Ռուբեն Նիկողոսյան

Վիքիպեդիայում կան հոդվածներ Նիկողոսյան ազգանունով այլ մարդկանց մասին։

Ռուբեն Վլադիմիրի Նիկողոսյան (հուլիսի 23, 1940(1940-07-23), Թբիլիսի, Վրացական ԽՍՀ, ԽՍՀՄ - դեկտեմբերի 16, 2014(2014-12-16)), վնասվածքաբան-օրթոպեդ։ Բժշկական գիտությունների դոկտոր (1999), պրոֆեսոր (2003)։ ՀՀ վաստակավոր գյուտարար (1998)։

Ռուբեն Նիկողոսյան
Ծնվել է	հուլիսի 23, 1940(1940-07-23)
Ծննդավայր	Թբիլիսի
Մահացել է	դեկտեմբերի 16, 2014(2014-12-16) (74 տարեկան)
Քաղաքացիություն	Հայաստան
Կրթություն	Երևանի Մխիթար Հերացու անվան Պետական Բժշկական Համալսարան
Մասնագիտություն	վնասվածքաբան-օրթոպեդ
Գիտական աստիճան	բժշկական գիտությունների դոկտոր

Կենսագրություն

1966 թվականին ավարտել է Երևանի պետական բժշկական ինստիտուտը։ 1983-2003 թվականներին աշխատել է ՀՀ առողջապահության նախարարությունում, միաժամանակ՝ ԵԲԻ ընդհանուր վիրաբուժության, ԱԱԻ վնասվածքաբանության և օրթոպեդիայի, 1989-2003 թվականներին` շտապ օգնության և աղետների բժշկության ամբիոններում, 1989-2003 թվականներին`«Շտապ օգնություն» գիտական ԲԿ համակցված վնասվածքաբանների բաժանմունքի վարիչ, 2003 թվականից՝ պրոֆեսոր, գիտական խորհրդատու։

Աշխատանքներ աղետի գոտում

1988 թվականի Սպիտակի երկրաշարժի ժամանակ ղեկավարել է Սպիտակ-Վանաձոր, Գուգարք-Ստեփանավան գոտու աղետի բժշկական հետևանքների վերացման աշխատանքները։

Աշխատանքային գործունեություն

1983-1990 թվականներին եղել է ՀՀ առողջապահության նախարարության գլխավոր վիրաբույժ և վնասվածքաբան-օրթոպեդ, 1990-1999 թվականներին` Աղետների բժշկության գլխավոր մասնագետ, 1990 թվականից` ԱՊՀ երկրների աղետների բժշկության համակարգող խորհրդի անդամ, 1984 թվականից՝ ՀՀ վիրաբույժների գիտական ընկերության վարչության անդամ, 1997-2002 թվականներին՝ ՄԱԿ-ի Աղետների բժշկության ազգային և տարածաշրջանային ծրագրերի գիտական խորհրդատու։

Գիտական գործունեություն

Աշխատությունները վերաբերում են վնասվածքաբանության և օրթոպեդիայի, համակցված վնասվածքների բուժման, բժշկության և առողջապահության կազմակերպման հարցերին։ Հեղինակ է մեթոդական ձեռնարկների։

Երկեր

• Պատերազմների և բնական աղետների ժամանակ մարդկային կորուստների մասին, Ե., 2000 (համահեղինակ)։
• Ռազմադաշտային վիրաբուժական ծառայության կազմակերպման հիմունքները գործող բանակում, Ե., 2005 (համահեղինակ)։
• Прогнозирование медико-социальных последствий землетрясений и проблемы катастроф в Армении., Е., 2004.