Taxon

Taxon (dat, Pl.: Taxa; vun ooldgr. τάξις táxis, Ordnung, Reege) is in de Biologie en Grupp vun Lebewesen, de as en systemaatsche Eenheit ankeken warrt. Meist hett de Grupp ok en egen Naam. Wie de wetenschoppliche Naam for de Taxa tostanne kummt, dor stellt de bioloogsche Nomenklatur Regeln for up. Wie de enkelten Organismen up Grundlaag vun ehre Verwandschop mit'nanner in en hierarchisch System insorteert weert, dor befaat sik de akadeemsche Disziplin vun de Taxonomie mit. Se hollt sik dor an dat bi, wat bi de Forschung in de bioloogsche Systematik rutkamen is. Vunwegen, datt Forschers nich jummers eene Meenung sünd in de Fragen, wie de Organismen tohopen hören doot, passeert dat fökener, datt de wetenschopplichen Naams vun de Taxa sik verscheelt un datt de Gruppen anners tohopen stellt weert. Faken kriegt de Taxa Naams, de ut ole Traditschoon vun de latiensche oder greeksche Spraak hernahmen sünd. En Taxon, wat so en Naam kregen hett, warrt „nominell Taxon“ nömmt.