Печора

Печора – Коми Республикасы менен Ненец автономия округундагы дарыя. Узундугу 1809 км; алабынын аянты 322 миң км². Түндүк Уралдан башталып, Печора ойдуңу аркылуу агат; чатына 130 км калганда 2 салаага - Чоң Печора, Кичи Печорага бөлүнүп кетет. Баренц деңизинин Печора колтугуна куярда дельтаны (жазылыгы 45 кмдей) пайда кылат. Негизги куймалары: Илыч, Уса (оң), Ижма, Цильма (сол). Орточо чыгымы 4100 м³/сек. Жазында кирип, жайкы жамгырдан ташкындайт. Октябрдын аягынан июнга чейин муз каптайт. Усть-Уньяга чейин кеме каттайт (Троицко-Печорскиге чейин үзгүлтүксүз). Деңиз кемелери Нарьян-Марга чейин жетет. Балык (сёмга, май канат, ряпушка ж. б.) кармалып, сал агызылат. Боюнда Печора, Нарьян-Мар шаары, жайгашкан. Илыч дарыясы куйган жерде Печора-Илыч коругу уюштурулган.

Колдонулган адабияттар

• “Кыргызстан” улуттук энциклопедиясы: 6-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. 816 бет, илл. ISBN 978 9967-14-117-9