Presebbio
'O presebbio
’ O presebbio
Dint' â riliggiona crestiane, 'o presebbio è na misa nscena d’ â Nasceta 'e Gesù bambino, zoè ‘a nasceta 'e Giesù 'e Nazareth. 'O presebbio è sempe accuppiato cu 'a festa ‘e Natale.
‘O presebbio, na vota custruito, nun se tene pe sempe; nce stà ‘a tradezzione d’ ‘o priparà ,abitualmente, nu poco ‘e tiempo primma ‘e Natale, ‘a primma dummeneca ‘e l’Avvento, a Napule s’ausa fà ‘o presebbio 4 semmane primma ‘e Natale, a ati parte nvece se fà ‘a festa ‘e San Nicola, 'o 6 'e dicembre o, addirittura l’urdema semmana primma ‘e Natale.
Na vota ‘o presebbio se teneva fatto fino ô 2 'e frevaro, ‘a data d’ ‘a presentazzione ‘e Giesù ô Tempio ‘e Gerusalemme ma ogge, spisso se leva ‘a miezo e se smonta, poco adoppo d' ‘a Befana, 'o 6 'e jennaro, giusto pe nce dà ‘o tiempo ‘e mettere ‘e tre Rre Magge.
’A storia
Dint’ ô Vangelo siconno San Luca, Giesù è nato dinto a na grotta. ‘O posto addò fuje miso appena nato è stato sempe raccuntato comme a na mangiatoia, ca in latino se dice “cripia”.
San Francisco d’Assisi criaje ‘o 1223 ‘o primmo presebbio, cu na rappresentazzione e na ricustruzzione d’ ‘a nasceta ‘e Giesù bambino, utilizzanno perzone riale, dint’ â cchiesa soja a Greggio, Italia.
‘E perzunaggie, (‘o bambeniello Gesù cuccato dinto a na mangiatoia, San Giuseppe,’a Vergina Maria, ‘e tre Re Magge, ‘e pasture), erano state scigliute ‘a miezo ‘a ggente d’ ‘o paese e, pure tutte l’animale erano overo.
A poco a poco st' ausanza se jette spannenno pe tutte l’Italia primma e po’, pe tutto ‘o munno. Cu ‘o tiempo se accuminciaje a mettere, ô posto d’ ‘a ggente overo, cierti statuette ‘e cera, ‘e terracotta, ‘e purcellane o, ‘e preta. ‘E primme presebbie so’ chille ca nuje canuscimmo pe rappresentazzione ca se facevano dinto ‘e cchiese ô XVI sieculo. Doppo, ‘e presebbie accuminciajeno a essere mise pure dinto ‘e case d’ ‘a ggente.
’E varie tipe ‘e presebbio
- ’O presebbio barocco: Accuminciajeno a essere criàte ô XVII sieculo , quanno 'e presebbie accuminciajeno a abbellì 'e case d' 'e nobile ca erano, a chella epuca, quase tutte quante 'e stile barocco.
- 'O presebbio napulitano: E' accumparuto 'int' a ll' Italia ntra 'o XV sieculo e 'o XVI sieculo. Se pò cunziderà ca 'e presebbie napulitane, songo 'e primme presebbie muderne. 'E perzunagge songo statuette culurate e riccamente vestute.
- ‘O presebbio pruvenzale:'E presebbio pruvenzale s'ispirano â vita locale 'e tutte 'e juorne. L'artigiane fanno rivivere, pe vvia d' 'a rappresentazione d' 'o presebbio, 'e perzunagge caratteristiche d' 'o posto o, d' 'e muorte d' 'a famiglia. Stu tipo 'e presebbio accuminciaie ô XVIII sieculo. A Marsiglia nce agghiuntajeno pure 'e statuette pruvenzale, (chille ca nuje chiammammo 'e pasture), ca rappresentavano 'e mestiere artigianale d' 'a zona: 'o mugnaio, l'arrutino, 'a lavannara etc.
- ‘O presebbio vivente: E' nu spettaculo rappresentato mmiezo ô pubblico, ncoppo a nu presepe fatto dinto a l'ambiente naturale 'e nu paese e cu 'e perzunagge ca songo perzone e animale overo , vestute cu 'e vestite 'e l'epuca e quanno nascette " 'o Bambeniello ".
’A cumposizione ‘e ‘nu presebbio
Dinteo â tradezziona antica d’‘O presebbio napulitano, ‘a scena era rappresentata d' ‘e ruvine ‘e nu tempio rumano, ca vuleva significà ‘a fina d’ ‘a civiltà antica annanze â nasceta d’ ‘a crestinanità. Doppo nu poco ‘e tiempo però, pigliaje pede l’ausanza ‘e rappresentà ‘o presebbio, facenno addeventà ‘o centro d’ ‘a scena a na grotta o, a na stalla e, attuorno attuorno, nce se costruisce po’ tutto ‘o presebbio, cu ‘a tratturia, , ‘e muntagne, ‘o castiello 'e Erode, ‘e pasture,l’angele, ‘e zampugnare, Benito ‘into ‘a capanna cu ‘e pecurelle, ‘e case, ‘o ciummo, ‘a lavannara e tutti l’ati perzunagge ca se so’ venute accucchianno, durante l’anno, dinto ‘a tradezione d’ ‘o presebbio napulitano.
Se piazza sempe ‘o Bammeniello Giesù ô centro d’ ‘a scena, mmiezo, tra ‘a Madonna e San Giuseppe. ‘E spalle lloro, areto â mangiatoia, ca è ‘a cunnulella d’ ‘o Bammeniello, ce stanno ‘o bue ‘e l’asinello, ‘e dduje animale ‘e stalla ca siconn' â tradezzione so’ chille ca hanno scarfato ‘o criaturo c’ ‘o sciato lloro. Po’ se metteno dinto ‘o presebbio, ‘e pasture e l’angele, pecché fujeno propreto l’angele ca jetteno a dà a bbona nova ê pasture, ‘a mmasciata ca era nato Giesù Cristo, ‘o Salvatore.
Doppo ‘a criazzione d' 'e pasture, â Pruvenza, ‘a scena po’ cumprennere pure ati perzunagge, pure chille d' 'e mestiere 'e ogge e financo ‘e perzunagge famuse ca vivono ‘o juorno 'e ogge o ca so’ addeventate nu simbulo d’ ‘o paese. A Napule spisso se trovano ncoppo ‘e presebbie pure ‘e pasture ca raffiguranoTotò, Eduardo De Filippo e Massimo Troisi .
E’ ausanza ‘e mettere pure na stella ncoppo ô titto d’ ‘a grotta o, ncoppo ô presebbio. Chesta stella rappresenta chella ca, siconn' ê Sacre Scritture, guidaje ‘e tre Re Magge durante ô viaggio lloro, nfino â grotta a Betlemme. ‘E tre Re Magge, Gaspare, Melchiorre e Baldassarre, ca stanno a significà aunione ‘e tutte ‘e popole d’ ‘a terra, songo sempe vestute e urnate cu ‘e vestite ca stanno scritte dinto ê Vangele. Lloro però, veneno mise sulo ‘o juorne d’ ‘a Befana, pecché è propreto cu ‘e riale ca lloro facetteno a Giesù Bambino, ca è po’ nata l’ausanza ‘e festeggià ‘a festa d’ ‘a Befana, cioè ‘a festa d' 'e riale.