Joseph Goebbels
Paul Joseph Goebbels (29 d'octòbre de 1897, Rheydt – 1èr de mai de 1945, Berlin) èra un òme politic alemand que foguèt una figura majora dau nazisme e dau Tresen Reich.
![](http://upload.wikimedia.org/wikipedia/commons/thumb/3/35/Bundesarchiv_Bild_146-1968-101-20A%2C_Joseph_Goebbels.jpg/220px-Bundesarchiv_Bild_146-1968-101-20A%2C_Joseph_Goebbels.jpg)
Tocat per una infiermitat congenitala, participèt pas a la Premiera Guèrra Mondiala e menèt d'estudis literaris, venguèt un sòci dau NSDAP après un rescòntra ambé Gregor Strasser. Nomat cap dau partit a Berlin en 1926, capitèt d'estendre l'influéncia dau nazisme dins la capitala. Venguèt cap de la propaganda dau partit en 1928 puei ministre dau Reich a l'Educacion dau pòble e a la Propaganda en 1933. Pròche d'Adolf Hitler, venguèt alora un dei personatges pus poderós dau Tresen Reich ambé Hermann Göring e Heinrich Himmler. En particular, venguèt lo simbòl dau fanatisme e de la propaganda nazis.
Antisemita acarnat, aguèt un ròtle primordiau dins l'organizacion dei persecucions còntra lei judieus, especialament dins lo corrent de la Nuech de Cristau en 1938. Per la seguida, foguèt cargat de sostenir politicament l'esfòrç de guèrra après la batalha d'Estalingrad. Brèvament cancelier dau Reich après la mòrt d'Hitler (30 d'abriu - 1èr de mai de 1945), assaièt sensa succès de negociar un armistici ambé lei Sovietics. Puei, se suicidiguèt ambé sa frema, après aver assassinat seis enfants, per defugir la captura.