Storia del Vèneto

La storia del Veneto ła xe in gran parte comun co queła de ła più granda rejon conosùa come Triveneto o Tri Venesie, inte el Nord-est de ła penìzoła taliana, situà tra el confin del Mar Adriatico e tuta ła caena de łe Alpi Orientałi, che ła conprende Trentin-Alto Àdexe, Veneto e Friułi-Venesia Julia.

Protostoria e Storia Antica

El teritorio do che stava i Veneti ne l'età del fero

El Vèneto el zera abità za inte ła preistoria, da prima insediamento dei Euganei, el xe sta po, in epoca protostorica, ocupà dal popoło dei Veneti. Tito Livio, nativo de Padova, el ga scumensià ła so monumentałe storia de Roma col mito de Antenore che, scampando da Troia mentre che ła bruxava e guidando on gruppo de Troiani e de Eneti, popoło aleà proveniente da ła Pafłagonia, el xe rivà inte l'atuałe Golfo de Venesia. Inte ła tera estexa tra łe Alpi e el mare Adriatico, dopo aver parà via i Euganei, i se ga insedià cusì ste zente che i se ga fato ciamare Veneti. Antenore steso el saria sta el fondatore de Padova. Secondo na lezenda anałoga Diomede el gavaria fondà Adria mentre Clodio el gavaria fondà Cióxa. Łe xe comunque de serta origine venetica tante inportanti sità, cuałi Concordia, Oderzo (fra łe pì antiche - IX-VIII sec. a.C.), Este, Trevixo, Bełun, Altino, Vicensa e forse Verona.

Ła proveniensa anatołica dei Veneti adriateghi non ła xe acetà da tuti i autori antichi e ła xe ancor unquò ogeto de ciàcołe. Łe fonti antiche łe tramanda l'existenzea de vari fiłoni de l'etnìa vèneta, da ła Bretagna, a ła Luxazia, intrà Germania e Polonia, a l'Epiro in Grecia, a l'Axia Minore. Łigà a l'etnico veneto a ghe sarìa difarenti toponimi (ad es. ła Vindelicia, rejon corispondente a l'atuale Baviera, Vindebona - l'atuałe Vienna) e i nomi atribuìi a popołi de orixine slava in diverse łéngue eoropee. Secondo alcuni studioxi, łe sarìa queste łe testimonianse de on'unica siviltà indoeoropea che ła se estendeva dal Baltego a l'Adriatico, riconduxìbiłe ai cosideti popołi dei Campi de łe Urne.

El periodo roman

El teritorio de la Regio X Venetia et Histria

El proceso de romanizasion de ła Venetia el xe avegnù un toco a ła olta sensa traumi o conquiste manu militari, dato che i veneti e i romani i jera popołi ałeà uno co l'altro. Łe rełasion połitico-miłitari coi romani łe scominsia inte el III sec. a.C. : inte el 225-222 i veneti e i cenomani i strenze na ałeansa miłitar co Roma contro i insubri, i boi e i gesati, fornendo secondo Polibio un contingente de 20 000 òmeni. I gałi i vegnerà batù in teła storica bataja de Clastidium inte el 222. Inte el 181 a.C. ła dedusion de ła colonia de Aquiłeja ła rinforsa i tradisionałi raporti de cołaborasion tra veneti e romani.

In tel'epoca de Augusto el teritorio dei veneti el vien unìo e ghe vien dà un riconosimento ufiçial coła creasion de ła Regio X Venetia et Histria, prima co capital Padoa e dopo Aquiłeja. Nonostante i sconvolgimenti che ghe xe sta inte i primi secoli d.C., l'omogeneità e unità sostanziale de sto territorio no la xe mai sta alterà, tanto che Diocleziano el ga trasformà la region in Provincia Venetiae et Histriae, tegnendo i confini praticamente conpagni.

Nei primi secoli d.C. xe intacà el processo de cristianizazion del Veneto. El sentro de iradiamento de la nova religion el xera Aquileja, metropoli de la Venetia, in do che el Cristianesimo el xera rivà probabilmente dal mar. Secondo la tradizion xe sta San Marco 'Vangelista a fondar la Ceza de Aquileja, consacràndoghene vescovo Sant'Ermagora, martire soto de Nerone. San Marco el gavaria inoltre mandà el greco Prosdocimo a evangelizar Padoa, Asolo, Vicensa, Treviso, Altino e Este. A l'evangelizazion de Verona gavaria contribuìo na comunità cristiana che vegnea da l'Africa romana; africano xe anca San Zen, el patrono de la sità.

Storia Medieval

Dal V a l'XI secoło - Se ronpe l'unità teritorial veneta

La fondazion de Venexia e la festa del popolo veneto

Secondo la leggenda, Venexia la xe nata el 25 marzo 421. Marin Sanudo, inte el De origine, situ et magistratibus Urbis Venetiae el riporta che "Venezia fo comenzada a edificar ... del 421, adì 25 Marzo in dì di Venere circha l'hora di nona ascendendo, come nella figura astrologica apar, gradi 25 del segno del Cancro. Inte el qual dì ut divinae testantur litterae fo formato el primo homo Adam inte el principio del mondo par le mano di Dio; oncora in ditto dì la verzene Maria fo annunciada dall'angelo Cabriel, et etiam il fiol de Dio, Christo Giesù, inte el suo immacolato ventre miraculose introe, et secondo l'opinione theologica fo in quel medesmo dì da Zudei crucefisso". Secondo n'altra tradizion, de origine padoana, la sità la xe sta fondà da tri cònsoli mandà da Padoa, fasendo consacrar la Ceza de San Giacomo in Rialto. La storia ufizial de la Serenissima la vegnea datà dal 421, mentre el scominsio del calendario zivil el xera fissà inte el mese de marzo, ma par comodità, el capodano el xera antisipà al primo marzo (Capodano Veneto); par no confóndarse, inte i documenti internazionai le date che fasea riferimento al calendario veneto le vegnea indicà co m.v. (more veneto). Riconosendo l'inportanza de sto avegnimento ne la storia veneta, e la partisipazion corale a la fondazion de la propria capitale storica, el Consejo Regional el ga decidesto de istituir el 25 Marzo come festa del popolo veneto.

Łe prime infiltrasion de tribù barbariche inte el teritorio de ła rejon łe vu łuogo zà inte el 168-169 d.C. col sachejo de Oderzo par opara dei Quadi e dei Marcomani. A xe sta tutavia a partir dal V sec. d.C. che łe incursion łe se ga fato pì frequenti e pì devastanti (Goti, Eruli, Unni). Ciononostante, el quadro rejonałe el restava oncora sostansialmente unitario; łéngua, scritura, istitusion, tecniche agricołe e manifaturiere, pur indebołie, łe xe sopravisù a l'inpato de sta ondata barbarica.

Xe sta solo a partire dal 568 d.C, co la disesa in Italia dei Longobardi - invasion che xe sta contà da Paolo Diacono ne la so Historia Langobardorum - che ga tacà a crearse (tra el VI e el VIII secolo) na division senpre pi netta tra la Venetia interna, soto el dominio longobardo e la Venetia maritima dipendente da l'Inpero bizantin e da l'Esarcato de Ravenna. Gran parte de le popołasion e le autorità religiose le se ga trasferìo da le sità de l'interno ai sentri lagunari (Grado, Caorle, Civitas Nova-Heraclea, Torseo, Malamocco, Olivolo, Ciosa, oltre ad Ammiana e Costanziaca uncuó sparìe).

Co la conquista longobarda de Ravenna a la metà de l'VIII secolo, el territorio lagunar el deenta senpre pi autonomo da l'inpero bizantin, del quale el resta formalmente dipendente. Dal trasferimento de la sede del dux bizantin da Civitas Nova, su la teraferma, a Malamocco, ne le ìzołe lagunari (e da de qua, al scuminsio de l'VIII secolo a "Rivo Alto", la Rialto de desso), tol origine la sità de Venexia. Risale a l'811 el primo atto giuridico inte el cuało la sovranità del Dogado la xe stabilìa ufizialmente: el tratato intrà Carlo Magno e l'Inpero Bizantin. La separazion anca formal intrà i due mondi de la laguna e de la teraferma (anca se ga continuà a èsarghe na forte osmosi) la xe rivà co la definizion dei confini (terminatio) intrà el Ducatus Venetiarum e el Regnum Langobardorum, siglà dal re Liutprando e dal primo doxe Paulicio Anafesto.

Inte la teraferma veneta, che la xera drio cognósar un rapido declino, al comando de le sità prinsipai se ga piazà dei duchi longobardi. Na serta continuità de la vita sitadina la xera garantìa dai vescovi, divegnesti riferimenti autorevoli in canpo moral, cultural e social. Intel 827 xe sta sancìa anca dal punto de vista religioso na division intrà el mondo del Veneto continental e de la Venexia maritima: i vescovi de la teraferma i xera soto l'autorità de la sede metropolita de Aquileja, inveze le nove sedi diocesane vegneste su ne la laguna le dependea dal patriarca de Grado.

La Marca de Verona e i teritori de la Republica Veneta ne l'anno Mile

L'arivo dei Franchi, che i ze subentrà ai Longobradi inte el IX secolo, costituendo ne la pianura padana el Regnum Italia, no'l ga canbià le robe. Un tentativo de Pipino, fiol de Carlo Magno, de conquistar la Venetia Maritima, formalmente dipendente da Bisanzio, el xe sta eficacemente respinto dai veneti. El vuoto de poteri, la dilagante conflitualità, le tremende agresion dei Ongari, che ga colpìo el Veneto continental, la xe ga vu fin verso la metà del X secolo, col ristabilimento de l'autorità inperial da parte de Otone I: el xe sta lu che el ga agregà inte el 962 un grando teritorio de l'Italia nord-oriental al ducato de Baviera e sucessivamente, inte el 976, al ducato de Carinzia. L'organismo che xe vegnesto fora, e che el gavea finalità de cerniera intrà Germania e Italia, el xe sta ciamà Marca Veronese, dal nome de la so sità prinsipal. Da la Marca se ga destacà inte el 1027 el teritorio de la diocesi de Trento, che el se ga organizà in prinsipato eclesiastico e el Friuli inte el 1077, che el ga scuminsià na so storia autonoma soto l'autorità dei Patriarchi de Aquileja.

I ligami intrà la Marca Veronese e l'Inpero i xera rinforzà da la presenza inte el teritorio de diverse dinastie feudali de origine germanica: tra le pi famose, destinà a zugar un ruolo inportante inte i secoli sucessivi, ghe xe i Estensi, i da Romano, i Caminesi, i Cararesi.

Dal XII al XIV Secoło - Comuni, Signorie e ascesa del Dogado de Venesia

Tacando dai primi decenni dopo l'ano Mile, sa vedesto in tuto el Veneto na forte cresita econòmega e na ripresa de la vita social ne le sità prinsipai, che le ga scuminsià a esersitar un controlo egemonico sul so contado. Ne la Marca Veronese (che a partir dal 1200 la scuminsiava a vegner ciamà col nome de Marca Trevisana), xe vegnù su via via i comuni lìbari de Verona (1136), Padoa (1138), Treviso e Vicensa.

Dentro de sta federazion de sentri urbani e teritori lagunari, da Grado a Loreo, che el xera el Dogado, se ga afermà la sità de Venexia, inponente organismo urbano che se ga svilupà intorno al polo mercantile de Rialto e sentro di na entità pułìtega gelosa asè de la propria autonomia. A partir da l'XI secolo, Venexia la se ga inposto come potenza egemone in tuto quanto el Mediteraneo, tacando na espansion colonial che la rivà al so culmine durante la Quarta Crociata, co la creazion inte el 1205 de l'Inpero latin d'Oriente, e el dominio su la quarta parte e meza de l'inpero de Romania, o sia del vecio inpero bizantin. El Stato da Mar el rivava a includar, oltre ai teritori de l'Istria e de la Dalmazia, le ìzołe Ionie, Creta, Cipro, e tuta quanta na serie de basi e piazeforti inte el Peloponeso, ne l'Egeo e in Asia Minore.

Però anca se el mare l'era la fonte primaria de la so richeza, Venexia no la ga mai perdesto l'interesse par quel che sucedea ne l'entrotera: la ga mantegnesto forti ligami in particolare inte el Trevisan e inte el Padoan, la ga apogià la Liga Veronese e la ga aderìo a la Liga Lonbarda. Dopo la xe riussìa a verghe un ruolo prestigioso de mediatrice (e insieme de terza forza) intrà el papa Alessandro III e l'inperador Federico Barbarossa, co la riconciliazion tra i du selebrà in San Marco inte el 1177 (Pace de Venexia).

I teritori controlà dai Scaligeri de Verona inte el 1336

Inte el Doxento in tuta ła Teraferma i lìbari Comuni i xe deentà de łe Signorie in lota tra de lore par l'egemonia regional. Ła prima signoria ła xe stà queła de Ezelin da Roman, che l'è stà bon de conquistar gran parte del Veneto sentro-setentrional. Trevixo l'è ndà in man ai Da Camin, a Verona inte el 1262 ze ndà su i Scaligeri, a Padoa i Carraresi. Se pol dir che ła prima "unificasion" del Veneto ła xe stà tentà proprio dai Scaligeri, che co Cangrande i xe riusìi inte el periodo 1311-1329 a ciapar Vicensa, Feltre, Bełun, Padoa, Trevixo e dopo, soto Mastino II, anca Parma, Lucca e Massa. Parò inte el 1339 i xe stà sconfiti da na lega formà da Venesia, Firenze e Milan e i gà perso quaxi tuto.

El XV secoło: łe Dedision a San Marco e ła riconpoxision de l'unità veneta

Anca se Venexia la gavea inte el mar el sentro dei so intaressi econòmeghi, la ga senpre mantegnesto vivi i ligami col proprio entrotera, esercitando na forte atrazion su le turbolente sità de la Marca Trevigiana. Zà inte el 1291 Mota de Livenza la xe passà a la Republica, primo teritorio de Teraferma a darse liberamente e spontaneamente al goerno de Venexia, goadagnandose el titolo de fiola primogenita de la Repubblica. Xe sta parò a partir dal XIV secolo che la Serenissima la ga tacà a intervegner in maniera senpre pi decisa ne la pułìtega regional, soratuto par inpedir che el potente Stato dei Cararesi el metesse in pericolo le vie di comunicazion terestri e fluviali.

Inte el 1339 xe sta Treviso col so teritorio, fin a chel momento dominà dai Scaligeri, a darse spontaneamente a Venesia, costituendo il so primo ànpio caposaldo in Teraferma. El potere e l'influenza senpre pi granda de la Republica i ga susità le gelosie dei so vizini, che inte el 1379 i ga costituìo na formidàbiłe coalizion che riunea i Cararesi, el Duca d'Austria, el Re de l'Ongaria, el Patriarcato de Aquileja e Genova, scatenando contro Venexia quella che sarìa passà a la storia come la Guera de Ciosa e conclusa inte el 1381 co la vitoria sul mar contro Genova e la perdita de Treviso par parte de tera. Durante la guera, la Republica marciana la ga ris-cià seriamente de èsar travolta e la ga capìo la necessità de entrare risolutamente ne le contese pułìtego-militari de la penìzoła taliana, tanto pi che sta deentando pericolosa la minaccia del Stato visconteo, che el savea inpadronìo, intrà el 1387 e el 1390 de na gran parte del Veneto.

In seguito xe sta de novo Francesco Novello da Carrara a minacciar l'acerchiamento: Venexia la ga reagìo in maniera decisa e dopo ver riciapà Treviso inte el 1388, la ga batùò definitivamente i Cararesi inte el 1405 espugnando Padoa. Intanto s'avea dato a Venexia in rapida sucesion praticamente tute le tere de la Marca Trevisana: el 28 aprile 1404, el Senato Veneto l'accetta co do soli voti de majoranza la dedizion de Vicensa; pochi dì dopo xe la olta de Cologna, de Belun, de Basan, de Feltre, quindi i Sete Comuni de l'Altopian de Asiago, e par ultima Verona el 22 zugno 1405. L'unità del Veneto l'era praticamente riconposta. Par ste tere, oltre a la fin dei confliti e a l'instaurazion de un governo stàbiłe e rispetà, le dedizion a la Serenissima la ga significà, de solito, la concesion de particolari statuti de autonomia che i garantea che vegnesse mantegnùi gran parte dei istituti e de le leggi che ghera prima: el Stato da Tera el nasea de fato come un Stato federal ante litteram.

Nei decenni sucessivi el Stato veneto el ga espanso ben al de là dei confini de la region de desso, includendo oltre al Cadore (1420), el Friul (1420), la Lonbardia oriental (1428), co Bresia, Bergamo e Crema e infin el Polesine (1482).

Storia Moderna

El XVI secoło: ła Pax Veneta

La Republica Veneta inte el 1796

In teła seconda metà del '400 e al scominsio del '500, Venesia ła gà continuà ła so połitica espansionistica, portando el Leon de San Marco in Romagna, Trentin meridional, a Gorizia, Trieste e parfin in Puglia. Poco prima de ła guera del 1509, ła Republica Veneta, tra Stato da Mar e Stato da Tera, ła forma un inpero plurietnico abità da veneti, lonbardi, furlani, istriani, romagnołi, dàlmati, croati, albanexi, pugliexi, greci e ciprioti, e el xe de fato uno dei Stati piasè potenti d'Europa.

Tanta grandeza no ła podea non susitar łe invidie dei tanti vizini: inte el 1508, dopo che i Veneti i gà vinto l'inperador de l'Austria tołéndoghe Trieste e Gorizia, se gà formà, par inisiativa del papa Giulio II, a cui Venesia ła gavea tolto łe sità de ła Romagna, na anplia ałeansa anti-venesiana, conosù come Liga de Cambrai, che ła gà dichiarà guera a ła Republica. I Venesiani i reagise coragioxamente, mobiłitando l'exercito soto el comando del valoroxo Bartolomeo d'Alviano, ma el 14 de majo 1509 i vien batù ad Agnadello inte el cremasco dai Fransexi de Luigi XII. In póchi giòrni gran parte del Stato da Tera el vien ocupà, e soło Trevixo e el Friul i rexiste, restando fedełi a ła Serenisima. Nonostante ła situasion ła fuse desperà, i Venesiani parò no i se perde d'animo, e specialmente el popoło el dimostra un grando atacamento par ła Republica. Póco dopo ła coałision ła se sfalda, anca grasie a l'abiłità diplomàtega dei Venesiani, e dopo ła vitoria de Marignano ła Serenisima ła riconquista quaxi tuta ła teraferma (tra łe tere perdùe ghe xe l'Anpezan, che el restarà soto l'Austria fin al 1918).

Finìo el tenpo de łe guere, dal 1530 se verze par tuto el Veneto un longo periodo de pase e de svilupo, che continuarà, sensa interusion significative, par quaxi tri secołi, fin al 1797.

Storia Contenporanea

L'invaxion de Napoleon e el dominio austriaco

Le tere venete soto el dominio austriaco inte el 1803

El Regno d'Italia soto Napoleon (1805-1815)

Inte el 1796-97 ła Serenisima Republica ła xe stà invaxa da Napoleon Bonaparte, che dopo na serie de sachegi e de scontri sanguinoxi (come łe Pasque Veronexi), el ghe el ga data a l'Austria in canbio del Belzo. L'Austria la ga spartìo la Republica in tanti tochi, ognuno 'ministrà come na senplice provincia de l'inpero austriaco, senza funzioni de Stato. El governo austriaco el xe stà in generałe benevoło, co un'aministrasion pitosto eficiente e onesta, el gà çercà de darghe un çerto benèsere ai so sùditi, ma no l'era parò mìa tanto liberałe. Inte el 1805 el Veneto el xe pasà soto la Francia, par dopo ritornar soto l'Austria dopo la sconfita definitia de Napoleon inte el 1815. Ła zona che corisponde più o meno a l'atuałe Region Veneto, più łe province de Udine e de Pordenon, ła restarà soto ła dominasion de l'Inpero Austriaco par altri 50 anni, come parte del Regno Lonbardo-Veneto.

Le province austriache del Lonbardo-Veneto

Durante sto periodo el Veneto el gà partecipà ai moti risorgimentałi col'eroica ribelion e rexistensa de Venesia del 1848-1849.

El Plebiscito del 1866

La situazion a la vizilia de la Tersa Guera de Indipendensa

Dopo de ła guera Austro-Prussiana del 1866 (bataja de Sadowa) l'Austria sconfita ła gà dovù darghe el Veneto a Napoleon III de Francia. El tratato de pace de Viena firmà el 3 de otobre 1866 el dixea testualmente che ła cesion del Veneto (con Mantoa e Udine) al Regno d'Italia (che el beneficiava de ła vitoria prusiana anca se l'era stà batùo da l'Austria sia par tera a Custoza che par mar a Lissa) ła dovese avegner soto riserva del consenso de łe popołasion debitamente consultàe.

Napoleon III el ga provedesto a pareciar un plebisito, rispetando le decision del tratado de pase, ma i Savoja i ga fato presion su de lu parché el ghe lasése ai taliani le forteze e el controlo militar de la region senza spetar i risultadi de la votazion. El conte di Gramont, a cui ghera stà dato in carico la 'ministrazion provisoria del teritorio (che el conprendea el Veneto, Mantoa e el Friul), el gà zercà de rispetar l'inpegno. A la fin parò i Savoja i ga insistìo tanto che Napoleon III el gà decidesto de lasar perdar, e el gà ordinà al conte de Gramont de ritirarse e de consegnar le forteze e lasar che i taliani i ocupese el teritorio. Cussita el plebisito el xe stà organizà dai Savoja, che i ga fato in maniera da no dover contratar gnente coi Veneti, che secondo alcuni i ga perdesto cussita l'ultima s-cianta de autonomia e de libertà che oncora i gavea.

L'accesso a le operazion de voto, come par altri plebisiti de l'epoca (come quel fato par l'anesion de Nizza a la Francia), e par ogni altra consultazion eletorale de l'epoca, l'era esluso a le done e limità par censo: par cui el ga interessà solo na parte minoritaria de la popołasion (manco de 650 000 votanti su un totale de 2.603.009 residenti).

El risultato final (646.789 sì; 69 no; 567 voti nulli), el rispechia, secondo alcuni studi storici, l'asołuta mancansa de segreteza inte el voto e de trasparensa in tełe operasion de scrutinio. In sta maniera, ła sostansiałe sconfita miłitar del Regno d'Italia in teła Terza guera de indipendensa itałiana del 1866 l'è stà fata deventar un suceso połitico par i Savoia.

L'anesion a l'Itałia

El dominio dei Savoia no'l gà portà tanti vantagi soto l'aspeto econòmego: łe tase łe jera piesè alte de quełe austriache, i servizi inferiori, e ła burocrasia manco vałida rispeto a ła proverbial eficensa burocràtega austriaca. A ła perdita dei marcà de l'Europa çentral xe seguìo un periodo de crixi econòmega. Dopo l'anesion al Regno d'Itałia e fin a ła Prima guera mondial ghe xe na intensa emigrasion dal Veneto, in particołare verso Argentina, Uruguay e Braxil. Inte el periodo 1884-1886 scopia na grosa rivolta contadina, conosùa co nome de "Ła Boje".

Durante la I guera mondial na parte del teritorio ła xe stà invaxa e ła gà subìo gravi dani.

El fenomeno de l'emigrazion l'è ripreso inte el primo dopoguera, direto soratuto verso i stessi Paesi de la Amèrica Latina che i gavea risevùo le presedenti ondate migratorie provenienti dal Veneto. Staolta la xe sta comunque na emigrazion organizà na s-cianta mejo.

La Seconda Guera Mondial la ga portà nove distruzion, specialmente par via dei bonbardamenti aerei (particolarmente feroce xe sta quelo che ga colpìo e butà zo bona parte de Treviso).

Finìa la guera, xe riscuminsià l'emigrazion, che la ga interessà, oltre a Argentina, Uruguay e Brasil, anca Venesueła, Colombia, Stati Uniti, Canada e Australia. Flussi migratori a breve termine i se ga vu verso el Belzo, la Francia e la Germania.

Na riserca del CSER (Centro Studi Emigrazione - Roma) la stima in zirca 3 300 000 le persone emigrà inte i anni dal 1876 al 1976 dal Veneto, de fato la region italiana co piasè emigrati in sto periodo (seconda xe la Canpania, co 2 500 000). Se calcola che ghe sia inte el mondo zirca 9 milioni de oriundi veneti.

A scominsiar dai ani otanta del XX secoło, l'emigrasion ła sà esaurìo e, da de lora, el Veneto el xe devegnesto tera d'imigrasion. Na parte picenina dei novi rivè i xe in realtà çitadini itałiani, emigrà durante i ani duri, che i torna ai so paexi; a olte i parla na version de ła łéngua veneta piesè "arcaica" de queła che se parla deso inte el Veneto. Inte łe ultime elesion i çitadini italiani che sta a l'estero i gà podù votar.

Altri projeti

Altri progetti

• Wikimedia Commons

• Wikimedia Commons el detien imàjini o altri file so Storia del Vèneto

Linganbi foresti

• La Grande Storia dei Veneti, carton animato col Dino da Sandrà realisà dal Consiglio Regional del Veneto