ಕಡ್ಲೆ ಬೇಳೆದ ಪಂಚ ಕಜ್ಜಾಯ

ಕಡ್ಲೆ ಬೇಳೆದ ಪಂಚ ಕಜ್ಜಾಯ ತುಳುನಾಡುಡು ಒವ್ವೇ ದೈವ ದೇವೆರೆನ ಕಾರ್ಯೊಲು ನಡೆನಗ, ಅಲ್ಪ ಆಪಿನ ಆ ಪೂಜೆಗ್ ಪಂಚ ಕಜ್ಜಾಯ ಒಂಜಿ ಬೋಡೇ ಬೋಡು. ಪಂಚ ಪಂಡ ಐನ್ , ಅಂಚ ಐನ್ ಪದಾರ್ಥೊಲೆನ್ ಗಳಿಸದ್ ಮನ್ಪನ ಕಜ್ಜಾಯ ಅಥಾವೊ ಪ್ರಸಾದನೇ ಪಂಚ ಕಜ್ಜಾಯ. ಪಂಚ ಕಜ್ಜಾಯೊನು ಬೇತೆ ಬೇತೆ ವಿಧೊಲೆಡು ತಯಾರು ಮನ್ಪುವೆರ್, ಉದಾರ್ಮೆಗ್ ಪೊದ್ದೊಲುದ ಪಂಚ ಕಜ್ಜಾಯ, ಬಜಿಲ್ದ ಪಂಚ ಕಜ್ಜಾಯ, ಪದೆಂಗಿದ ಪಂಚ ಕಜ್ಜಾಯ, ಕಡ್ಲೆ ಬೇಳೆದ ಪಂಚ ಕಜ್ಜಾಯ, ಪೊತ್ತುದಿನ ಕಡ್ಲೆದ ಪಂಚ ಕಜ್ಜಾಯ, ನುಂಗುದಿನ ದ್ರಾಕ್ಷಿ ಬೊಕ ಬೀಜದ ಪಂಚ ಕಜ್ಜಾಯ. ಈ ವಿಭಾಗೊಡು ಕಡ್ಲೆ ಬೇಳೆದ ಪಂಚಕಜ್ಜಾಯ ಮನ್ಪನ ವಿಧಾನೊನು ತೆರಿಕ.

ಕಡ್ಲೆ ಬೇಳೆದ ಪಂಚಕಜ್ಜಾಯ ಮನ್ಪರೆ ಬೋಡಾಪಿನ ಸಾಮಾಗ್ರಿಲು

ಕಡ್ಲೆಬೇಳೆ - 1/2 ಲೋಟ

ಬೆಲ್ಲದ ಪೊಡಿ - 1/4 ಲೋಟ

ನುಂಗುದಿನ ತಾರಾಯಿದ ಪೂ - 1/4 ಲೋಟ

ಏಲಕ್ಕಿ - 3-4

ಪೆತ್ತದ ನೈ - 1 ಚಮ್ಚ

ಕಪ್ಪುದ ಎಡ್ಮೆ - 1 ಚಮ್ಚ

ಕಡ್ಲೆ ಬೇಳೆದ ಪಂಚಕಜ್ಜಾಯ ಮನ್ಪುನ ವಿಧಾನೊ

ಕಡ್ಲೆಬೇಳೆನ್ ಪರಿಮಳ ಬನ್ನ ಮುಟ್ಟ ಪೊತ್ತೊಡು ಬೊಕ ಪೊತ್ತೊಂದು ಉಪ್ಪುನಗ ಒಂತೆ ಕಂದು ಬಣ್ಣೊಗು ಬನ್ನಗ, ಮಧ್ಯಮೊ ಉರಿಟ್ ಬೆಚ್ಚ ಮನ್ಪೊಡು, ಪೊತ್ತರೆ ಬುಡರೆ ಬಲ್ಲಿ. ಆಯಿ ಬೊಕ್ಕ ಒಂಜಿ ತಟ್ಟೆಗ್ ಪಾಡುದು ಚಪ್ಪೆ ಆವರೆ ಬುಡೊಡು. ತಾರಾಯಿದ ಪೂ ತಾ ಪೂರಾ ನೀರುದ ಅಂಶೊಲು ಪೋನ ಮುಟ್ಟ ಪೊದ್ಪೊಡು. ಎಡ್ಡೆ ಪರಿಮಳ ಬನ್ನಗ ಒಂಜಿ ತಟ್ಟೆಗ್ ಪಾಡುದು ಚಪ್ಪೆ ಆವರೆ ಬುಡೊಡು. ಪೊತ್ತುದಿನ ಕಡ್ಲೆ ಬೇಳೆನ್ ಮಿಕ್ಸಿ ಜಾರ್ ಗ್ ಪಾಡುದು, ಏಲಕ್ಕಿ ಸೇರಾದ್ ಪೊಡಿ ಮನ್ಪೊಡು, ಬೊಕ ಒಂಜಿ ಬಟ್ಟಲ್ ಗ್ ಪಾಡೋಡು. ಬೊಕ ಪೊತ್ತುದಿನ ತಾರಾಯಿದ ಪೂಲೆನ್ ಅವ್ವೇ ಜಾರ್ ಡ್ ಪಾಡುದು ಪೊಡಿ ಪೊಡಿ ಮನ್ಪೊಡು. ಬೊಕ ನೆಲಗಡಲೆ ಪಾಡುದಿನ ಬಟ್ಟಲ್ ಗ್ ಪಾಡೋಡು. ತಡ್ಕಾ ಬಾಣಲೆಡ್ ಪೆತ್ತದ ನೈನ್ ಬೆಚ್ಚ ಮಂತು, ಕಪ್ಪು ಎಡ್ಮೆದ ಬೀಜೋಲೆನ್ ಪಾಡುದು ಬೊಕ ಅವು ಕುದಿಯರೆ ಸುರು ಆನಗ ಜಾವೋಡು. ಬೆಲ್ಲನ್ ಪೊಡಿ ಮಂದಿನ ಮಿಶ್ರಣೊಗು ಸೇರಿಸಾದು ಬೊಕ ಪೊರ್ಲುಡು ಮಿಶ್ರೊಣ ಮನುಪೊಡು. ಅಡೆಗ್ ದೈವ ದೇವೆರೆಗ್ ದೀಯರೆ ಪಂಚ ಕಜ್ಜಾಯ ತಯಾರಾದುಪ್ಪುಂಡು, ದೈವ ದೇವೆರೆನಕಲೆಗ್ ಆರ್ಪಿಸಾದು ಪೂರೆರೆಗ್ಲ ಪಟ್ಟುದು ತಿನ್ಲೆ.

ಮರ್ದುದ ಅಂಶೊಲು

ಕಡ್ಲೆ ಬೇಳೆ ಪಂಚಕಜ್ಜಾಯ ರುಚಿಯಾಯಿನ ಒಂಜಿ ಪೌಷ್ಟಿಕ ತಿನರೆ. ಅಂಚಾ ಉಂದು ಆರೋಗ್ಯಕ್ ಬಾರೀ ಎಡ್ಡೆ. ಕಡ್ಲೆ ಬೇಳೆ ದೇಹೊಗ್ ಅವಶ್ಯಕವಾಯಿನ ಪ್ರೊಟೀನ್‌ ಕೊರ್ಪುಂಡು. ಕಡ್ಲೆಡ್ ನಾರುದ ಅಂಶ ಹೆಚ್ಚಾದುಂಡು ಅಂಚ ಜೀರ್ಣಕ್ರಿಯೆಗ್ ಮಸ್ತ್ ಉಪಕಾರಿ ಆತುಂಡು.