professionaližen opendusen aluzkundad ratas lähembaižiš lidnoiš.

Irdkosketused

• Lidnan Deputatoiden nevondkund rajonan tobmuden holmadmin.gosuslugi.ru-saital i lidnankundan lehtpoled edel vn 2023 kezad holmadmin.net-saital. (ven.)