Europeane
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Europeane weure doorgaons gedefinieerd es alle lui die leve in Europa. Soms weurt d'r nao Europeane geriffereerd es Europees börgers; dit zien evels lui die 't börgersjap vaan de Europese Unie höbbe. Neet alle lui in Europa höbbe dat börgersjap. Soms weure Europeane gedefinieerd es 'n ras of ethniciteit. Dit is veural e begrip wat gebruuk weurt in neet-Europese len mèt 'n dominante gróp lui die 'n Europese achtergroond höbbe. Zoe weurt in de VS soms nao witte lui geriffereerd mèt 't begrip Europese Amerikane. Evels is dao allewijl 't begrip witte Amerikane (white Americans) väöl gebrukeleker. In sommege weitesjappe (mèt naome de sociologie en de anthropologie) weurt 'nen Europeaan liever gezien es 'n identiteit. Zoe kin me d'r nao verwieze tot in sommege Europese len väöl mie lui ziech Europees veule (wie in Nederland, Belsj en Duitsland) es in aander Europese len (wie in 't VK, Rusland en Cyprus). In sommege historische contexte beteikene Europeane weer get aanders. Zoe kin 't christene beteikene of blaanke koloniste. In aander historische en linguïstische contexte staon Europeane synoniem aon Indo-Europeane: 't volk boe de meiste Europeane vaanaof stamme. Dit is evels verwarrend, umtot in dat geval Este, Finne en Hongare gein Europeane zien, wijl Indiërs dat daan wel zawwe zien.