Theodor Boveri
Theodor Boveri (12 d'octòbre de 1862 - 15 d'octòbre de 1915) èra un zoologista alemand. Es famós per aver formulat l'ipotèsi a l'origina de la definicion modèrna dau cancèr.
Son òbra scientifica se concentrèt sus l'estudi dei cromosòmas e dei mecanismes de division cellulara. Ansin, a partir d'observacions dau desvolopament embrionari d'orsins, poguèt demostrar l'impossibiitat d'acabar un desvolopament normau en l'abséncia de cromosòmas. Puei, en 1888, descurbiguèt lei centrosomas e acomencèt de s'interessar a la proliferacion cellulara. En 1902, aquò li permetèt d'observar la preséncia de cellulas capablas de se multiplicar sensa contraròtle dins una tumor cancerosa. Prepausèt alora un mecanisme depintant lei cancèrs coma la consequéncia d'una proliferacion cellulara anarquica e continua entraïnada per una exposicion a d'agents patogèns fisics, quimics ò radiologics. Aquela ipotèsi foguèt confiermada en 1915 e foguèt a l'origina de la cancerologia modèrna.