Mirela Manjani

Mirela Manjani
Statsborgarskap	Hellas, Albania
Fødd	21. desember 1976 (47 år) Durrës
Idrett	friidrett
Tok del i	Sommar-OL 2004, Sommar-OL 2000, Sommar-OL 1996

Mirela Manjani (fødd 21. desember 1976) er ein albansk-gresk tidlegare spydkastar frå Durrës i Albania. Ho vart verdsmeister i øvinga i 1999 og 2003 og europameister i 2002.

Aktiv

Manjani deltok i internasjonal friidrett for fødelandet Albania fram til 1997. Ho gifta seg då med vektløftaren Giorgios Tzelilis og vart gresk statsborgar. I 1999 vann Manjani VM-gull i Sevilla framom russiske Tatjana Sjikolenko og norske Trine Hattestad. Under dei olympiske sommarleikane i Sydney hausten 2000 sette Manjani gresk rekord med 67,51 m, men hennar livs lengste spydkast heldt ikkje til gull, etter som norske Trine Hattestad presterte 68,91 m i fyrste omgangen. Året etter tok Manjani eit nytt internasjonalt sølv under VM 2001, då bak cubanske Osleidys Menéndez.

Både i friidretts-EM 2002 og VM 2003 steig Manjani til topps etter spydtevlinga, i begge meisterskapane var ho i ei lita klasse for seg. I si siste store meisterskapstevling, Sommar-OL 2004 i Aten, kneip ho bronsen i siste omgangen, seks centimeter framom tsjekkiske Nikola Brejchová.

Medaljar og plasseringar i internasjonale meisterskap

• VM 1995 i Göteborg: Nr 12 – 55,56 m
• OL 1996 i Atlanta: Utslått i kvalifiseringa (55,64 m =nr 24)
• VM 1997 i Aten: Nr 11 – 61,02 m
• EM 1998 i Budapest: Nr 9 – 58,65 m
• VM 1999 i Sevilla: Gullmedalje – 67,09 m, framom Tatjana Sjikolenko (66,37 m)
• OL 2000 i Sydney: Sølvmedalje – 67,51 m, bakom Trine Hattestad (68,91 m)
• VM 2001 i Edmonton: Sølvmedalje – 65,78 m, bakom Osleidys Menéndez
• EM 2002 i München: Gullmedalje – 67,47 m, framom Steffi Nerius (64,09 m)
• VM 2003 i Paris: Gullmedalje – 66,52 m, framom Tatjana Sjikolenko (63,28 m)
• OL 2004 i Aten: Bronsemedalje – 64,29 m

Bakgrunnsstoff

• «Mirela Maniani-Tzelili» (på engelsk). Olympedia. Henta 10. mars 2023.