Linguas indoeuropean
![](http://upload.wikimedia.org/wikipedia/commons/thumb/f/fb/IE_countries.svg/391px-IE_countries.svg.png)
Indoeuropean es la familia la plu grande de linguas en la mundo, con 150 linguas e sirca tre mil milion parlores. Linguas inclui hindi e urdu (400 milion), bangla (200 milion), espaniol (300 milion), portuges (200 milion), franses (100 milion), deutx (100 milion), rusce (300 milion), e engles (400 milion). Engles es la lingua du la plu popular, e es parlada par sirca mil milion persones en la mundo.
La parlores indoeuropean ia abita orijinal la rejion entre la rios Danubio e Volga. Entre 3000 e 2000 aec, la protolingua indoeuropean ia estende a Europa e Anatolia a la ueste, a Persia e India a la sude, e a Xina ueste a la este. Pos miles de anios, en la eda de colonialisme, linguas como espaniol, portuges, franses, engles e rusce estende a la Americas, Australia, la isolas de la mar Pasifica, partes de Africa, e a Sibir.
Un otra teoria sujeste ce la orijina de indoeuropean ia es en Anatolia, e ce la popla ia sperde a la Balcanes sirca 6000 aec e continua de ala e Europa e la stepes de Eurasia. Cual teoria es coreta no es ancora desideda, an si la plu de siensistes prefere la prima, comun nomida la teoria de la stepes, e de la curganes.
Per plu informa, vade a la articles sur la sufamilias e linguas individua.
- Linguas anatolian
- Linguas tocarian
- Linguas celta
- Linguas italica
- Linguas germanica
- Linguas baltica
- Linguas slavica
- Linguas indoiranian
- Xcip
- Elinica
- Haieren