Pestovo

Pestovo
Пестово
Lidnanznam;	Flag;
Valdkund	Venäma
Eläjiden lugu (2021)	14,032 ristitud
Pind	15,09 km²
Telefonkod	+7−8162-xxx-xxx
Avtokod	53
Aigvö	UTC+3 (MSK+0)

Pestovo (ven.: Песто́во) om Venäman lidn Uz'lidnan agjan päivnouzmaižes čogas. Se om Pestovon ümbrikon (edel vn 2023 sulakud — rajonan) administrativižeks keskuseks da palaks.

Istorii

Eländpunktan aluz om pandud vl 1918 kuti Pestovo-raudtestancii jonol Krasnii Holm-lidnaspäi (Tverin agj), nimitihe lähižiden Venälaine Pestovo- i Karjalaine Pestovo-küliden mödhe. Niiden nimituz libui mehen personaližes Pest-nimespäi («petkloine»). Pihto-ded vasttab lidnan kodirandantedištandmuzejanno, om nimetomuden simvolaks venän keles. Radnikžilo sai lidnan statusad vl 1965.

Pestovo šingotase sirdandpertiden i puižiden keradaipertiden tehmižel, mugažo omblendedheotandoil.

Geografijan andmused

Lidn sijadase Molog-jogen hural randal tobjimalaz (Volgan bassein), 119 m ü.m.t. keskmäižel korktusel. Matkad Surhe Uz'lidnhasai om 263 km päivlaskmha orhal vai 297 km avtotedme, Piterihesai — 360 km lodeheze raudtedme, Moskvhasai — 380 km suvipäivnouzmha raudtedme. Lähembaine lidn om Ustüžn (Vologdan agj) 45 km pohjoižpäivnouzmha orhal vai 50 km avtol.

Klimat om ven kontinentaline. Heinkun keskmäine lämuz om +18,6 C°, kaikiš vilumb om viluku −9,4 C° keskmäiženke lämudenke. Paneb sadegid 645 mm vodes.

Tobmuz

Pestovo oli lidnankundan üks'jäižeks eländpunktaks. Lidnankundan pind oli 15,09 nellikkilometrad.

Lidnankundan tobmuden pämez' oli sen Deputatoiden nevondkundan ezimez'. Sen jäl'gmäižed pämehed oliba Dmitrii Kuzin (reduku 2020 — sügüz'ku 2023), Andrei Gazetov (reduku 2016 — reduku 2020). Lidnan Deputatoiden nevondkund om likvidiruidud vn 2024 vilukus, likvidacižen laudkundan ezimez' oli Svetlana Vinogradova vn 2023 redukuspäi. Lidnan erigoittud Administracii om likvidiruidud vn 2016 elokus, likvidator oli Irina Morozova vn 2015 sügüz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 15 903 ristitud, rajonan koume nelländest, vn 2021 — 14 032 ristitud. Kaik 15 461 eläjad oli lidnas vl 2017. Vll 1967−2019 lidnan ristitišt vajehtihe 15..16 tuhad eläjid röunoiš i kaikiš suremb oli 16 300 ristitud vl 2000.

Rahvahad (enamba 0,4 % vl 2021): venälaižed — 90,0 %, azerbaidžanlaižed — 0,9 %, ukrainalaižed — 0,5 %, uzbekad — 0,4 %, toižed rahvahad — 2,2 %, rahvahuden ozutandata — 6,0 %.

Ortodoksižen hristanuskondan viž pühäpertid^[1] oma saudud lidnas: koume jumalanpertid i kaks' časounäd. Baptizman loičendpert' om saudud vspäi 2002.

Lapsiden opendusen aluzkundad oma severz'-se päivkodid, koume keskškolad (nomer 1, 2, 6), čomamahtoiden škol, sportškol. Borovičin sauvondindustrijan da ekonomikan tehnikuman filial om lidnan professionaližen opendusen aluzkundaks.