Tarus

Tarus (ven.: Тару́са) om Venäman lidn da lidnankund Kalugan agjan pohjoižpäivnouzmas. Se om Tarusan rajonan administrativine keskuz.

Tarus
Таруса

Lidnanznam
Valdkund	Venäma
Eläjiden lugu (2019)	9,070 ristitud
Pind	12 km²
Pämez'	Jelena Kotova (reduku 2015—)
Telefonkod	+7−48 435-xx-xxx
Avtokod	40
Aigvö	UTC+3 (MSK+0)

Istorii

Eländpunkt mainitase ezmäižen kerdan vn 1246 Černigovan ruhtinasen aigkirjas. Lidnan aluz om pandud 11.-12. voz'sadal arheologijan kaivandusiden andmisiden mödhe. Nimitihe lidnad jogen mödhe, ende jogen nimi oli mugažo Torus (Торуса) i Tarusk (Таруска). Tarus sai makundan lidnan oficiališt statusad vl 1776, hot' lidnusen jäl'gmäižed varmitused oliba muretud vn 1760 sur'vedel. Toižen mail'man sodan aigan lidn oli okkupiruidud nacistoil lühüdan aigan (24. reduku — 19. tal'vku 1941) i kaiči ičeze istorižid näguid, regulärine sauvuz zavodihe vn 1779 lämoipalon jäl'ghe. Lidn eli külähižeks poleks, muga läheli suridennoks lidnoidennoks, i oli čomamahton šingotajiden sijaduseks 19. voz'sadan lopuspäi, dissidentoiden peitsijaks nevondkundaližen aigan.

Tarus šingotase sauvondmaterialiden pästandal (savič da keramik), poimetišiden fabrikal i čomamahtoližiden pramozloiden edheotandoil, turizmal (lebupert', pansionat, istorine pertišt, seičeme muzejad). Azegišton da kosmosan kaks' konstruktorbürod ratas lidnas. Mouckiven samine lidnan ümbrištos sauvondan täht.

Geografijan andmused

Lidn sijadase rajonan päivnouzmaižel röunal, Tarusan (ven.: Таруса 88 km pitte) oiktal randpolel, Okan hural randal, 140 m ü.m.t. keskmäižel korktusel. Tarus-jogi lankteb Okha lidnan pohjoižpäivnouzmas. Transport Okan-jogedme kävutase turistoiden täht päpaloin. Matkad Tulan agjhasai om 1 km päivnouzmha. Matkad Kalughasai om 64 km suvhe orhal vai 73 km avtotel. Lähembaižed lidnad oma Protvino (Moskvan agj) 16 km pohjoižhe orhal vai 29 km avtotedme, Serpuhov (Moskvan agj, raudtestancii) 26 km pohjoižpäivnouzmha orhal vai 32 km avtotedme, Aleksin (Tulan agj, raudtestancii) 26 km suvhe orhal vai 39 km avtotedme, i Žukov 44 km lodeheze orhal vai 59 km avtotedme.

Tarus om lidnankundan üks'jäine eländpunkt.

Eläjad

Vl 1939 lidnan ristitišt oli 3 994 eläjad. Vn 2010 Venäman rahvahanlugemižen mödhe lidnan eläjiden lugu oli 9 660 ristitud, rajonan koume videndest. Kaikiš suremb lidnan ristitišt oli 10 200 eläjad vll 1996−1998.

Ortodoksižen hristanuskondan viž pühäpertid oma saudud lidnas: phh. Petran da Pavlan päjumalanpert' (kivine, vspäi 1789), kaks' jumalanpertid i kaks' časounäd.

Rahvahad (2010): venälaižed — 91,9 %, ukrainalaižed — 2,1 %, armenijalaižed — 1,5 %, toižed rahvahad — 4,5 %.

Professionaližen opendusen aluzkund om Tarusan äiprofil'ne tehnikum (ende Proflicei nomer 34).

Galerei

• 
  Venäman Penziifondan alajagusen sauvuz (2012)
• 
  Leninan torg Pedroin da Pauloin päjumalanpertinke, vn 2006 nägu
• 
  Tarus lanktendanno Okanjogehe vl 2018
• 
  «Tarusa»-adivpert' (2008)
• 
  Konstantin Paustovskii-kirjutajan muzei vl 2015

Irdkosketused

• Lidnan tobmuden aluzkundoiden sait (tarusagorod.ru). (ven.)
• Lidnan da rajonan oficialine sait (mo.tarusa.ru). (ven.)