ⵜⴰⵎⵖⵔⴰ

ⵜⴰⵎⵖⵔⴰ ⵜⴳⴰ ⵢⴰⵜ ⵜⴰⴼⵓⴳⵍⴰ ⵏⵏⴰ ⴷ ⵙⴽⴰⵔⵏ ⵎⵉⴷⴷⵏ ⴼⴰⴷ ⴰⴷ ⵙⵍⴽⵎⵏ ⵉ ⵡⵉⵢⵢⴰⴹ ⵎⴰⵙ ⵙⵉⵏ ⵉⴷ ⵓⴼⴳⴰⵏ ⴰⴼⵔⵓⵅ ⴷ ⵜⴰⴼⵔⵓⵅⵜ ⵏⵖ ⴰⵔⴳⴰⵣ ⴷ ⵜⵎⵖⴰⵔⵏ ⵎⵓⵏⵏ ⴷ ⵉⵏⴳⵔⴰⵜⵙⵏ ⴷ ⵉⵙ ⵜⴰⵀⵍⵏ

ⵜⴳⴰ ⵜⵎⴻⵖⵔⴰ ⴰⵙⴰⵜⵓⵔ ⵍⵍⵉ ⵉⵣⴷⵉⵏ ⵏⴳⴻⵔ ⵙⵏⴰⵜ ⵜⴼⴻⵔⴽⵉⵡⵉⵏ ⵖ ⵜⵓⴷⴻⵔⵜ ⵏ ⵓⴼⴳⴰⵏ. ⵜⴰⵎⴻⵣⵡⴰⵔⵓⵜ ⵉⵍⵍⴰ ⴳⵉⵙ ⵢⴰⵏ ⴷ ⴰⵢⴻⴷⴷⴰⵔⵙ ⵓⵔ ⴼⴻⵍⵍⴰⵙ ⵜⴻⵍⵍⴰ ⴽⵔⴰⵢⴳⴰⵜ ⵜⴰⵎⴰⵙⴰⵢⵜ, ⵉⵖ ⵉⵣⴻⵔⵉ ⵙ ⵜⵉⵙⵙ ⵙⵏⴰⵜ ⵜⴼⴻⵔⴽⵉⵡⵉⵏ ⴰⵔ ⴼⴻⵍⵍⴰⵙ ⵜⵜⵉⵍⵉ ⵜⵎⴰⵙⴰⵢⵜ ⴰⴷ ⵉⵙⴽⴻⵔ ⵜⴰⵡⵊⴰ ⵏⴻⵙ ⵍⵍⵉ ⵙⴻⵔⵙ ⵉⵥⴻⵍⵉⵏ.

ⵉⵖ ⵏⴻⵙⵙⴻⵏ ⵎⴰⵙ-ⴷⴷ ⴽⵔⴰⵢⴳⴰⵜ ⴰⴼⴳⴰⵏ ⴷⴰⵔⵙ ⵜⴰⵖⴰⵔⴰⵙⵜ ⵏⴻⵙ ⵍⵍⵉ ⵙⴰ ⵉⵣⵣⴻⵔⴰⵢ ⵜⴰⵎⵖⵔⴰ, ⴰⴼⴳⴰⵏ ⴰⵎⴰⵣⵉⵖ ⵓⵍⴰ ⵏⴻⵜⵜⴰⵏ ⴷⴰⵔⵙ ⵎⴻⵏⵏⴰⵡⵜ ⵜⵎⵢⵓⵔⵉⵏ ⴰⵔ ⵜⴻⵏⵜ ⵉⵙⴽⴰⵔ ⵖ ⵓⵙⵙⴰⵏ ⵏ ⵜⵎⴻⵖⵔⴰ.

ⵉⵖ ⵏⴻⵔⴰ ⴰⴷ-ⵏⵏ ⵏⴰⴳⴳ ⵙ ⵜⵎⴻⵢⵓⵔⵉⵏ ⴰⴷ, ⵉⵔⴰ-ⴷⴷ ⵏⴰⵙⵉ ⵙ ⵓⵎⴷⴻⵢⴰ « ⵜⴰⵎⵖⵔⴰ ⵖ ⵉⵛⵜ » ⵢⴰⵏ ⵓⴹⴻⵡⵡⴰⵔ ⵖ ⵉⴹⵓⵔⴰⵏ ⵏ ⵉⴼⴼⵓⵙ ⵏ ⵍⵎⵖⵔⵉⴱ ⵍⵍⵉ ⵙⵓⵍ ⵢⵓⵎⴻⵥⵏ ⵜⴰⵡⴻⵙⵙⵏⴰ ⵜⴰⵎⴰⵣⵉⵖⵜ ⵖ ⵉⵥⵓⴰⵏ.

ⵉⵔⴰ-ⴷ ⵏⴻⴱⴷⴻⵔ ⵜⵉⴼⴻⵔⴽⵉⵡⵉⵏ ⵍⵍⵉ ⵙⴰ ⵜⴻⵣⵔⴰⵢ ⵜⵎⴻⵖⵔⴰ ⵖ ⵉⵛⵜ ⵣⵖ ⵉⵖ ⵜⴻⵙⵙⴻⵏⵜⵉ ⴰⵔ ⵉⵖ ⵜⴻⵀⴻⵢⵢⴰ.

ⴰⵙⵙⵉⴳⴳⴻⵍ

ⵉⵖ ⵉⵍⴽⴻⵎ ⵓⴼⵔⵓⵅ ⵜⵉⵣⵉ ⵎⴰⵖ ⵉⵙⴽⴰⵔ ⵜⴰⵎⵖⴰⵔⵜ ⴰⵔ ⴷⵉⴷⵙ ⵜⵜⴻⵊⵎⵎⴰⵄⴻⵏ ⴰⵢⴻⴷⴷⴰⵔⵙ ⵎⴰⵙⵜⵉⴷ ⵉⵇⴰⵏ ⴰⴷ-ⵏⵏ ⵉⵙⵉⴳⴳⴻⵍ. ⴰⵔ-ⴷ ⵜⵜⴻⵎⵛⴰⵛⴽⴰⵏ ⵉⵍⴻⵎⵎⴰ ⴼ ⵜⴰⴼⵔⵓⵅⵜ ⵍⵍⵉ ⵔⴰ-ⵏⵏ ⵙⵙⵉⴳⴳⴻⵍⵏ, ⵖ ⵜⵓⴳⴻⵜⵜ ⵜⴰⵎⴻⵖⴰⵔⵜ ⴰⴷ ⵉⵙⵜⴰⵢⵏ ⵉ ⵢⵉⵡⵉⵙ ⵜⴰⴼⵔⵓⵅⵜ ⵍⵍⵉ ⵜⴻⵔⴰ ⴰⵛⴽⵓ ⵏⴻⵜⵜⴰⵜ ⴰⴷ ⵉⵙⵙⴻⵏ ⵉⵙⵜⵉⵙ ⵏ ⵜⵎⴰⵣⵉⵔⵜ ⵓⴳⴳⴰⵔ ⵏ ⵉⵔⴳⴰⵣⴻⵏ.

ⴰⵔ ⵜⴻⴷⴷⴰⵏ ⴰⵢⴻⴷⴷⴰⵔⵙ ⵏ ⵓⵄⴻⵣⵔⵉ ⵙ ⴷⴰⵔ ⵎⵉⴷⴷⴻⵏ ⵍⵍⵉ ⵙⵜⵉⵏ ⴰⴷ-ⵏⵏ ⴷⴰⵔⵙⴻⵏ ⵙⵉⴳⴳⵉⵍⵏ ⵙⵙⵓⵜⴻⵔⵏ ⴰⵙⴻⵏ ⵜⴰⴼⵔⵓⵅⵜ ⵉ ⵢⵉⵡⵉⵜⵙⴻⵏ. ⵉⵖ ⵓⵔ-ⵜⴰ ⴰⵙⴻⵏ-ⴷ ⵔⵓⵔⴻⵏ ⵀⴰⵏⵏ ⴰⵔ-ⴷ ⵜⵜⵓⵔⵔⵉⵏ ⵙ ⵜⴳⴻⵎⵎⵉ ⴰⵔ-ⴷ ⵜⴻⵏ-ⵉⴷ ⵉⵍⴽⴻⵎ ⵓⵔⵓⵔ ⵏⵙⴻⵏ. ⵉⵖ ⴰⵙⴻⵏ ⵔⵓⵔⴻⵏ ⴼ ⵓⵙⴻⵇⵙⵉ ⵏⴻⵙⴻⵏ ⵖ ⴰⴽⵓⴷ ⴰⵏⵏ ⵏⵉⵜ ⵀⴰⵏⵏ ⴰⵔ ⵜⵜⴻⴱⴱⵉⵏ ⴰⵊⵎⵓⵄ ⴼ ⵡⴰⵙⵙ ⵏ ⵜⵣⴳⴰⵡⵜ.

ⵖ ⵓⵙⵙⵉⴳⴳⴻⵍ ⴷⵔⵓⵙ ⵎⴰ-ⴷⴷ ⵉⵜⵜⴰⵡⵉⵏ ⵉⵏⴻⵖⵎⵉⵙⴻⵏ ⵖ ⴰⵢⵜ ⵜⵎⴰⵣⵉⵔⵜ ⵉⵙ ⵉⵍⵍⴰ ⴰⵛⴽⵓ ⴰⵔ ⵉⵜⵜⵓⵡⵀⴷⵉ. ⴰⵔ ⴽⵉⵖ ⵙⵙⴻⵏⵏ ⵎⵉⴷⴷⴻⵏ ⵉⵙ ⵜⴻⵍⵍⴰ ⵜⵣⴳⴰⵡⴻⵜ

ⵜⴰⵣⴳⴰⵡⵜ

ⵉⵖ ⵉⵍⴽⴻⵎ ⵡⴰⵙⵙ ⵍⵍⵉ ⴼ-ⴷ ⵎⵛⵓⵛⴽⴰⵏ ⵉⴷⵓⵍⴰⵏ, ⴰⵔ ⵜⵜⴰⵡⵉⵏ ⴰⵢⵜ ⵓⵄⵣⴻⵔⵉ ⵉ ⴰⵢⵜ ⵜⴼⵔⵓⵅⵜ ⵜⴰⵣⴳⴰⵡⵜ ⵖ ⵍⵍⴰⵏⴻⵜ ⵎⴻⵏⵏⴰⵡⵜ ⵜⵖⴰⵡⴻⵙⵉⵡⵉⵏ: ⵙⵏⴰⵜ ⵜⵢⵢⵉⴳⵉⵡⵉⵏ ⵏ ⵉⴷⵓⴽⴰⵏ, ⵍⵃⴻⵏⵏⴰ, ⵜⴰⵎⵍⴻⵃⴰⴼⵜ, ⴰⴷⵖⴰⵔ, ⵜⵉⴼⵢⵢⵉ ⵖ ⵓⴼⴻⵔⴰⵡ, ⵙⵏⴰⵜ ⵜⴻⵍⴱⴻⵜⵜⴰⵜⵉⵏ ⵏ ⵣⵣⵉⵜ, ⵙⵉⵏ ⵍⴻⵇⵡⴰⵍⵉⴱ ⵏ ⵙⵙⴻⴽⴽⴰⵔ...ⵎⴰⵢⴰⴷ ⵉⵍⵍⴰ ⵣⵉⴽⴽ ⵖⵉⵍ-ⴰⴷ ⴰⵔ-ⵏⵏ ⴰⴽⴽⴰⵏ ⴳⵉⴳⴰⵏ ⵏ ⵜⵖⴰⵡⵙⵉⵡⵉⵏ ⵍⵍⵉ ⵙⵓⵍ ⵓⵔ ⵜⵓⵙⵉ ⵜⵣⴳⴰⵡⵜ ⵖ ⵍⵍⴰⵏ ⵉⵀⴷⵓⵎⴻⵏ ⵉⵜⵔⴰⵔⴻⵏ, ⵓⵔⵥⵉⵢⴻⵏ... ⵢⵉⵍⵉ ⵎⴰⴷ-ⵏⵏ ⵢⴰⴽⴽⴰⵏ ⵉⴷⵔⵉⵎⴻⵏ ⵖ ⵓⵎⴻⵔⴰⵙ ⵏ ⵜⵖⴰⵡⵙⵉⵡⵉⵏ ⴰⴷ.

ⴰⵔ ⵙⴻⴱⵔⵔⴰⴽⴻⵏ ⴰⵢⴷⴷⴰⵔⴻⵙ ⵏ ⵓⵄⵣⴻⵔⵉ ⵙ ⵉⴹⵓⵍⴰⵏ ⵏⵙⴻⵏ ⵙ ⵜⴳⴻⵍⵍⴰ ⵏ ⵓⵙⴻⵏⴳⴰⵔ ⵖ ⵎⴰⵢⴰⴷ ⵉⵣⴻⵔⵉⵏ ⵖⵉⵍ ⴰⴷ ⵉⵙ ⴰⵙⴻⵏ ⴰⴽⴽ ⵙⴻⴽⴰⵔⴻⵏ ⵜⵉⵔⴻⵎⵜ.

ⵉⵖ ⵣⴻⵔⵉⵏ ⵎⴻⵏⵏⴰⵡ ⵓⵙⵙⴰⵏ ⴰⵔ-ⴷ ⵙⵡⵡⵉⵔⵔⴰⵢⴻⵏ ⴰⵢⴷⴷⴰⵔⴻⵙ ⵏ ⵓⴼⵔⵓⵅ ⵜⴰⵣⴳⴰⵡⵜ ⵉ ⴰⵢⵜ ⵜⴼⵔⵓⵅⵜ ⴰⵔ-ⴷ ⴳⵉⵙ ⵉⵜⵜⵉⵍⵉ : ⵜⵉⵍⵓⵣⴰ, ⵜⵉⴳⵍⴰⵢ ⵏⴻⵡⴰⵏⵉⵏ, ⵟⴰⵊⵉⵏ ⵉⵏⴻⵡⴰⵏ. ⵢⵉⵍⵉ ⵖⵉⵍ-ⴰⴷ ⵎⴰⴷ ⵢⴰⵇⴻⵔⴰⵏ ⵉ ⵎⵉⴷⴷⴻⵏ ⵏ ⵜⵎⴰⵣⵉⵔⵜ ⴰⴷ ⴷⴰⵔⴻⵙ ⵛⵉⵏ ⵉⵖ ⴰⵙ-ⴷ ⵜⵡⵉⵔⵔⵉ ⵜⵣⴳⴰⵡⵜ.

ⵓⴽⴰⵏ ⵉⵖ-ⴷ ⵏⵓⵛⴽⴰ ⴰⴷ ⵏⵣⴻⵔ ⵜⴰⵣⴳⴰⵡⵜ ⴰⴷ ⵎⴰⴷ ⵜⴳⴰ ⴰⵔ-ⵜⵜ-ⵉⵏⵏ ⵏⴻⵜⵜⴰⴼⴰ ⵉⵙ ⵜⴳⴰ ⴰⴱⵔⵉⵀ ⵏ ⵓⵙⵉⴳⴻⵍ, ⴰⵛⴽⵓ ⴰⵔ-ⴷ ⵜⵜⴰⵡⵉⵏ ⴰⵢⵜ ⵜⵎⴰⵣⵉⵔⵜ ⵉⵏⴻⵖⵎⵉⵙⴻⵏ ⵎⴰⵙ ⵉⵍⵍⴰ ⵓⵙⵉⴳⴳⴻⵍ.

ⵉⴼⵉⴼ

ⵉⵖ ⴰⴳⵔⴻⵏ ⴽⵔⴰⴷ ⵓⵙⵙⴰⵏ ⵉ ⵜⵎⴻⵖⵔⴰ ⴰⴷ ⵜⴻⵙⵙⴻⵏⵜⵉ ⴰⵔ ⴰⵜⵜⴰⵏ ⴰⵢⵜ ⵉⵙⵍⵉ ⵓⵍⴰ ⴰⵢⵜ ⵜⵙⵍⵉⵜ ⵜⵓⵎⵥⵉⵏ ⴷ ⵉⵔⵔⴻⴷⴻⵏ ⵖⵓⵙⵏⵉⵏ ⴼⴰⴷⴷ ⴰⴷ ⴰⵙⴻⵏ-ⵜⴻⵏ-ⵉⴷ ⵥⴹⵉⵏ ⵖ ⵉⵣⴻⵔⴳⴰⵏ ⵏⵙⴻⵏ ⴼⴰⴷⴷ ⵉⵍⴻⵎⵎⴰ ⴰⴷ ⵢⴰⴼⵓⴼ. ⴰⵔ ⴷⴰⵖ ⵜⵜⴰⵡⵙⴻⵏ ⵉ ⴱⴰⴱ ⵏ ⵜⵎⴻⵖⵔⴰ ⴰⴷ-ⴷ ⵢⴰⴳⵡⴻⵎ ⴰⵎⴰⵏ ⵉⵣⴷⴻⵎ-ⴷ.

ⵎⴰⵢⴰⴷ ⴰⵔ ⴰⵖ ⵉⵎⵎⴰⵍⴰ ⵜⴰⵎⵓⵏⵜ ⴷ ⵜⵡⵉⵙⵉ ⵏⴳⴻⵔ ⴰⵢⵜ ⵜⵎⴰⵣⵉⵔⵜ ⵖ ⵜⵎⵓⴽⵔⵉⵙⵉⵏ ⵏⵙⴻⵏ.

ⵎⴰⵛ ⵖⵉⵍ-ⴰⴷ ⵍⵍⵉ ⵖⴰ ⵏⴻⵣⵣⴰⵏⵜ ⵜⵖⴰⵡⵙⵉⵡⵉⵏ ⵓⵔ ⵙⵓⵍ ⵙⴻⵖⴰⵡⵙⴰⵏ ⵎⵉⴷⴷⴻⵏ ⵙ ⵎⴰⴷ ⵙⴽⴰⵔⴻⵏ ⵜⴰⴼⵔⴻⴽⴰ ⴰⴷ ⵓⵔⴰ ⵙⵓⵍ ⵜⵜⵓⵡⵙⴽⵉⵔ.

ⵉⵣⵉⴷ

ⴰⵔ-ⵏⵏ ⵜⵜⵎⵓⵏⵏⵜ ⵜⵎⵖⴰⵔⵉⵏ ⵜⴰⵣⴻⴷⵡⵉⵜ ⴷⴰⵔ ⴰⵢⵜ ⵜⵙⵍⵉⵜ ⴰⵔ ⵙⴻⴳⵓⴷⵉⵢⴻⵏⵜ ⵟⵓⵎⵥⵉⵏ ⵍⵍⵉ-ⴷ ⴷⵉⴷⵙⵏⴻⵜ ⵜⵜⴰⵡⵉⵏⵜ, ⴳⵉⵏⵜ ⵜⴰⵔⵔⴰⴳⵜ ⵉ ⵜⵙⵍⵉⵜ, ⵙⴰⵍⴰⵏⵜ ⵉⵍⴻⵎⵎⴰ ⴰⵔ ⵥⵥⴰⴷⴻⵏⵜ ⵜⵓⵊⵊⵓⵜ ⵍⵍⵉ ⵔⴰ-ⴷ-ⵏⵏ ⵢⵉⵍⵉ ⵖ ⵍⵇⵉⵎⴻⵜ (ⴰⵜⵉⴳ). ⵖ ⵢⴰⵜ ⵜⵉⵣⵉ ⴰⵔ-ⴷ ⵜⵜⴰⵛⴽⴰⵏⴻⵜ ⴽⵔⴰ ⵏ ⵜⵎⵖⴰⵔⵉⵏ ⵣⵖ ⵜⵉⴳⴻⵎⵎⵉ ⵏ ⴰⵢⵜ ⵉⵙⵍⵉ ⴼⴰⴷⴷ ⴰⴷ-ⴷ ⵣⴻⵏⵉⵣⵡⵉⵏⵜ ⴰⴳⵓⴷⵉ ⵍⵍⵉ ⵏ ⵟⵎⵥⵉⵏ, ⴼⴰⴷⴷ ⴰⴷ ⵅⴰⵢⵔⴰⵏⵜ ⵉⵙⴻⵜⵜ ⵜⵙⵍⵉⵜ ⵓⵍⴰ ⵏⴻⵜⵜⴻⵏⵜⵉ ⴰⴷ ⴷⴷⵓⵏⵜ ⴰⴷ-ⵏⵏ ⵔⵡⵉⵏⵜ ⵜⵉⵏ ⴰⵢⵜ ⵉⵙⵍⵉ ⵖ ⵜⴳⴻⵎⵎⵉ ⵏⵙⴻⵏ.

ⵣⵣⴻⵏⵏⴰⵏ

ⵜⴰⵣⴷⵡⵉⵜ ⴰⵏⵏ ⵏⵉⵜ ⵉⵖ ⵙⴰⵍⴰⵏⵜ ⵜⵎⵖⴰⵔⵉⵏ ⵉⵥⵉⴹ, ⵉⵔⴳⴰⵣⴻⵏ ⴰⵔ ⵇⴻⵔⵓⵙⵏ ⵉ ⵜⵉⵅⵙⵉ ⵍⵍⵉ ⵔⴰⴷ ⵛⵉⵏ ⵎⵉⴷⴷⴻⵏ ⵖ ⵜⵎⵖⴻⵔⴰ. ⴰⵔ ⵙⴽⴰⵔⴻⵏ ⵉⵍⴻⵎⵎⴰ ⵣⵣⴻⵏⵏⴰⵏ ⴰⵔ ⴰⵇⴻⵔⴰⵏ ⵉ ⵎⴻⵏⵏⴰⵡ ⵎⵉⴷⴷⴻⵏ ⵖ ⵜⵎⴰⵣⵉⵔⵜ ⵙ ⴷⴰⵔ ⵡⴰⵣⴷⵡⵉⵜ ⵏⴻⵖ ⵉⵎⴻⵏⵙⵉ ⴼⴰⴷⴷ ⴰⴷ-ⵜ ⵛⵉⵏ. ⵓⴽⴰⵏ ⵥⴻⵔⵉⵏ ⵏⵉⵜ ⵡⵉⵍⵍⵉ ⵔⴰⴷ ⵢⴰⵡⴻⵙ ⴰⵣⴻⴽⴽⴰ ⴰⴷ ⴼⴽⵉⵏ ⵉ ⵎⵉⴷⴷⴻⵏ ⴰⴷ ⵛⵉⵏ.

ⴷⴰⵔ ⴰⵢⵜ ⵉⵙⵍⵉ ⴰⵔ ⵉⵜⵜⵉⵍⵉ ⵣⵣⴻⵏⵏⴰⵏ ⵜⴰⵣⴷⵡⵉⵜ ⵏ ⵡⴰⵙⵙ ⵍⵍⵉ-ⵖⴰ ⵛⴻⵜⵜⴰⵏ ⵎⵉⴷⴷⴻⵏ ⴷⴰⵔ ⴰⵢⵜ ⵜⵙⵍⵉⵜ.

ⴰⵙⵙ ⵏ ⵜⵎⵖⵔⴰ

ⴰⵙⵙ ⴰⴷ ⴰⵔ ⵛⴻⵜⵜⴰⵏ ⵎⵉⴷⴷⴻⵏ ⴷⴰⵔ ⴰⵢⵜ ⵜⵙⵍⵉⵜ. ⴰⵔ-ⵏⵏ ⵜⵜⵉⵣⵡⵉⵔⴻⵏ ⵜⵜⴻⵍⴱⴰ, ⵣⵉⴽⴽ ⵉⵖ-ⴷ ⵜⵓⴳⴳⴰ ⵜⴰⴼⵓⴽⵜ, ⴰⵔ ⴰⵇⴻⵔⴰⵏ ⵜⵜⴻⴼⵔⵉⵇ (ⵍⴻⵇⵔⴰⵏ) ⴰⴷ ⵙⵙⵓⴼⵖⴻⵏ ⵙⵙⴻⵍⵓⴽⵜ, ⵛⵉⵏ ⵜⵉⵔⴻⵎⵜ ⴼⴼⵓⵖⵏ. ⴼⴰⴷⴷ ⵉⵍⴻⵎⵎⴰ ⴰⴷ-ⵏⵏ ⴽⴻⵛⵉⵎⵏ ⵉⵔⴳⴰⵣⴻⵏ ⵍⵍⵉ-ⵏⵏ ⵢⴰⴳⵓⵔⵏ.

ⵜⴰⵣⴷⵡⵉⵜ ⵜⴳⴰ ⵜⵉⵏ ⵜⵎⵖⴰⵔⵉⵏ ⵍⵍⵉ ⵛⴻⵜⵜⴰⵏⵉⵏ ⴰⵔ ⴽⵉⵖ ⴹⴻⵔⵏⵜ ⵜⵉⵍⵍⴰⵙ. ⵜⵉⵣⵉ ⴰⴷ ⵏⵉⵜ ⵍⵍⵉ ⵖⴰ ⵛⴻⵜⵜⴰⵏⵜ ⵜⵎⵖⴰⵔⵉⵏ ⴰⵔ-ⵏⵏ ⵜⵜⴰⵛⴽⴰⵏⵜ ⵜⵎⵖⴰⵔⵉⵏ ⵢⴰⴹⵏⵉⵏ ⵣⵖ ⵜⵉⴳⴻⵎⵎⵉ ⵏ ⴰⵢⵜ ⵉⵙⵍⵉ ⵎⵎⵉⵇⵉⵔⴻⵏⵜ ⴷ ⵜⵉⵍⵍⵉ ⵖⵉⵏ ⵉⵍⵍⴰⵏ ⴰⴷ ⵙⴽⴻⵔⵏⵜ ⵉⵛⵓⵎⴰⵛ.

ⵉⵛⵓⵎⴰⵛ

ⵜⵉⵣⵉ ⵉⵖ-ⴷ ⵓⵛⴽⴰⵏⵜ ⵉⵙⴻⵜⵜ ⵉⵛⵓⵎⴰⵛ ⴰⵔ-ⴷ ⵜⵜⴰⵡⵉⵏⵜ ⵜⴰⵣⴳⴰⵡⵜ ⵍⵍⵉ ⵖⴰ ⵉⵜⵜⵉⵍⵉ : ⵜⴰⵍⴼⴻⵟⵟⴻⵔⵜ ⵏ ⵍⵃⴻⵏⵏⴰ, ⵜⴰⵔⴰ, ⵜⴰⵡⵙⴻⵔⵖⵉⵏⵜ, ⵣⵣⴻⴰⴼⴻⵔⴰⵏ, ⵜⵜⵙⵡⵉⴽ, ⵟⵉⵎⵛⵜⵜ, ⵍⴻⵎⵔⵉ, ⵍⴱⴻⵅⵓⵔ. ⵉⵖ-ⵏⵏ ⵍⴽⴻⵎⵏⵜ ⴰⵔ ⵛⴻⵜⵜⴰⵏⵜ ⵉⴱⵔⵉⵢⴻⵏ.

ⴰⵔ ⵜⵜⴳⵉⵡⵉⵔⵏⵜ ⵙⴽⴻⵔⵏⵜ ⴰⵀⵡⴰⵛ ⵏ ⵉⵛⵓⵎⴰⵛ ⵙ ⵜⴰⵍⵍⵖⴰⵜⵉⵏ ⵏ ⵓⵎⴰⵔⴳ. ⵉⵖ ⴽⴽⴰⵏⴻⵏⵜ ⵉⵎⵉⴽⴽ ⴰⵔ-ⴷ ⵜⵜⴻⴼⴼⵓⵖⴻⵏⵜ ⵙⵏⴰⵜ ⴳⵉⵙⴻⵏⵜ ⵢⴰⵜ ⵜⴳⴰ ⵣⵖ ⵜⴰⵡⵊⴰ ⵏ ⵉⵙⵍⵉ ⵜⴰⵢⵢⴰⴹ ⵣⵖ ⵜⵉⵏ ⵜⵙⵍⵉⵜ ⴰⵔ ⵜⵜⵀⵓⵛⴻⵏⵜ ⵖ ⵜⵓⵣⵣⵓⵎⵜ ⵏ ⵜⵎⵖⴰⵔⵉⵏ ⴰⴷ ⵓⴽⴰⵏ ⴽⴽⵉⵏⵜ ⴽⵔⴰ ⴰⵔ ⵏⴻⵜⵜⴻⵔⵏⵜ ⵙ ⵓⴼⵓⵙ ⴰⴼⴰⵙⵉ ⵙ ⵓⴼⴻⵍⵍⴰ ⴰⴷ ⵣⴻⵔⴻⵏⵜ ⵎⴰⵏⵜⴰ ⵔⴰⴷ ⵢⴰⵜⵜⵓⵢ ⴼ ⵅⵜⴰ-ⵏⵏ ⵢⴰⴹⴻⵏ.

ⵉⵖ-ⴷ ⵏⵉⵜⵜⵉ ⵙ ⵉⵡⴰⵍⵉⵡⴻⵏ ⵏ ⵜⴰⵍⵍⵖⴰⵜ ⵍⵍⵉ ⵜⵜⵉⵏⵉⵏⵜ ⴰⵔ ⵏⴻⵥⵔⵔⴰ ⵎⴰⵙ-ⴷⴷ ⴰⵎⴰⵔⴳ ⵓⵔ ⵉⵏⵊⵉⵎ ⵉ ⵉⴽⴻⵏⴰⵙⴻⵏ ⵍⵍⵉ ⵍⵍⴰⵏⵉⵏ ⵏⴳⴻⵔ ⵉⴹⵓⵔⴰⵏ ⵏ ⵙⵓⵙ ⵍⵍⵉ ⴱⴹⴰⵏⵉⵏ ⴼ ⵙⵏⴰⵜ ⵜⵔⵓⴱⴱⴰ ⵎⴻⵇⵓⵔⵏⵉⵏ ⵜⴰⴳⵉⵣⵓⵍⵜ ⴷ ⵜⴰⵀⴳⴳⴰⵜ. ⵎⴰⵢⴰⴷ ⴰⴼⴰ-ⵏⵏ ⵏⴻⵜⵜⴰⴼⴰ ⵉⵙⴻⵜⵜ ⵉⵛⵜ ⴰⵔ ⵜⵜⴰⵍⵖⴻⵏⵜ ⵉⵏⴻⵎⵖⵓⵔⴻⵏ ⵏ ⵜⴳⵉⵣⵓⵍⵜ ( ⵓⴱⵔⴰⵀⵉⵎ, ⵉⴷ ⴱⵓⵄⴻⵛⵔⴰ, ⵓⵜⵎⴰⵏⴰⵔⵜ…) ⴰⵛⴽⵓ ⵉⵛⵜ ⵓⵍⴰ ⵏⴻⵜⵜⴰⵏ ⵉⴳⴰ ⵖ ⵜⴳⵉⵣⵓⵍⵜ.

ⵜⴰⵍⵍⴻⵖⴰⵜ ⵜⴳⴰ ⵖⵉⴽ ⴰⴷ :

ⴱⵉⵙⵎⵉ ⵏⴻⴽⵛⴻⵎⴷ ⴰⵙⴰⵔⴰⴳ ⵓⵎⵍⵉⵍ ⴰⴷ ⵙ ⵍⵅⵉⵔ
ⴰⵢⴰⵏ ⴳⵉⵙ ⵓⵔ ⵉⵍⵍⵉⵏ ⵉⴳⴰ ⵃ ⵍⴻⵄⴷⵓ ⵍⵍⵉ-ⴷⴷ ⵛⴻⵔⵔⵉⵃ
ⵓⴱⵔⴰⵀⵉⵎ ⴰ ⵔⴰⵙ ⵍⵄⵉⵏ ⵉⵃ-ⴷ ⴰⴽⴽ ⵉⵏⵊⴰⵎⴰⵄ
ⴰⵔ ⵉⵜⵜⴻⵍⵓⵃ ⵍⴱⵓⵊⴰⵜ ⵏ ⵡⴰⵎⴰⵏ ⴽⵓⵢⴰⵏ ⴷⵔⴻⵄⵏⵜ
ⵉⴷ ⴱⵓⵄⴻⵛⵔⴰ ⵜⵉⵎⵓⵣⵓⵏⵉⵏ ⴽⵓⵍⵍⵓ ⴳⵔⴰⵏⵉⵏ
ⵉⵉⵍⵉⵏⵜ ⵍⵎⴻⵔⵊⴰⵏ ⵍⵃⵓⵔⵔ ⴰⵔ ⵉⵜⵜⴻⵄⵊⵊⴰⴱ ⴽⵓⵢⴰⵏ
ⴰⵍⵖⴰⵎⵜ ⵉⵡⴰⵜⵉ ⵓⵜⵎⴰⵏⴰⵔⵜ ⵍⵍⵉ ⵉⴳⴰⵏ
ⵉⴼⵔⵉⴳ ⵉ ⴷⴷⵓⵏⵉⵜ ⵓⵔ ⵉⵃⵓⵍ ⵓⵔⴰ ⵜⵜⴻⴷⵓⵍⵍⵓⵏ
ⵛⵉⵅ ⴰ ⵙⵉⴷⵉ ⵃⵎⴰⴷ ⵓⵎⵓⵙⴰ ⴰⵙⵙⴻⵔⴽ ⵉⵏⴷⴻⵀ ⵢⴰⵏ
ⵎⴻⵇⴰⵔ ⴷⴷⴰⵏ ⴰⵔ ⴷⴰⵔ ⵉⵔⵓⵎⵉⵢⴻⵏ ⵉⵔⵉⵏ ⴰⴷⴷ ⵡⵉⵔⵔⵉⵏ
ⴰⵇⴻⵛⴰⴱ ⵍⵍⴱⴰⵔⵓⴹ ⴰⵜⵜ ⵉⵍⴻⵙ ⵡⴰⵍⵍⵉ ⵉⴳⴰⵏ
ⵓⵍⴰ ⴰⵃⴰⵢⴽ ⴰⴼⵉⵍⴰⵍ ⵉⴽⵛⴻⵎ ⵢⵉⵡⴻⵏ ⵏⵉⵜ ⵉ ⵍⵇⴱⴻⵔ
ⵜⵉⵍⵉⵍⴰ ⵜⴰⴳⵍⴰⵢⵜ ⵢⴰⵔⵓⴷⴻⵏ ⵜⵉⵍⵉ ⵃ ⵎⴰⵍⴻⵇⵇⴰ
ⵜⵉⵍⵉ ⵃⵉ ⵉⴼⴰⵙⵙⴻⵏ ⴰⵔ ⵜⵙⵓⴼⵓ ⵖⵎⴽ-ⴰⵏⵏ ⵓⵡⴹⵉⵏⴰⵔ
ⴰ ⵛⵉⵅ ⴰ ⵙⵉⴷⵉ ⵃⵎⴰⴷ ⵓ ⵎⵓⵃⵎⵎⴰⴷ
ⴰⵢⴳⴰⵏ ⵍⵇⴰⴹⵉ ⵏⴰⵢⵜ ⵍⵄⵉⵍⴻⵎ
ⴰ ⵛⵉⵅ ⴰ ⵙⵉⴷⵉ ⵃⵎⴰⴷ ⵓ ⵎⵓⵃⵎⵎⴰⴷ
ⴰⴷ ⴰⵃ -ⴷ ⵉⵙⴰⵀⴻⵍ ⵔⴻⴱⴱⵉ ⵔⵔⵉⵃ ⵏ ⵓⵎⴰⵔⴳ

ⵉⵖ ⵀⴻⵢⵢⴰⵏⵜ ⵉⵛⵓⵎⴰⵛ ⴰⵔ ⵜⵜⴻⴳⴳⴰⵏⵜ ⵜⵎⵖⴰⵔⵉⵏ ⴰⵖⵔⵓⵎ ⵖ ⵜⵣⴻⴳⴰⵡⵜ ⵔⴰⵔⵏⵜ-ⵙⵜⵜ ⵙ ⵜⴳⴻⵎⵎⵉ ⵏ ⴰⵢⵜ ⵉⵙⵍⵉ. ⵖ ⵢⵉⴹ ⵏ ⵡⴰⵙⵙ ⴰⵏⵏ ⵉⵖ ⵉⵍⵍⴰ ⵓⵃⵡⴰⵛ ⵏ ⵉⵔⴳⴰⵣⴻⵏ ⴷⴰⵔ ⴰⵢⵜ ⵜⵙⵍⵉⵜ, ⴰⵔ ⵙⴽⴰⵔⴻⵏⵜ ⵜⵎⵖⴰⵔⵉⵏ ⵍⵃⴻⵏⵏⴰ ⵏ ⵜⵡⴻⵏⵣⴰ ⵍⵍⵉⵖ ⴰⵏⵏ ⵜⵜⴻⵎⵉⵇⵉⵔⴻⵏⵜ ⵜⵓⵜⵎⵉⵏ ⴷⴰⵔ ⵜⵙⵍⵉⵜ ⴰⴹⴻⵔⵏⵜ ⵍⵃⴻⵏⵏⴰ ⴰⵔ-ⵜ ⵜⵜⴻⴳⴳⴰⵏⵜ ⵉ ⵜⵡⴻⵏⵣⵉⵡⵉⵏ ⵏⵙⴻⵏⵜ. ⵉⵖ ⵀⴻⵢⵢⴰⵏⵜ ⵙⵙⴻⵏⴻⴳⴳⴻⴼⴻⵏⵜ ⵜⵉⵙⵍⵉⵜ.

ⵡⵉⵙⵙ ⵙⵉⵏ ⵓⵙⵙⴰⵏ

ⴰⵔ ⵜⵜⵉⵍⵉ ⵖ ⴰⵙⵙ-ⴰⵏⵏ ⵜⵉⵔⴻⵎⵜ ⴷⴰⵔ ⴰⵢⵜ ⵉⵙⵍⵉ, ⵣⵓⵏⴷ ⵖⵉⴽ ⵍⵍⵉ ⵙ ⵛⴰⵏ ⴷⴰⵔ ⴰⵢⵜ ⵜⵙⵍⵉⵜ

ⴰⵣⴻⴳⴳⵉⵔ

ⵜⴰⵣⴷⵡⵉⵜ ⵉⵖⴰ ⵛⴻⵜⵜⴰⵏⵜ ⵜⵎⵖⴰⵔⵉⵏ, ⴰⵔ-ⵏⵏ ⵜⵜⵎⵓⵏⴰⵏ ⵉⵔⴳⴰⵣⴻⵏ ⴷⴰⵔ ⴰⵢⵜ ⵜⵙⵍⵉⵜ ⴼⴰⴷⴷ ⴰⴷ ⵣⵣⴻⴳⴻⵔⵏ ⵜⵉⵙⵍⵉⵜ. ⴰⵔ ⵉⵜⵜⴻⴳⵉⵡⵉⵔ ⵓⵏⴻⵣⵣⴰⵔⴼⵓ (ⵍⵄⴰⴷⴻⵍ) ⵍⵍⵉ ⵔⴰ-ⴷ ⵢⴰⵔⴰ ⴰⴽⴰⵔⴰⵙ (ⵍⴽⵉⵖⴹ ⵏ ⵏⵏⵉⴽⴰⵃ) ⵢⵉⵍⵉ ⵖ ⵜⴰⵎⴰ ⵏⴻⵙ ⴰⵎⴻⵣⵣⴰ (ⵍⵓⴽⵉⵍ) ⵏ ⵉⵙⵍⵉ ⴷ ⵡⵉⵏ ⵜⵙⵍⵉⵜ. ⴼⴰⴷⴷ ⴰⴷ ⵥⵔⵉⵏ ⴰⵜⵉⴳ (ⵍⴻⵇⵉⵎⵜ) ⵍⵍⵉ ⵔⴰⴷ ⴼⴻⴽⵉⵏ ⴰⵢⴷⴷⴰⵔⵙ ⵏ ⵜⵙⵍⵉⵜ ⵉ ⵉⵍⵍⵉⵜⵙⴻⵏ ⴰⴷ-ⵙⵜⵜ ⵜⴰⵡⵉ ⵙ ⵜⴳⴻⵎⵎⵉ ⵏⴻⵙ ⴰⵔ ⵥⴻⵔⵔⴰⵏ ⵜⵉⵖⴰⵡⵙⵉⵡⵉⵏ ⵍⵍⵉ ⴳⵉⵙ ⵍⵍⴰⵏⵉⵏ ⵢⴰⵜ ⵙ ⵢⴰⵜ ⴽⵓⵢⴰⵜ ⴳⵉⵏ ⴰⵙ ⴰⵜⵉⴳ ⵏⴻⵙ ⴼⴰⴷⴷ ⵉⵍⴻⵎⵎⴰ ⴰⴷ ⵜⵏⴻⵜ ⵉⵣⴻⵎⵎⵉⵎ ⵓⵏⴻⵣⵣⴰⵔⴼⵓ ⵖ ⵢⴰⵜ ⵜⵉⴼⴻⵔⵜ ⵍⵍⵉ ⵉⵜⵜⴻⵎⵓⵏⴰⵏ ⴷ ⵓⴽⴰⵔⴰⵙ. ⵜⵉⵖⴰⵡⵙⵉⵡⵉⵏ ⴰⴷ ⴰⵔ ⴳⵉⵙ ⵜⵜⵉⵍⵉⵏⵜ ⵜⵓⵊⵊⵓⵜⵉⵏ, ⴰⵎⴰⵏ ⵊⵊⴰⵏⵉⵏ, ⵉⵀⴷⵓⵎⴻⵏ, ⵉⴷⵓⴽⴰⵏ, ⵉⵇⵛⵓⵛⴻⵏ…

ⵉⵖ ⵉⵀⴻⵢⵢⴰ ⵓⵣⴻⴳⴳⵉⵔ ⴰⵔ ⵜⵜⴰⵙⵉⵏ ⴰⵢⵜ ⵉⵙⵍⵉ ⴰⵜⵉⴳ ⴼⴰⴷⴷ ⴰⴷ-ⵜ ⴰⵡⵉⵏ ⵙ ⵓⵃⴰⵏⵓ ⵏ ⵜⵙⵍⵉⵜ ⵖ ⵜⴳⴻⵎⵎⵉ ⵏⴻⵙ ⵜⴰⵎⴰⵢⵏⵓⵜ.

ⵔⵔⵡⴰⵃ

ⵣⵖ ⵉⵖ ⵜⴻⵙⵙⴻⵏⵜⵉ ⵜⵎⴻⵖⵔⴰ ⴰⵔ ⵜⴻⵃⴹⴹⵓ ⵜⵙⵍⵉⵜ ⵖ ⵜⴳⴻⵎⵎⵉ ⵓⵔ ⴰⵜⵜ ⵣⴻⵔⵔⴰⵏⵜ ⴰⵎⴻⵔ ⵜⵎⵖⴰⵔⵉⵏ ⵍⵍⵉ ⵔⴰⴷ ⴰⵙ ⵉⵃⵉⵢⵢⴻⵍ. ⵖ ⵜⵙⴳⴰ ⵢⴰⵏⵏ ⵢⴰⴹⵏⵉⵏ ⵉⵙⵍⵉ ⵓⵍⴰ ⵏⴻⵜⵜⴰⵏ ⵉⵇⴰⵏⵜ-ⵉⴷ ⴰⴷⴷ ⴱⴰⵀⵔⴰ ⵓⵔ ⵉⵜⵜⴻⴼⴼⵓⵖ, ⴰⵔ ⵉⵙⵜⴰⵢ ⵎⴻⵏⵏⴰⵡ ⵉⵎⴻⴷⴷⵓⴽⴽⴰⵍ ⵏⴻⵙ ⴰⴷ ⴰⵙ ⴳⵉⵏ ⵉⵙⵍⴰⵏ.

ⵉⵖ ⵔⴰⴷⴷ ⵜⵔⵓⵃ ⵜⵙⵍⵉⵜ, ⴰⵔ ⵜⵜⴻⴷⴷⵓⵏⵜ ⵜⵎⵖⴰⵔⵉⵏ ⵣⵖ ⴷⴰⵔ ⴰⵢⵜ ⵉⵙⵍⵉ ⴰⴷⴷ-ⵙⵜⵜ-ⵉⴷ ⴰⵡⵉⵏⵜ ⵖ ⵜⴳⴻⵎⵎⵉ ⵏ ⴱⴰⴱⴰⵙ ⵙ ⵜⴳⴻⵎⵎⵉ ⵏ ⵉⵙⵍⵉ, ⴰⵔ ⴷⵉⴷⵙⴻⵏⵜ ⵜⵜⴰⵡⵉⵏⵜ : ⵙⵙⴻⴽⴽⴰⵔ, ⵍⵃⴻⵏⵏⴰ, ⴰⵃⴰⵢⴽ, ⵍⵉⵥⴰⵔ, ⴰⵄⴱⵔⵓⵇ, ⵉⴷⵓⴽⴰⵏ.

ⵉⵖ-ⵏⵏ ⵍⴽⴻⵎⵏⵜ ⴰⵔ-ⴷ ⵜⵜⴰⵙⵉⵏⵜ ⴰⵃⴰⵢⴽ ⴽⵓⵢⴰⵜ ⵜⴰⵎⵥ ⵜⴰⵎⴰ ⵏⴻⵙ ⴰⵔ ⵙⵔⴻⵙ ⵜⴻⵙⵙⴻⵏⴳⴳⴰⴼ, ⵉⵖ ⴽⴽⴰⵏⵜ ⵉⵎⵉⴽⴽ ⴷⴷⵓⵏⵜ ⵎⴻⵏⵏⴰⵡⵜ ⴳⵉⵙⵏⵜ ⴰⵡⵉⵏ-ⴷⴷ ⵜⵉⵙⵍⵉⵜ ⵙⵙⴻⴽⵛⴻⵎⵏ-ⵜ-ⵙⵜ ⵙ ⴷⴷⵓ ⵓⵃⴰⵢⴽ ⵙⵙⵍⴻⵙⴻⵏⵜ ⴰⵙ ⴳⵉⵙ ⴰⴰⵎⴰⵎ (ⵔⵔⴻⵣⵣⴰ) ⵍⵍⵉ ⵖⴰ ⵉⵜⵜⵉⵍⵉ ⵓⵄⴱⵔⵓⵇ ⴷ ⵍⴻⵃⴱⴰⵇ, ⵓⴽⴰⵏ ⵉⵖ ⵀⴻⵢⵢⴰⵏⵜ ⵉⵎⵓⵔⵉⴳ ⵏ ⵜⵏⴻⴳⴳⵉⴼⵜ ⴰⵔ ⵙⵙⵓⵜⵓⵍⴻⵏⵜ ⴰⵃⴰⵢⴽ ⴼⴰⴷⴷ ⴰⴷ-ⵙⵜ-ⵉⴷ ⵙⵙⵓⴼⵖⴻⵏⵜ ⴰⴷ-ⵙⵜⵜ ⴰⵡⵉⵏⵜ ⵙ ⵜⴳⴻⵎⵎⵉ ⵍⵍⵉ-ⵖ ⵉⵍⵍⴰ ⵉⵙⵍⵉ :

ⵜⴰⵏⴻⴳⴳⵉⴼⵜ

ⴰⴱⴻⵙⵎⵉ ⵍⵍⴰⵀ ⵓⵙⴰⵍⵍⵉ ⵄⴰⵍⴰ ⵏⵏⴰⴱⵉ ⵔⴰⵙⵓⵍ ⵍⵍⴰⵀ
ⴰⵢⴰⵔⵛⴰⵛ ⵏ ⵜⴰⴳⵓⵜ ⴰⴷⴷ ⵉⴳ ⵔⴻⴱⴱⵉ ⴰⵏⵥⴰⵔ
ⴰⵢⵢⵓⵜ ⵜⵉⵃⵓⴹⵉⴳⵉⵏ ⵟⵓⵎⵥⵉⵏ ⴰⵜⵜⴻⵏⵜ ⵉⴳⴰⵏ
ⴳⵎⴰ ⵃⴻⵏⵏⴰ ⵏⴻⵡ ⴰⵢⵢⵉⴷ ⵉⵖⵔⴰⵏ ⵉⵏⵏⴰ
ⵔⵉⵃ ⴰⵢⵢⵉ ⵜⴱⵉⴷⴷⴻⵎⵜ ⴰⵢⵉⵙⴻⵜⵜⴻⵎⴰ
ⴰⴱⴻⵔⵔⴰⵃ ⵙ ⵓⴱⴻⵔⵔⴰⵃ ⵎⴰⵎⵓ ⵛⵉⵃ
ⵜⴰⵎⵖⵔⴰ ⵏⴻⵙ ⴰⴷ ⵛⵉⵏ ⵜ-ⵉⵢⴻⵍⵍⵉ
ⴰ ⵟⵟⴻⵍⴱⴰ ⴷ ⵉⵏⴰⴳⴰⵏ ⴰⵙ ⵣⵓⵏ ⴷ ⵉⴱⴻⵙⵉ
ⴱⴰⴱⴰⵎ ⵜⴰⵡⴻⵏⵣⴰ ⵏⴻⵎ ⴰⵢⴻⵍⵍⵉ
ⴰⵔ ⵀⴻⵍⵍⵉ ⵜⵜⴻⵔⴻⴱⴱⵓⵃ ⴰⵢⵢⵉⵙ ⵍⴻⵃⵓⵔⵔ
ⴰⵢⴻⵍⵍⵉⵃ-ⴷ ⵉⴱⵉⴷⴷ ⵓⵎⴻⵙⵙⴰⵖ ⴰⵡⵉⵏⵜ
ⴰⵢⵍⵍⵉ ⵎⴰⵃ ⵜⴻⴳⵉⵜ ⵜⵉⵙⵓⵔⴰ
ⵜⵉⵙⵓⵔⴰ ⵏ ⴱⴰⴱⴰⵎ ⵓⵔ ⵜⴻⵏⵜ ⵓⵙⵉⵃ
ⵃⵓⵔⵎⴰ ⵏⵏⵓⵏ ⴰⵢⵉⴹⵓⵍⴰⵏ ⵏⴻⵃ
ⴳⴰⵜ ⵍⴻⵊⵡⴰⴷ ⵉⵎⴻⵏ ⴰⵏⴳ ⵡⵉⵢⵢⴰⴹ
ⵎⴰⵙ ⵓⵡⵏⵉⵔ ⴰⵡⵢⴰⵎ-ⴷⴷ ⴰⵏⵉⵔ
ⴰⵜⵜ ⵏⴻⴽⵍⵓ ⵙ ⵍⴻⵃⵔⵉⵔ ⴷ ⵡⵓⵔⵖ
ⴰⵀⴰ ⵢⴰⵏ ⴳⵎⴰ ⵎⴻⵔⵃⴱⴰ ⵙⵔⴻⵙ
ⵏⵉⵡ-ⵉⴷ ⵢⴰⵜ ⵜⵙⵍⵉⵜ ⵣⵓⵏⴷ ⴰⵢⵢⵓⵔ
ⵉⴳⴰⵏ ⵃ ⵉⴳⴻⵏⵏⴰ ⵙⵉⵏ ⴷ ⵎⵔⴰⵡ
ⵙⵉⴼⴷ ⴰⵎⵜ ⴰⵃ ⵢⴰⴳⴳⵓⴳ ⵓⵖⴰⵔⴰⵙ
ⵉⵃ ⵢⴰⴳⴳⵓⴳ ⵜⴻⵏⵙⵉⵎⵜ ⴷⴰⵔ-ⵏⴻⵃ
ⵏⴻⴼⵍ-ⵏⵏ ⵏⵉⵜ ⵜⴰⵔⵡⴰ ⵎⴻⵥⵥⵉⵢⵏⵉⵏ
ⵉⵔⴰ ⵏⴻⵙⵔⴼ ⵎⴰ-ⵜⵜⴻⵏ-ⵉⴷ ⵉⵜⵜⴰⵡⵉⵏ
ⵍⵍⴰⵏ ⴽⵓⵍⵍⵓ ⵃ ⵍⴻⴱⵔⵓⵊ ⴰⵍⴰⵏⵉⵏ
ⴳⴰⵏ ⴽⵓⵍⵍⵓ ⵜⴰⵔⵡⴰ ⵉⵢⵎⵖⴰⵔⴻⵏ
ⴰⵢⵎⵎⵉⵏⵓ ⵛⴰⵡⵔⵉ-ⴷ ⴳⵎⴰ
ⵍⵍⵉ ⵎⴻⵇⵓⵔⴻⵏ ⵎⴰⵙ-ⴷ ⵏⵏⴰⵏ
ⴰⴷ ⴷⴷⵓⵃ ⵏⴻⵃ-ⴷⴷ ⴰⴷ ⵓⵔ ⴷⴷⵓⵃ
ⴰⵜⵜ ⴷⴷⵓⵜ ⴰⵙ ⴰⵎ-ⴷ ⵏⵏⴰⵏ
ⴰⵜⵜ ⴷⴷⵓⵜ ⴰ ⵜⵉⴱⵏⵉⵄⴻⵣⵣⵉⵜ
ⴰⵜⵜ ⴷⴷⵓⵜ ⴰⵢⵎ ⵉⵟⵟⴻⵄⵔⴷ ⵍⴻⵅⵉⵔ
ⵉⵇⴻⵏ ⴱⴰⴱⴰⵎ ⴰⵄⵎⴰⵎ
ⵡⵉ ⵍⵍⴻⵊⴷⵉⴷ ⴰ ⵜⵉⵙⵍⵉⵜ
ⵍⴻⵃⵓⵔⵎⴰ ⵏ ⵔⴻⴱⴱⵉ ⴰⵃ ⵜⴻⵍⵍⵉⵜ
ⵉⵡⴰⵍⵍⴻⵏ ⵓⵡⴳⴷⵓⴷ ⴰ ⵜⵉⵙⵍⵉⵜ

ⵉⵖ ⵔⴰⴷ ⵜⴻⴼⴼⵓⵖ ⵜⵙⵍⵉⵜ ⵖ ⵜⴳⴻⵎⵎⵉ ⵏ ⴱⴰⴱⴰⵙ ⴰⵔ ⵣⵡⴰⵔ ⴰⴽⴽⴰⵏ ⴰⵢⵜ ⵉⵙⵍⵉ, ⵉ ⴳⵎⴰⵙ ⵉⵇⴰⵔⵉⴹⴻⵏ ⴼⴰⴷⴷ ⴰⴷ ⴰⵙⴻⵏ ⵉⵔⵥⴻⵎ ⵜⴰⴳⴳⵓⵔⵜ.

ⵖ ⴷⴰⵔ ⵉⵙⵍⵉ, ⴰⵔ ⵜⵇⴻⵍⴻⵏ ⵉⵙⵍⴰⵏ ⵙ ⵜⵎⵖⴰⵔⵉⵏ ⴰⵛⴽⵓ ⵏⴻⵜⵜⵏⵉ ⴰⵔ ⴰⴷ ⴰⵙⴻⵏ-ⴷⴷ ⵉⵔⵥⴻⵎ, ⵉⵙⵍⵉ ⵏⴻⵜⵜⴰⵏ ⵓⵀⵓ ⵉⵇⴰⵏⵜ-ⵉⴷ ⴰⴷ-ⵏⵏ ⵉⵃⴱⵓ ⴰⴷ-ⵜ ⵓⵔ ⵥⴻⵔⵉⵏⵜ ⵜⵎⵖⴰⵔⵉⵏ ⵓⵍⴰ ⵉⵙⴰⵡⵍ ⵙⵔⴻⵙⵏⴻⵜ, ⵉⵖ-ⵏⵏ ⵓⵙⵉⵏⴻⵜ ⵜⵉⵙⵍⵉⵜ. ⴰⵔ-ⵜⵜ-ⵉⵏ ⵙⵔⵓⵙⴻⵏⵜ ⵖ ⵜⵖⵎⴻⵔⵜ ⴼⴰⴷⴷ ⴰⴷ-ⴷ ⴼⴼⴰⵖⴻⵏⵜ ⵓⵔⴰ-ⵏⵏ ⵉⵜⵜⴰⴳⵓⵔ ⴰⵎⴻⵔ ⵜⴰⵙⵓⵇⵉⵢⵜ ⵍⵍⵉ-ⵏⵏ ⵜⴻⵙⵔⵓⴼ ⵎⴰⵙ ⵏ ⵜⵙⵍⵉⵜ ⴰⴷ ⵜⴻⵙⴻⵡⵡⵓⵔⵉ ⵉ ⵉⵍⵍⵉⵙ ⵓⵏⵛⴽ ⵍⵍⵉ ⵜⴽⴽⴰ ⵖ ⵜⴳⴻⵎⵎⵉ ⵏ ⵔⵔⴻⵡⴰⵀ.

ⵣⵉⴽⴽ ⵏ ⵡⴰⵙⵙ, ⴰⵔ ⵜⵜⴻⴼⴼⵓⵖⵏ ⵉⵙⵍⴰⵏ ⵎⵓⵏⵏ ⴷ ⵉⵙⵍⵉ ⴰⴷⴷ ⵃⵓⵡⵡⵙⴻⵏ ⵖ ⵉⴳⵔⴰⵏ ⵖ ⵜⵉⵣⵉ ⴰⴷ ⵏⵉⵜ ⴰⵔ-ⵏⵏ ⴽⴻⵛⴻⵎⴻⵏⵜ ⵉⴷ ⵎⵎⵓ ⵜⴳⴻⵍⵍⴰ ⵍⵍⵉ-ⴷ ⴷⵉⵙⴻⵏⵜ ⵉⵜⵜⴰⵡⵉⵏ ⵎⴻⵏⵏⴰⵡⵜ ⵜⵖⴰⵡⵙⵉⵡⵉⵏ ⵣⵓⵏⴷ ⵙⵙⴻⴽⴽⴰⵔ, ⴰⵜⴰⵢ, ⴰⵎⴰⵏ ⵊⵊⴰⵏⵉⵏ, ⵍⴻⴱⵅⵓⵔ ⴷ ⵜⴳⴻⵍⵍⴰ ⵍⵍⵉ ⵔⴰⴷ ⵖⵉⵏ ⵛⵉⵏⵜ.

ⵉⵖ-ⴷ ⴽⴻⵛⴻⵎⵏ ⵉⵙⵍⴰⵏ ⴷ ⵉⵙⵍⵉ ⴰⵔ ⵜⴻⴼⴹⴰⵔⵏ ⵙ ⵟⵟⴰⵊⵉⵏ ⵍⵍⵉ ⴰⵙⴻⵏ-ⴷ ⵜⴻⵙⵙⵉⴼⵉⴹ ⵎⴰⵙ ⵏ ⵜⵙⵍⵉⵜ.

ⴰⵣⴰⵍ ⴽⵓⵍⵍⵓⵜ ⴰⵔ-ⴷ ⵜⵜⴰⵛⴽⴰⵏ ⵉⴼⴻⵔⵅⴰⵏ ⴷ ⵜⴼⴻⵔⵅⵉⵏ ⴰⴷ-ⴷ ⴽⴽⵉⵏ ⴷⴰⵔ ⵉⵙⵍⵉ ⴷ ⵜⵙⵍⵉⵜ ⴰⴷ ⴰⵙⴻⵏ-ⴷ ⴼⴽⵉⵏ ⵉⵔⴰⵎⴰⵏ ⵍⵍⵉ ⵖⴰ ⵉⵜⵜⵉⵍⵉ : ⴽⴰⵡⴽⴰⵡ, ⵜⵉⴼⵉⵣⵣⴰ, ⵍⴼⴰⵏⵉⴷ, ⵜⵉⵍⴽⵉⴽⵙⵉⵏ, ⵉⴽⵉⴽⴻⵔ (ⵍⴻⵃⵉⵎⵣ)

ⵜⴰⵣⴷⵡⵉⵜ ⵏ ⵡⴰⵙⵙ ⴰⵏⵏ ⵏⵉⵜ ⴰⵔ-ⵏⵏ ⵜⵜⴻⵎⵓⵏⴻⵏⵜ ⵉⴷ ⵎⵎⵓ ⵜⴽⴻⵍⵎⴰ ⴷⴰⵔ ⵜⵙⵍⵉⵜ ⴽⴽⵉⵙⴻⵏⵜ ⴰⵙ ⴰⵄⵎⴰⵎ ⴼⴰⴷⴷ ⴰⴷ ⴰⵙ ⵙⵙⴻⵍⵙⵉⵏⵜ ⵜⴰⴽⴻⵍⵎⴰ : ⵍⵍⵉ ⵉⴳⴰⵏ ⵣⵓⵏⴷ ⴰⵇⴻⵍⵎⵓⵏ ⵏ ⵟⴰⴹⵓⵜⵜ ⴰⵔ -ⵜ ⵍⴻⵙⵙⴰⵏⵜ ⵉ ⵢⵉⵅⴻⴼ ⴰⵙⵙⴻⵏⴻⵜⵜ ⵙ ⵓⵎⴻⵍⵓⵍ (ⵉⴼⵉⵍⵉ ⵏ ⵟⴰⴹⵓⵜⵜ). ⵙⴻⵍⵙⴻⵏⵜ ⴰⵙ ⴷⴷⴻⵡⵡⴰⵃ, ⵉⵅⴻⵔⵙⴰⵏ, ⵜⵉⵎⵃⵉⴷⵉⵜ, ⵜⴰⵔⴻⴷⴷⴰⵃⵜ, ⵍⴻⵎⵛⴱⵓⵃ… ⴼⴰⴷⴷ ⴰⴷ ⵜⵜⵉⵔⵉⵔⵏⴻⵜ ⵜⴰⵏⴻⴳⴳⵉⴼⵜ ⵏ ⵜⴽⴻⵍⵎⴰ.

ⵜⴰⴽⴻⵍⵎⴰ

ⴱⵉⵙⵎⵉ ⵍⵍⴰⵀ ⵔⴰⴷⴷ ⵏⴻⵍⵓⵃ ⵜⵉⴳⵓⵔⵉⵏ
ⵖⴻⵎⴰⵏⵉⵏ ⵊⵊⴰⵏⵉⵏ ⵙ ⵔⵔⵉⵃⴰⵏ
ⵉⵍⵍⵉ ⵃⴰ ⵉⵙⵓⴷⴷⵓⵎ ⵍⴻⴼⴷⴰⵎ ⴰⵎⴰⵏ
ⵔⴻⴱⴱⵉⵃ ⴰⵣⵣⴰⵔ ⵏⴻⵙ ⵉ ⵉⵍⵍⵉ
ⵜⴰⵥⴻⵔⵥⵉⵜ ⵍⵍⵉ ⵙⴰ ⵜⴻⵔⵣⵣⵉ ⵍⴰⵍⵍⴰ ⵓⵍⵜ
ⵎⵓⵃⵎⴻⴷ ⴰⵙ ⵣⵓⵏ ⴷ ⵏⵉⵜ ⵔⴻⵥⵉⵃ
ⴰⵢⴻⵎⵎⵉ ⵛⵓⴷⴷⵓ-ⵢⵢ-ⵉⵏⵏ ⵜⴰⴽⴻⵍⵎⴰ ⵏⴻⵡ
ⴰⵣⴻⴽⴽⴰ ⵉⵛⵓⴷⴷⵓ ⵢⵢⵉⵜ ⵓⴼⵓⵙ ⵉⵏⴻⵡ
ⵓⵙⵙⴰⵎⴻⵜ ⵉⵢⴻⵍⵍⵉ ⴰ ⵜⵉⵎⵏⴻⴳⴳⴼⵉⵏ
ⵙ ⵓⵊⵎⵓⵄ ⵏ ⵜⵙⵡⴰⴽ ⵜⵉⴷⴷⵉ ⵓⵡⵣⵓⵔ
ⴰⵃⴰⵏⵓ ⴰⵢⴻⵍⵍⵉ ⵢⵓⴳⴻⵔ ⵜⴰⵖⵣⵓⵜ
ⵉⵙⵙⵓⵙⵄⴰⵜ ⵔⴻⴱⴱⵉ ⴷ ⵡⴰⵍⵍⵉⵜ ⵉⴱⴻⵏⴰⵏ
ⵎⴰ ⵃⴰ ⵜⵜⴰⴳⵍⴻⵏ ⵙⴰ ⵟⵟⴻⵍⴱⴰ ⵜⵉⵍⵍⴻⵡⴰⵃ
ⵎⴰ ⵃⴰ ⵜⵜⴰⴳⵍ ⵢⴰⵜ ⵜⵔⴱⵉⵜ ⵍⴻⵃⵔⵉⵔ
ⵢⴰⵏ ⵣⵓⵏ ⴷ ⵉⵏⵏⴰⵏ ⵖⵍⵉ-ⴷ ⴷⴰⵔⵉ
ⵜⵉⵏⵉⵜ ⴰⵙ ⵖⵍⵉ-ⴷ ⴽⵢⵢⵉⵏ ⴷⴰⵔⵉ
ⴰⵀⴰ ⵉⵣⴻⵖⵉ ⵏⴻⵎ ⵉⵣⵓⵣⵡⴰ ⵏⵉⵜ
ⴰ ⵀⴰ ⵍⵃⴻⵏⵏⴰ ⵉⵖⵎⴰⵏ ⴷⴰⵔⵉ
ⴰ ⵀⴰ ⵜⴻⵙⵙⵡⵉⴽ ⵍⴻⵃⵓⵔⵔ ⴷⴰⵔⵉ
ⴰⵢⴻⵍⵍⵉ ⵏⴻⵡ ⴰⴷ ⵣⵓⵏ ⴷ ⵓⵔ ⵜⵜⵉⵏⵉⵏⵜ
ⴰⵎⵔ ⴽⵔⴰⵟ ⵜⵔⴱⴰⵉⵢⵉⵏ ⵓⵡⴳⴳⵔⴻⵏ
ⴰⵢⴻⵍⵍⵉ ⵏⴻⵡ ⴰⴷ ⵣⵓⵏ ⴷ ⵓⵔ ⵜⵜⵉⵏⵉⵏⵜ
ⵉⵃ-ⴷ ⵢⴰⴷ ⵏⴻⵣⴷⴻⵎ ⵜⴰⵡⵉⵜ ⵉⵖⵉⵍ
ⴰⵢⴻⵍⵍⵉ ⵏⴻⵡ ⴰⴷ ⵣⵓⵏ ⴷ ⵓⵔ ⵜⵜⵉⵏⵉⵏⵜ
ⵉⵃ-ⴷ ⵢⴰⴷ ⵏⵓⴳⴻⵎ ⵜⴰⵡⵉⵜ ⴰⵎⴰⵏ
ⴰⵢⴻⵍⵍⵉ ⵏⴻⵡ ⵉⵃ ⵣⵓⵏ ⴷ ⵢⴰⴷ ⵉⵏⵏⴰ
ⵇⴻⵏ-ⴷ ⵉⵎⵎⵉ ⵜⴻⵏⵏⵉⵜ ⴰⵙ
ⵉⵎⵎⵉⴽ ⴰⵜ-ⵜⴻⴳ ⵉⵎⵎⵉ
ⵃⵓⵔⵎⴰ ⵏⵏⵓⵏⵜ ⴰⵜⴰⴷⵊⴰⵔⵉⵏ
ⵎⴰⵎⵓ-ⵏⵏ ⴼⴰⵍⴻⵃ ⵉⵍⵍⵉ ⴳⵔⴰⵜⵓⵏⵜ
ⵜⴻⴼⵓⵍⴽⵉ ⵉⵍⵍⵉ ⵜⵔⵛⴻⴷ ⵉⵍⵍⵉ
ⵏⴻⴽⴽⵏⵉ ⵓⵔ-ⵜⴰ ⵏⵙⵙⵉⵏ ⵎⴰⵜ-ⵜⴳⵉⵍⵍⵉⵎ
ⵉⵃ ⵓⵔ ⵜⵓⵔⵓ ⵜⴰⵔⵓ ⵜⴼⵓⵏⴰⵙⵜ
ⵢⵉⵍⵉ ⵓⵙⴻⵜⵜⴰ ⵃ ⵓⵖⴳⴻⵎⵎⵉ
ⵢⵉⵍⵉ ⵓⵏⵥⴰⵔ ⵏⴻⴷⵓⵏ ⵉⴽⴻⵛⵓⴷⴻⵏ

ⵉⵖ ⴹⴻⵔⴻⵏⵜ ⵜⵉⵍⵍⴰⵙ ⵏ ⵡⴰⵙⵙ ⴰⵏⵏ ⴰⵔ ⵉⵜⵜⴻⴷⴷⵓ ⵉⵙⵍⵉ ⴷ ⵉⵙⵍⴰⵏ ⵏⴻⵙ ⴼⴰⴷⴷ ⴰⴷ ⵉⵙⵙⵓⴷⴻⵎ ⵉⵅⴻⴼ ⵏ ⵜⴹⴻⴳⴳⴰⵍⵜ ⵏⴻⵙ (ⵎⴰⵙ ⵏ ⵜⵙⵍⵉⵜ) ⴰⵔ ⴰⵙ ⵉⵜⵜⴰⵡⵉ ⵎⴻⵏⵏⴰⵡ ⵍⵇⴻⵡⴰⵍⴱ ⵏ ⵙⵙⴻⴽⴽⴰⵔ ⴰⵔ ⴰⵙ-ⴷ ⵜⴰⴽⴽⴰ ⵜⴰⴼⵓⵍⵍⵓⵙⵜ. ⵖⵉⵍ ⴰⴷ ⴰⵔ ⴰⵙ-ⴷ ⴰⴽⴽⴰⵏ ⵉⵣⵉⵎⵎⴻⵔ

ⵜⴰⵔⴻⵣⵣⵉⴼⵜ

ⵉⵖ ⵣⴻⵔⵉⵏ ⴽⵔⴰⴹ ⵓⵙⵙⴰⵏ ⴼ ⵜⵎⴻⵖⵔⴰ ⴰⵔ ⵣⵣⴻⵔⵣⴰⴼⵏ ⴰⵢⴷⴷⴰⵔⴻⵙ ⵏ ⵜⵙⵍⵉⵜ ⵉⵍⵍⵉ ⵜⵙⴻⵏ. ⴰⵔ-ⴷ ⴷⴰⵔ ⵙⴻⵏ ⵜⵜⴰⵛⴽⴰ ⵙ ⵜⴳⴻⵎⵎⵉ ⵜⴰⵣⴷⵡⵉⵜ ⵏⴻⵜⵜⴰⵜ ⴷ ⵜⵎⵖⴰⵔⵉⵏ ⵍⵍⵉ ⵎⵓ ⵖⵔⴰⵏ ⴰⵢⴷⴷⴰⵔⴻⵙ. ⴼⴰⴷⴷ ⴰⴷ ⵛⵉⵏⵜ ⵡⴰⵣⴷⵡⵉⵜ ⵃⵓⵛⴻⵏⵜ.

ⴰⵎⵎⴰⵍ ⵓⵡⵖⴰⵔⴰⵙ

ⵉⵖ ⵉⵣⵔⵉ ⵉⵎⴰⵍⴰⵙ ⴼ ⵜⵎⴻⵖⵔⴰ ⴰⵔ-ⴷ ⴷⴰⵖ ⴰⵇⴻⵔⴰⵏ ⴰⵢⴷⴷⴰⵔⵙ ⵏ ⵜⵙⵍⵉⵜ ⵉ ⵢⵉⵍⵍⵉ ⵜⵙⴻⵏ ⴰⵏⵏ ⴷⴰⵖ ⴷⴰⵔⵙⴻⵏ ⵜⴻⴽⴽ ⵣⵓⵏⴷ ⵉⵖ ⴰⵙ ⵎⵎⴰⵍⴰⵏ ⴰⵖⴰⵔⴰⵙ ⵍⵍⵉ ⵉⵍⵍⴰⵏ ⵏⴳⴻⵔ ⵜⴳⴻⵎⵎⵉ ⵏ ⵓⵔⴳⴰⵣ ⵏⴻⵙ ⴷ ⵜⵉⵏ ⴰⵢⴻⴷⴷⴰⵔⴻⵙ.

ⵉⵙⴰⵖⵓⵍⵏ

ⴰⵙⵉⵜ ⵏ ⵜⵓⵙⵏⴰ ⵏ ⵓⵔⵙⵉⵏⴽⵀ ⴼⴰⴷ ⴰⴷⵉⵙⵉⵏⴽⵀ ⵢⵓⵔⴰ ⵜⵜ ⵎⴰⵙⵙ ⴰⵎⴰⵣⵉⴳⵀ ⵉⴳⵀⵓⴷⴰ : https://web.archive.org/web/20201010153103/https://sites.google.com/site/tosnanorsinkhfadadisinkh/tosna-tamazight/tamghra-n-imazighen