Euro
Ny euro dia ny sandam-bola ofisialin'ny firenena mpikambana 16 ao amin'ny Vondrona Eoropeana, ary vola tokana sy iraisan'ireo firenena 16 ireo. Ny fikambanan'ny firenena rehetra mampiasa ny vola euro dia atao hoe faritra euro.
Ankoatran'ny firenena ao amin'ny faritra euro, misy firenena ao Eoropa mampiasa ilay sandam-bola na dia tsy vola ofisialy any amin'ny fireneny aza ny euro, ny Montenegro sy ny Kosovo ohatra mampiasa azy, noho ny fianjadian'ny faritra euro.
Ny euro dia nanomboka niasa tamin'ny 1999 ary nandimby ny ECU (European Currency Unit), sandam-bola eoropeana noforonina tamin'ny 1979. Ankehitriny, izy izao ny sandam-bola faharoa miasa indrindra eto an-tany ary voalohany amin'ny isan'ny vola taratasy voaprinty (610 miliara euro).
