Rástágááh

Rástágááh (Turdidae) láá loddehiäimu. Suomâst kávnojeh 29 rástágâššlaaijâd, main 13 šlaaaijâd láá tobdoseh Aanaar kuávlust. Toh láá: kuávsuilodde (suom. punarinta), kielâviälgu (suom. sinirinta), čuovjispoođâs (suom. sinipyrstö), leibiloddááš (suom. leppälintu), miestârástágâš (suom. pensastasku), keđgirástágâš (suom. kivitasku), kiärdurástágâš (suom. sepelrastas), čapisrástágâš (suom. mustarastas), ränisrástágâš (suom. räkättirastas), laavlârástágâš (suom. laulurastas), veigilodde (suom. punakylkirastas) já vyevdirástágâš (suom. kulorastas).

Steinschmaetzer Northern wheatear male

Nomâttâsah

Puáris aalmugkielâst rástágâš lii lamaš vuovâs almosnomâttâs puoh tagarijd luddijd, moh láá lamaš stuárráábeh ko cissááh. Tondiet -rástágâš-nommâ oinuustâl motomijn loddenomâttâsâin talle-uv, veik miinii luudijd ij kuulâgin rástágái suuhân (omt. peljirástágâš).

Viehâ maaŋgârástágâššláájâst lii lamaš puáris nommâ. Táválumos rástágâš lii lamaš ränistástágâš, já eidu tondiet tot lii-uv uážžum kyeddiđ suuvâ almosnoomâ. ILWB addel toos paldâlâsnommân pecirástágâš, mii vist motomijn käldein lii merhâšumes tááhust epičielgâs. Noomâi vuáhádutmist rástágâš lii kuođđum ubâ suuvâ noomân, já ränisrástágâš lii finnim tááláá noomâs orjâlâškielâ myenster mield.

Kielâviälgust, mii muččâdvuođâs já mučis lávlumis tiet lii ain kiiddim huámášume, lii puáris nommâ. ILWB addel kielâviälgun noomâ loddeäđijâš, mii Nordlingist lii lamaš leibiloddáá nommân (eres variaantih loddärrijâš já loddeđjigâš). Puáris noomâs lii siäiluttâm meiddei keđgirástagâš.

Veigilodde vist lii lamaš taggaar lodde, mast láá kevttum maŋgâ aalmugnoomâ: čurčurrástágâš, rotorástágâš já ijjârástágâš. Veigilodde lii muorâ- já miestâmaddui ässee, já tondiet veidiloodân máhđulávt čujottává meiddei noomah miestârástágâs já maadârástagâš, veik taah noomah lává-uv miäruštâllâm ILWB:st tuše "mottomlágán lodden". Laavlârástágâžân lii motoimij käldein meiddei nommâ lávloorástágâš.

Ohtân čuolmân rástágái nommâpargoost lii lamaš čapisrástagâš-nommâ, mii ärbuvuáválávt lii kevttum kiärdurástágáást. "Mustarastas" ij jlah siämmáá távávâš Aanaar pirrâsijn, já tondiet taat lodde lii pááccám momâttáá. Kuittâg-uv ludij systemaaatlâš noomâtmist oroi luándulážžân sirdeđ čapisrástágâš-nooomâ eidu mustarastas-loodán, já nuuvt kiärdurástágâš uážui uđđâ noomâs lovnân orjâlâškielâ noomâst gierdo-rásttis.

Puáris kielâst ij lah kavnum nommâ čuávuvâš luuddijd: kuávsuilodde, čuovjispoođâš, čapisuáivrástágâš já vyevdirástágâš. Taah šlaajah láá Aaanaar kuávlust härvinâšah, já tondiet toh láá esken tai ivij uážžum noomâs. Taah noomah láá jurgâlusloovnah suomâ- já orjâlâškielâst.