Manchêtre
Ch't' articl'ye fut c'menchie en Jèrriais
|
![](http://upload.wikimedia.org/wikipedia/commons/thumb/7/77/Manchester_Sky_Crop.jpg/220px-Manchester_Sky_Crop.jpg)
Manchêtre (en Angliais Manchester) est eune grande cité en Angliétèrre.
Histouaithe
Les Romains fondîtent un fort sus la route militaithe entre Évèroui et Les Câtchieaux tch'avait nom Mamucium (nou dit étout Mancunium). La ville fortifiée des Saxons s'trouvit un mio pus au Nord vèrs la cathédrale d'achteu.
L'îndustrie vînt à Manchêtre en 1375 quand des taileurs d'Fliandres fûtent înstâllés là par l'Rouai Douard III. La laine et l'lîn 'taient grées à Manchêtre épis pouor lé 17e siècl'ye nou-s'împortait du coton. L'îndustrie du coton s'êcaloppit au 18e siècl'ye coumme la machinn'nie amendit la tail'lie et y'avait hardi d'tchèrbon d'amain. Lé clyînmat pus à co mucre dé Manchêtre y'aîdgait hardi étout pouor lé mannyîment du coton. En 1783 la preunmié mannifactuthe à pouver d'sueu fut ouvèrte à Manchêtre.
Un c'mîn d'fé fut ouvèrt en 1830. Un drannet d'cannieaux fut dêfoui à seule fîn d'haler les matéthiaux et les produits. Lé canné à navithes ouvèrt en 1894 fit les caûchies d'la ville navigâbl'ye d'la mé.
La raide craîssance d'la ville attriotchit un tas d'ouvrièrs. Les conditions dé louogement 'taient mînséthabl'yes. Jusqu'en 1832 Manchêtre, ouaithe qu'eune grande ville, n'tait pon r'présenté dans l'parlément du Rouoyaume Unni. Un protêt en 1819 fut cachi par des troûpeurs à sâbres tchi machacrîtent 11 pèrsonnes - chu Machacre dé Peterloo êmoûtchit des r'formes êcononmiques et politiques libéthales.
En 1853 la ville d'vînt eune cité. La ville 'tait hardi prospéthe pouor la fîn du 19e siècl'ye. En 1913 les 65% d'la production mondiale du coton fut tailée à Manchêtre, mais la Preunmié Dgèrre Mondiale et la mînséthe êcononmique entré les dgèrres avrônîtent l'îndustrie et Manchêtre quémenchit d'pèrdre en affaithes. La bombardéthie duthant la S'gonde Dgèrre Mondiale passecrivit lé mitan historique d'la ville. À c'menchi d's années 1960s l'îndustrie 'tait à s'èrtréchi: en 1963 les caûchies d'Manchêtre 'taient les traîsièmes pus împortantes du Rouoyaume Unni - i' fûtent freunmées en 1982. La cont'neurîsâtion avait rempliaichi lé transport d'cartchaîson.
Avaû l's années la ville a încorpouothé des villes et villages du vaîthinné, mais la ville dé Salford tch'est bordant par l'Vouêt est s'pathée. Tout coumme nou-s'appelle bein souvent tout l'bréha d'meunicipalités accompôtées l'Grand Manchêtre.
Lé 15 dé Juîn 1996 des terreuristes républyitchains Irlandais fîtent soûfflier eune grande bombe au mitan d'la ville v'là tchi passecrivit un tas d'bâtisses. Lé mitan d'la ville a 'té r'grée.
Tchultuthe
En êprouvant d'ravigoter l'êconomie d'la ville, la meunicipalité lanchit deux fais eune campangne pouor atchilyi les Gammes Olŷmpiques (1996 et 2000) et atchilyit les Gammes du Commonwealth en 2002. Deux des êtchipes dé football les pus populaithes en Angliétèrre, Manchester United et Manchester City, sont d'Manchêtre - Manchester United est s'posêment l'êtchipe lé pus populaithe du monde.