Calendàriu bizantinu

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Su calendàriu bizantinu fiat unu tipu de calendàriu, derivadu dae su calendàriu giulianu. Depet su nùmene a su fatu de chi fiat impreadu durante totu sa durada de s'Impèriu Bizantinu. Fiat istabilidu dae Costantinu I s'annu 312 de s'era cristiana.

Deus Architetu de su Mundu

Istrutura

Su calendàriu bizantinu derivaiat su calendàriu giulianu, usadu durante s'Impèriu Romanu, si seberaiat petzi pro sa data de cumintzu de s'annu e sa numeratzione de sos annos; in prus de istabilire unu perìodu de bìndighi annos naradu indictio.

S'annu cumintzaiat sa prima die de cabudanni (est de annoditzare chi galu in s'atualidade in sardu, a s'imbesse de àteras limbas medas, a su mese si ddi narat aici, rapresentende una crara eredidade culturale de su passadu bizantinu), e acabaiat su 31 de austu.

Sa numeratzione de sos annos cumintzaiat in s'annu de apretziada criatzione de su mundu (Anno Mundi in latinu, ἔτος κόσμου Εtos Kosmou in gregu), chi segundu Panòdoros de Alessàndria (su sàbiu bizantinu chi dd'aiat carculadu pro mèdiu de una de sas interpretatziones possìbiles de sa cronologia bìblica) fiat acontessida su 1 de cabudanni de s'annu 5509 a.C.

Aici, pro esempru, sa data de sa ruta de Costantinòpoli (29 de maju de su 1453) segundu su carculu bizantinu fiat acontessida in s'annu 6961.

A pustis de introdùsire de su calendàriu gregorianu (in impreu in is istados catòlicos a comintzare dae su 1582 e fatu·fatu usadu dae totu sos àteros), su calendàriu bizantinu (paris comente su giulianu) presentat unu distempus de datas chi in die de oe est de trèighi dies (su 1 de cabudanni de su bizantinu currispondet a su 14 de cabudanni de su gregorianu).