Accra
| ||
| Zakładne daty | ||
|---|---|---|
| stat |  Ghana
| |
| wysokosć | 20 metrow n.m.hł. | |
| přestrjeń | 185 km² | |
| wobydlerstwo | 2.291.352 (2012) | |
| hustosć zasydlenja | 12.385,7 wob./km² | |
Accra je stolica a z wjace hač dwěmaj milionomaj wobydlerjow zdobom najwjetše město Ghany kaž tež jedne z najwjetšich metropolow zapadneje Afriki. Nadeńdźe so na samym juhu kraja při brjoze Ginejskeho golfa.
W měsće knježi tropiska klima z přerěznymi maksimalnymi temperaturami mjez 28,0° C w awgusće a 32,7° C w februarje. Suchi čas traje wot nowembra hač do februara.
Stawizny
Sydlišćo je so w 15. lětstotku załožiło wot luda Ga, kotryž chcyše tule z Europjanami wikować. Prěnje, wot Portugalčanow natwarjene zepěranišćo bu pak bórze wot domoródnych zničene. W běhu 17. lětstotka załožichu wjacore europske mócnarstwa dla přihódneho połoženja při přirodnym přistawje swoje sydlišća: Nižozemjenjo w lěće 1605 Fort Ussher, Šwedojo w lěće 1657 Christiansborg, kotryž bu bórze wot Danow přewzaty a Jendźelčenjo w lěće 1673 James Fort. Tak měješe Accra w 19. lětstotku nižozemski, danski a britiski měšćanski dźěl.
Město z europskimi fortami bu 1862 přez wulke zemjerženje zničene. Njehladajo na to přepołožichu Jendźelčenjo w lěće 1877 stolicu swojeje kolonije Złoty pobrjóh z Cape Coast do Accry a natwarichu planowe město po europskim přikładźe.
Wotkaz
Commons: Accra – Zběrka wobrazow, widejow a awdiodatajow