Maurits Cornelis Escher
Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.
![](http://upload.wikimedia.org/wikipedia/commons/thumb/4/4d/Maurits_Cornelis_Escher.jpg/220px-Maurits_Cornelis_Escher.jpg)
Maurits Cornelis Escher (Leeuwarden, 17 juni 1898 – Hilversum, 27 meert 1972) waas 'ne Nederlandjse kunsteneer, dae bekind is veur zien houtsjneje, houtgravures en lithografieje, worin d'r döks sjpeelde mit wiskundige principes.
Zien gravures verbilde döks ónmeugelike constructies, studies van óneindigheid en inein passende maetkundige petrone (vlakverdeilinge) die geleielik in gans versjillende vörm verangere. Inkel heel bekinde veursjtèllinge die hae teikende zeen óntwórpe róndj ónmeugelike objekte wie de Penrosedriehook en de Penrosetrap. Pas in de jaore fieftig van d'n twintjigsten eew kreeg t'r in breiere krink erkinning es kunsteneer, veural in de Vereinigde Sjtate. Kristallografe en wiskundige óntdèkdje in zien wirk symmetrieje en thema's oet häör vakgebiede. Vanaaf 1960 weurt Escher zien grafisch wirk gebroek in weitesjappelike (leer)beuk.
In de jaore sestig waerde zien wirk, tót Escher zien verbazing, vanwaege de fantastische parallelle waerelde ómermp door hippies en popsjterre.