Rolf Rüssmann
Rolf Rüssmann (* 13. Oktober 1950 in Schwelm; † 2. Oktober 2009) weer en düütsch Footballspeler un Footballmanager.
De koppballstark Vörstopper speel in sien Jöögd bi FC Schwelm 06 un van 1969 bi 1973 bi FC Schalke 04, wo he 1972 DFB-Pokalsieger un düütsch Viezmeester wurr. 1972 wurr he ok all för de Natschonalmannschap interessant. Aber nahdem bekannt wurr, dat ok he in de Bundsliga-Skandal verwickelt weer, hett man hüm ok weer ut dat Upgebot streken. He hett denn ok en Geldstraaf kregen un wurr spaart, drüff aber in’t Utland spelen. He is denn nah Belgien to’n FC Brügge wesselt. Nahdem man Rüssman begnadigt hett, is he 1974 weer nah Schalke torüchgahn un hett dor bit to’n 30. November 1980 speelt. 1977 wurr he mit de Vereen nochmols Viezmeester. To’n 1. Dezember 1980 wessel he to Borussia Dortmund. Bit 1985 speel he in de Football-Bundsliga.
Mit 453 Spelen, in de he 48 Doren schaaten hett, hörr he lang Tiet to de Speler mit de meest Bundsligainsatzen.
Tüschen 1977 un 1978 keem he denn ok noch to 20 Lännerspelen in de he 1 Door schaaten hett un nehm ok an de Football-Weltmeesterschap in Argentinien 1978 deel.
An’ 25. Februar 1987 wurr Rüssmann de nee Manager vun FC Schalke 04, wo he Nahfolger vun Rudi Assauer wurr weer. An’ 10. August 1987 hett he aber ok all weer kündigt, nahdem he in Stried mit Günter Siebert geraden weer. Af den 1. April 1990 wurr he vun Helmut Grashoff as Manager bi Borussia Mönchengladbach inarbeidt un weer af den 15. Januar 1991 alleenig Manager. 1992 hebbt se hüm eerst entlaaten, dree Maand later aber denn doch weer torüchholt. He bleev denn bit 1998 bi Borussia Mönchengladbach. An’ 1. Februar 2001 wurde Rüssmann Manager vun VfB Stuttgart, an’ 19. Dezember 2002 övernehm de nee Trainer Felix Magath aber ok sien Posten.
Rüssmann is an Prostata-Krebs storven.
