Leopold Haupt
![](http://upload.wikimedia.org/wikipedia/commons/thumb/0/09/Joachim_Leopold_Haupt.jpg/220px-Joachim_Leopold_Haupt.jpg)
Joachim Thomas Leopold Haupt (* 1. awgusta 1797 w Baudach (dźensa Budziechów w Pólskej); † 9. februara 1883 w Zhorjelcu) běše farar a ludowědnik. Zhromadnje z Janom Arnoštom Smolerjom wuda wón 1841/43 Pěsnički hornich a delnich Łužiskich Serbow.
Žiwjenje
[wobdźěłać | žórłowy tekst wobdźěłać]Leopold Haupt narodźi so 1797 do němskeje swójby fararja w delnjołužiskim Baudachu, dźensnišej Pólskej. Wuchodźiwši gymnazij w Žarowje studowaše teologiju na Lipšćanskej uniwersiće, hdźež běše 1818 zdobom sobuzałožer burschenschafty. Po tym skutkowaše jako farar w Kottwitzu a Freiwaldauje pola Žahanja. Wot 1832 běše ordinarius a prědar w Zhorjelcu.
Spočatnje přewažnje přez teologiske spisy znaty, płaći jeho zajim tež wosebje regionalnym stawiznam a ludowědźe. Wot 1832 běše wón sobustaw Hornjołužiskeje towaršnosće wědomosćow w Zhorjelcu a so zdobom 1833 na sekretara a prěnjeho bibliotekara wuzwoli. Tu měješe mjez druhim přistup k von Bünauowej zběrce serbskich ludowych pěsni a pozbudźi zjawnje k dalšemu zběranju serbskich pěsni. W lěće 1836 postara so wo wupisanje myta k zběranju hornjo- a delnjołužiskich narodnych pěsni z němskim přełožkom přez Hornjołužisku towaršnosć wědomosćow. Dnja 26. septembra 1838 spožči so tute myto serbskimaj studentomaj Jordanej, Smolerjej a Hauptej, kotrehož zapodaće so pak přewažnje na von Bünauowu zběrku poćahowaše. Leopold Haupt zdoby Smolerja, kotryž nochcyše, zo towarstwo zběrku wuda a myto tuž njepřiwza, za wudaće dwuzwjazkoweje zběrki Pěsnički hornich a delnich Łužiskich Serbow (Grimma 1841/43).
Žórła
[wobdźěłać | žórłowy tekst wobdźěłać]- Wilhelm Zeil: Haupt, Joachim Leopold. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 181.
- Rudolf Lehmann: Haupt, Joachim Leopold. W: Neue Deutsche Biographie (NDB). Zwjazk 8, Duncker & Humblot, Berlin 1969, str. 100.
- Hartmut Zwahr (wudawaćel): Meine Landsleute. VEB Domowina-Verlag, Bautzen 1990, str. 187sl.