Šihani

Šihani (ven.: Шиха́ны) om Venäman lidn da lidnümbrik Saratovan agjan pohjoižes. Vhesai 2019 se oli sauptud lidn.

Šihani
Шиханы

Lidnanznam	Flag
Valdkund	Venäma
Eläjiden lugu (2021)	5,230 ristitud
Pind	9,84 km²
Pämez'	Anton Leščenko (kül'mku 2021—)
Telefonkod	+7−84 593-xx-xxx
Avtokod	64, 164
Aigvö	UTC+4 (MSK+1)

Istorii

Eländpunktan aluz om pandud vl 1820 kuti Vasilii Orlov-Denisov-grafan usadib. Vspäi 1923 Rusttan Armijan himižen azegišton kodvindstancii zavodi radod senno, möhemba armijan keskuzline himine poligon. Vl 1997 Šihani (ende Vol'sk-17) sai erižen lidnan statusad. «Šihan» znamoičeb izoliruidud kukkast päivlaskmha Suvižes Uralaspäi.

Vspäi 1961 Valdkundaline organižen sintezan tehnologijoiden institut radoi lidnas, se eci uzid morijoid i travijoid substancijoid i tegi niiden kodvindpartijoid vhesai 1993. Institut eli bankrotnendas läbi vl 2008, i nügüd' edheotand sen alusel pästab zellid (sidä kesken živatoiden täht), sädab himižen i tekstiližen tegimišton processoid.

Šihani šingotase tedoinstitutal i sen himižel tegimel, mugažo himižsubstancijoiden edheotandal maižandusen täht.

Geografijan andmused

Lidn sijadase 210 m ü.m.t. keskmäižel korktusel. Lähižed Šihani-2-žilo (Vol'sk-18-sodalidnut poligonanke, edel 2000 vot mülütihe Šihani-lidnha administrativižikš) i Šihani-4-žilo (arsenal) oma Vol'sk-lidnan paloikš. Matkad Saratovhasai om 103 km suvipäivlaskmha orhal, 136 km avtotel vai raudtel. Lähembaižed lidnad oma Vol'sk 10 km suvipäivnouzmha orhal, 15 km avtotedme vai raudtedme, i Balakovo 44 km päivnouzmha orhal, 53 km avtotedme vai raudtedme. «Saratov — Balakovo»-avto- i raudtekeskustad mändas 1 kilometras pohjoižpäivnouzmha lidnaspäi. Volgan oiged rand om 15 kilometras suvipäivnouzmha i suvhe.

Šihani om lidnümbrikon üks'jäine eländpunkt. Se om ümbärtud Vol'skan rajonan territorijal.

Eläjad

Vn 2010 Venäman rahvahanlugemižen mödhe lidnan eläjiden lugu oli 6 067 ristitud. Kaikiš suremb ristitišt oli 13 200 eläjad vl 1998, sodalidnuzita — 8 400 eläjad vl 2000.

Rahvahad (2010): venälaižed — 93,0%, čuvašalaižed — 2,2%, ukrainalaižed — 1,7%, toižed rahvahad — 3,1%.

Ortodoksižen hristanuskondan nell' pühäpertid oma avaitud lidnas: üks' Šihaniš (Jumalanmaman «Rigouskoi»-jumalaižen jumalanpert', 1997) i koume Šihaniš-2 (Mikulai-čudonsädajan vn 1997 jumalanpert' i vn 2012 časoun', ph. Lukan kodijumalanpert' sodaläžundkodinno).

Lähembaižed professionaližen opendusen aluzkundad ratas Vol'sk-lidnas.

Municipaližen ühtnikan edeline pämez' om Andrei Tatarinov (kül'mku 2016 — eloku 2021).

Irdkosketused

• Lidnümbrikon tobmuden aluzkundoiden oficialine sait (zatoshihany.ru). (ven.)