Eenheidsplural
De Eenheidsplural is en Kennteken von de neddersassische Spraak.
![](http://upload.wikimedia.org/wikipedia/commons/thumb/1/1d/Eenheids-pluralislijn.png/220px-Eenheids-pluralislijn.png)
Neddersassisch
Nedderfranksch
Middeldüütsch
Veluws
![](http://upload.wikimedia.org/wikipedia/commons/thumb/4/47/Plural_suffixes_newer_version.png/220px-Plural_suffixes_newer_version.png)
Dat neddersassische billt de Pluralformen von dat Verb in de Nutied op -t oder -en: wi maakt/maket, ji maakt/maket, se maakt/maket (in de olen Stammrebeden von de Sassen: Holsteen, Noordneddersassen, Oostfalen, Westfalen); wi maken, ji maken, se maken (in dat Oostnedderdüütsche, in Sleswig, de Veluwe, en deel von Salland, en Deel von Noordhessen, Oostfreesland, Stellingwarven un Grünneng). Dat maakt also keen Ünnerscheed twischen de dree Personen wi, ji un se un ünnerscheedt sik dor von dat Hoochdüütsche, dat twee Formen hett, eenmaal -t un tweemaal -en: wir machen, ihr macht, sie machen. Dat Nedderlandsche harr jüstso von öllers twee Formen: wij maken, jij maakt, zij maken. Vondaag bruukt dat Nedderlandsche de Form jij maakt aver nich mehr un hett as ne’e Höflichkeitsform jullie maken inföhrt. Dorüm lett dat nu so, as wenn dat Nedderlandsche ok en Eenheidsplural harr.
Ans kummt de Eenheidsplural blots in dat Alemannsche vör.
De Isogloss löppt von et noorden von de Veluwe na de Ole Iessel, över de Grenz na Düütschland. Hier trennt de Lien Westfalen von de Region Nedderrhien. De Isogloss warrt ok Rhien-Iessel-Lien nöömt, aver de Isogloss beröhrt de Ne’e Iessel blots an een Punkt (löppt aver en ganz Stück an de Ole Iessel langs) un beröhrt den Rhien narms.
Bi Olpe drippt de Isogloss op de Benrather Lien. De Eenheidsplurallien is also so temlich kumplett mit de Spraakgrenzen von dat Neddersassische övereen.