Berlin

	Berlin
Eläjiden lugu	3 431 000
Pind	891,85 km²

Berlin (germanijan kelel: Berlin) om Germanijan pälidn, kaikiš järedamb lidn Germanijas. Megapolisan pind om 891,85 км². Eläjiden lugu om enamb 3,4 millionad ristituid. Se om toine lidn ristituiden lugun mödhe Londonan jäl'ghe da videnz' lidn pindan mödhe Evropan Ühtištuses. Berlin om üks' 16 maišpäi Germanijan Federativižes tazovaldkundas. Sen sijaduz om Šprejen da Hafelän jogiden randoil, Brandenburgan federaližen man keskes, kudambha iče lidn ei mülü (1920 vodelpäi).

Läz 1200 vot nügüd'aigaižen Berlinan sijal oli kaks' torguindlidnad — Köl'n da Berlin. Vodel 1307 lidnad ühtištuiba da tegiba ühthine lidnaline nevondkund (ratuš). Jäl'ghepäi lidn oli Brandenburgan markgrafkundan/kurfürstkundan (1417 vodelpäi), Prussijan (1618 vodelpäi) da Germanijan Imperijan (1871 vodelpäi) istorižen pälidnan.

Toižen mail’mansodan jäl'ghe Jaltan konferencijan pätindan mödhe Berlin jagatihe 4 okkupacižhe sektorihe. Möhemba 3 sektorad ühtištuiba Päivlaskmpol'žehe Berlinha, kudamb iče mülüi GFTha. Voden 1961 13 elokuspäi Berlinan sein ümbärzi Päivlaskmpol'žen Berlinan. Berlinan sein, kudamb oli üks' Viluvoinan päsimvolišpäi, muretihe vl. 1989. Germanijan ühtenzoitamižen jäl'ghe sen pälidnan om ühtenzoittud Berlin.

Nügüd' Berlin om valdkundan znamasine politine, ekonomine, kul'turine da tedoline keskuz. Berlin om mugažo jalos järed transportsol'm. Siš om 2 lendimportad: Tegel' da Šönefel'd; lidnas om 12 päraudtestancijad. Berlinas om kundališt transportad: avtobusid, tramvajid, lidnelektrojonusid. 1902 vodespäi lidnas radab metropoliten.

Vodel 1936 Berlinas oliba Kezaližed Olimpižed vändod.