Trol (internet)

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

‘ne Trol, (mv. trolle) van ‘t Ingelsj troll, ies op internet ‘ne persoon dae op fora, websites, chatkanale beriechte plaats mèt ’t doel veursjpelbaar reacties van ander luuj oet te lokke of aandach te trèkke. ’n Ander soort trol kaom vreuger in sages veur. ’t Biehuèrende werkwoord ies trolle, trolde getrold.

Werkwies

‘ne Internettrol zièjt ónrös door euveral woa dat mer meugelik ies tege de luuj te agere. Veubeeld: Op ‘n neet-roukersj-forum zal ‘ne trol ummer wir beginne mèt te zègke wie fijn rouke ies.

’n Ander methode ies ’t oetlokke van reacties of discussies euver zake die neet relevant zin of sjienargumente geve mèt es doel um de gebrukersj binne de gemeinsjap bewös te frustere.

’t Kump ouch veur dat emes zaet dat get ’n feit ies, terwiel ’r in werkelikheid ’n meining nao veur bringk. Dit ies neet ummer negatief, meh ’t kèn behuèrlik provocerend zin (sóms). Veurbeeld: "Aids ies de sjtraof van God veur homoseksuele". Ingebrach es slogan zonder verdere nuancering, ies ‘t vrie veursjpelbaar dat forumdeilnummersj ziech dan ergere aan de oetgesjponne conversatieliene die dao-op volge en die dan eigelik nieks toevoge.

Trolle were nog waal ins verwiesseld mèt querulante; dèks ies ‘ne trol ouch ‘ne querulant. Meh dao ies e belangriek versjil. ‘ne Trol zeurt, zuig, zeik en zeivert mèt es enigste doel um te sjtuère.’t Zgn. trolle kènt sóms ’n instrument zin um discussies te dominere en te beïnvloede. Veur de trol ies dat biezaak, terwiel de querulant ummer ’n doel haet. Hae gebruuk ’t trolle (ww) es mieddel um dat doel te bereike.

‘ne Trol maak veural gebruuk van argumente die door andere zin gebruuk en effectief zin gebleke in ’t zièje van ónrös en óndudelikheid en zal daobie neet vermelde dat eigelik ‘ne andere geciteerd weurt. ‘ne Trol kièrt ziech noats tege ‘ne ganse groep, behalve in ’n poging um ziechzelf es sjlachoffer van ’n deil daovan te presentere. Door ziech namelik tege eine of e beperk aantal persone te riechte, probeert ‘ne trol dae/die te isolere en daomèt de aandach aaf te leie. Door daoneve controleerbaar zjuuste oetsjpraoke te doon of te handele, geuf ‘ne trol de indrök serieus bezig te zin, terwiel ’t echte doel van zien acties ziet in ’t sjtoke, luuj tegeneinopzètte, twièdrach zièje door mieddel van leuges en hauf woarhede. Trolle houte van discussiëre, euver trolle zelf, zonder inhoudelik doel of ing: daorum ies ’t neet oetzonderlik es ‘ne trol andere van trolle besjöldig mèt 't gezègkde: “Wats te zaes, bies se zelf!”

‘t Begrip trol

‘t Begrip trol (es zelfsjtendig naamwoord) ies bekènd in alle Germaanse tale. ‘t Beteikent in ‘n sage ‘n bovenatuurlijk weze of ‘n koaj en soms vruntelike kiekende (m.a.w. valsje) dwerg. In ’t Ingelsj besjteit neve ’t naamwoord ouch e werkwoord to troll mèt twiè beteikenisse: (1) ontsjpanne e leedsje zinge en vösje mèt de hölp van ’ne lokvösj dae achter de boot weurt gesjlèp.

De pretentieloosheid tot koaje nonchalance (op ‘t vlak van sjpelling, inhoud en goje sjmaak) van ‘ne trol geuf aan moderatore väöl zörg en euverwerk. Veural in usenet, meh ouch in chats kump me trolle tege, en ouch ander online-projecte, zoa-es Wikipedia höbbe te make mèt trolle.

Es emes twiè of miè gebroekersname of sjoelname haet op wikipedia weurt 'r 'ne kloon of zökpoep geneump.

Zuug ouch: Nettiquette